قازاقستانعا قونىس اۋدارعان شەتەلدىكتەردى بەيىمدەۋ ورتالىعىنان ءوتۋدى مىندەتتەۋ كەرەك - دەپۋتات
بۇل تۋرالى ءماجىلىستىڭ جالپى وتىرىسىندا دەپۋتات بەرىك دۇيسەنبينوۆ ايتتى، دەپ حابارلايدى قازاقپارات ءتىلشىسى.
«قازاقستان قاي زاماندا دا قىسىم كورىپ، ءوز ەلىنەن قاشىپ، بوسقىن بولۋعا ءماجبۇر بولعان تالاي حالىقتى ءوز باسىنداعى قيىنشىلىقتارعا قاراماستان، قۇشاق جايا قارسى الىپ، امان الىپ قالعانىنا تاريح كۋا. قازاقستان رەسپۋبليكاسى وركەنيەتتى ەل رەتىندە، رەسەي شەكاراسىنان ەلىمىزگە باس ساۋعالاپ، سوعىستان قاشقان رەسەي ازاماتتارىنا تاعى دا پانا بولدى. ىشكى ىستەر مينيسترلىگىنىڭ كەشەگى اقپاراتى بويىنشا قازاق ەلىنە 200 مىڭ ادام رەسەيدەن كەلگەن، 140 مىڭ ادام ەلىمىزدەن شىققان. ال 30-قىركۇيەكتە «فوربس» جۋرنالىندا جاريالانعان ەڭبەك جانە الەۋمەتتىك قورعاۋ مينيسترلىگىنىڭ مالىمەتىنە قاراعاندا، جالپى بۇگىندە ەلىمىزدە 350000 مىڭ رەسەي ازاماتى تۇراقتى تۇرىپ جاتىر. وتكەن اپتاداعى كوشىپ كەلگەندەردىڭ باسىم كوپشىلىگى استانا مەن الماتىعا، شەكارالاس وبلىس ورتالىقتارىنا ورنالاسۋدا. ونسىز دا ىشكى ميگراتسيانىڭ سالدارىنان تۇرعىندارىنىڭ سانى كۇرت وسكەن ۇلكەن قالالارىمىزعا ينفراسترۋكتۋرالىق جانە الەۋمەتتىك- ەكونوميكالىق قىسىم ارتىپ كەلەدى»، - دەدى ب. دۇيسەنبينوۆ ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.
ونىڭ پايىمىنشا، اسكەر جاسىنداعى رەسەيلىك ازاماتتاردىڭ ءبىزدىڭ ەلىمىزگە جاپپاي قونىس اۋدارۋى بۇگىنگى پوستكەڭەستىك ۋشىققان گەوساياسي جاعدايدا حالقىمىزدى قاتتى الاڭداتىپ وتىر.
«ەلىمىزدىڭ باستى بايلىعى - ول تاۋەلسىزدىگىمىز، جەر تۇتاستىعىمىز، ەلدىڭ اماندىعى مەن حالقىمىزدىڭ بەيبىت ءومىرى. ءارتۇرلى سەبەپتەرمەن ءبىزدىڭ ەلىمىزگە قونىس اۋدارۋعا ءماجبۇر بولعان شەتەل ازاماتتارىنىڭ اراسىنان بۇگىن قازاقستان وندىرىسىندە قاجەت، جەتىسپەيتىن تەحنيكالىق، IT سالاسىنىڭ جانە باسقا دا ماماندار ءوز ورىندارىن تاۋىپ، ەل ەكونوميكاسىنا پايداسىن تيگىزىپ، ءبىر كىرپىش بولىپ قالانسا، وعان ءبىز بيزنەس پارتياسى رەتىندە تۇسىنىستىكپەن قارايمىز. الايدا ولار قازاقستان رەسپۋبليكاسىنىڭ كونستيتۋتسياسى مەن زاڭدارىنا قالتقىسىز باعىنۋعا، ءتىلىمىز بەن سالت-ءداستۇرىمىزدى قۇرمەتتەۋگە مىندەتتى. سونداي-اق، ميگراتسيالىق داعدارىستى پايدالانىپ، ەل ءىشىن ارانداتۋشىلاردىڭ ءىس-ارەكەتتەرىنە دە توسقاۋىل قويىلۋى ءتيىس»، - دەدى دەپۋتات.
ونىڭ سوزىنە قاراعاندا، قازىردىڭ وزىندە ەلىمىزدىڭ كەيبىر ايماقتارىندا ارانداتۋ وقيعالارى بايقالىپ وتىر.
«قىلمىستىق ىستەر قوزعاپ، ارانداتۋشىلاردىڭ الدىن شۇعىل الىپ جاتقان قۇزىرلى مەملەكەتتىك ورگاندارعا ريزاشىلىعىمىزدى بىلدىرەمىز. وسى ورايدا قازاقستاندا قانشا رەسەي ازاماتى بار ەكەنىن ناقتىلاپ، جاۋاپ بەرۋىڭىزدى سۇرايمىز»، - دەدى بەرىك دۇيسەنبينوۆ.
سونىمەن قاتار «اق جول» پارتياسى ۇكىمەت جەدەل تۇردە ءتيىستى ساقتىق شارالارىن قابىلداپ، مۇددەلى مەملەكەتتىك ورگاندارعا ءتيىستى تاپسىرما بەرۋى ءتيىس ەكەنىن العا تارتىپ وتىر.
بىرىنشىدەن، ەلىمىزگە كەلگەندەردىڭ اراسىندا قازاقستاندا قالۋعا نيەت بىلدىرگەن ازاماتتار ءۇشىن بەيىمدەۋ ورتالىقتارىن اشۋ كەرەك.
ونىڭ ايتۋىنشا، بۇل ورتالىقتاردا ولارعا قازاقستان تاريحىمەن، مادەنيەتى مەن تۇرمىس- سالتىمەن، سالت-ءداستۇرى مەن ادەت- عۇرپىمەن تانىستىرۋ ماڭىزدى. قازاقستان رەسپۋبليكاسىنىڭ كونستيتۋتسياسى مەن زاڭدارىن ءتۇسىندىرىپ، قۇقىقتىق كەڭەس بەرۋ، قازاق ءتىلى كۋرستارىن اشۋ جانە ءاربىر كوشىپ كەلگەن شەتەل ازاماتىن بەيىمدەۋ ورتالىعىنان ءوتۋدى مىندەتتەۋ قاجەت.
«ءاربىر قونىس اۋدارعاننىڭ قوس ازاماتتىق فاكتىسى بويىنشا تەكسەرۋ جانە ناتيجەسى بويىنشا تيەسىلى قۇقىقتىق شارا قولدانۋ كەرەك. مۇنىمەن قوسا، اقپاراتتىق قاۋىپسىزدىكتى قاتاڭ باقىلاپ، الەۋمەتتىك جەلىلەرگە، كەلگەندەردىڭ چاتتارىنا كونتەنت ساراپتاما مەن مونيتورينگ جۇرگىزىپ، ۇلتتىق قاۋىپسىزدىككە قاۋىپ توندىرەتىن جانە مەملەكەتىمىزدىڭ جەر تۇتاستىعىنا، تاۋەلسىزدىگىمىزگە كۇمان كەلتىرەتىن جازبالاردىڭ اۆتورلارىن ەرەكشە قاداعالاۋعا الىپ، ونداي ىرىتكى سالۋشىلاردى قاتاڭ جاۋاپكەرشىلىككە تارتىپ، ولاردى ەلدەن شۇعىل شىعارۋ قاجەت دەپ سانايمىز»، - دەدى دەپۋتات.