رەسەي ەلشىسى قازاقستاننىڭ سىرتقى ىستەر مينيسترلىگىنە شاقىرىلدى
بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك «قازاقستاننىڭ ماسكەۋدەگى ەلشىسى رەسەي سىرتقى ىستەر مينيسترلىگىنە شاقىرىلعان بولاتىن. بۇل قالىپتى ديپلوماتيالىق تاجىريبە. بۇگىن رەسەي ەلشىسى ەلىمىزدىڭ سىرتقى ىستەر مينيسترلىگىنە شاقىرىلدى. وسى ورايدا ر ف سىرتقى ىستەر مينيسترلىگى رەسمي وكىلىنىڭ (ماريا زاحاروۆانىڭ) مالىمدەمەسى قارالادى. سونىمەن قاتار، رەسەي جاعىنىڭ ۋكراينا ەلشىسىنە قاتىستى تالاپتارى تالقىلانادى»، - دەدى ا. سمادياروۆ پارلامەنت ماجىلىسىندە وتكەن بريفينگىدە.
وسى ورايدا ول ۋكراينانىڭ ەلشىسى (پەتر ۆرۋبليەۆسكي) قازاقستاننان كەتەتىنىن ايتتى. ۋكراينانىڭ سىرتقى ىستەر مينيسترلىگى جاڭا ەلشى تاعايىنداۋ تۋرالى ءوتىنىش جىبەردى. قازىر بۇل ءوتىنىش قاراستىرىلىپ جاتىر. پ. ۆرۋبليەۆسكيدىڭ قازاقستان سىرتقى ىستەر مينيسترلىگىندە نەمەسە باسقا دا مەملەكەتتىك ۆەدومستۆولاردا قانداي دا ءبىر كەزدەسۋلەرى جوسپارلانباعان.
«بۇل ماسەلە بويىنشا ۋكراينا جاعىمەن ءبىزدىڭ تولىق كەلىسىمىمىز بار. قوس تاراپ ۋاعدالاستىقتارىن ورىندادى. سوندىقتان ۋكراينا جاعىمەن شەشىلمەگەن ەشقانداي ماسەلە جوق. قازاقستانداعى ەلشىنىڭ كەتۋى تۋرالى شەشىمىن ۋكراينا سىرتقى ىستەر مينيسترلىگى وزدەرى شىعاردى. وسى ورايدا باسقا ەلشى تاعايىندالماق»، - دەدى رەسمي وكىل.
بۇدان بۇرىن حابارلانعانداي، بيىل تامىز ايىندا ۋكراينا ەلشىسى پەتر ۆرۋبليەۆسكي بلوگەرگە بەرگەن سۇحباتىنا قاتىستى ق ر سىرتقى ىستەر مينيسترلىگىنە شاقىرىلدى.
سونىمەن قاتار ا. سمادياروۆ رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆانىڭ ۋكراينا ەلشىسىنىڭ قازاقستاننان «شىعارىلۋىنا» قاتىستى تۇسىنىكتەمەسىنە پىكىر ءبىلدىردى.
اۆتور
رۋسلان عابباسوۆ