ەلىمىزدە يۋانمەن وپەراتسيا جۇرگىزەتىن بانك ىسكە قوسىلدى

استانا. قازاقپارات - ەل اۋماعىندا يۋانمەن وپەراتسيا جۇرگىزۋ بويىنشا كليرينگتىك بانك انىقتالدى. شەشىمدى ۇلتتىق بانك جاريالادى. مۇنداي باستامانىڭ قىتاي - قازاق بايلانىسىنا اسەرى قانداي؟

شەشىمگە ساي كليرينگتىك بانك مىندەتىن الماتىداعى «قىتايدىڭ ساۋدا- ونەركاسىپ بانكى» اتقارادى، دەپ حابارلايدى «حابار 24».

قىتايدىڭ ورتالىق بانكى ەكى كليرينگتىك قارجى ۇيىمىن انىقتادى. ونىڭ ءبىرى - قازاقستاندا، ەكىنشىسى - لاوستا ورنالاسقان. وتكەن ايدا قازاق پەن قىتايدىڭ باس بانكتەرى يۋان بويىنشا كليرينگ مەحانيزمىن تۇزۋگە باعىتتالعان مەموراندۋمعا قول قويدى. ونىڭ نەگىزىندە ءبىرقاتار مىندەتتەمە جاتىر. جالپى ماماندار كليرينگتىك يۋان وپەراتسيالارى بويىنشا ينفراقۇرىلىمدى دامىتۋ تاراپتار اراسىنداعى بايلانىستى نىعايتۋعا جول اشاتىنىن ايتادى.

كليرينگتىك بانكتىڭ قىزمەتى ۇلتتىق ۆاليۋتاداعى ەسەپ ايىرىسۋلارعا جاڭا سەرپىن بەرەدى. ءتىپتى ءوزارا ساۋدا جانە ينۆەستيتسيالىق قىزمەتتىڭ دامۋىنا ىقپال ەتەدى دەيدى ۇلتتىق بانك وكىلدەرى.

ايدا كۇلبولاتوۆا، ق ر ۇ ب حالىقارالىق بايلانىس دەپارتامەنتى ديرەكتورىنىڭ ورىنباسارى:

- بۇل شەشىم، اسىرەسە، كليرينگتىك بانكتىڭ قىتاي قارجى نارىعىنا تىكەلەي كىرۋىنىڭ ارقاسىندا ۇلتتىق ۆاليۋتاداعى ترانسشەكارالىق تولەمدەردىڭ تيىمدىلىگىن ارتتىرادى دەپ كۇتەمىز. بۇل رەتتە، ICBC- ءتىڭ كليرينگتىك بانك رەتىندە تاعايىندالۋى باسقا بانكتەردىڭ قىتاي يۋانىندەگى وپەراتسيالار بويىنشا قىزمەتىن، ونىڭ ىشىندە قازاقستاندىق بانكتەردىڭ كوررەسپوندەنتتىك شوتتار اشۋىن جانە كليەنتتەرگە قىزمەت كورسەتۋىن شەكتەمەيتىنىن اتاپ وتكەن ءجون.

قىتاي- قازاق اراسىن تەمىرجول بايلانىستىرادى

«ەلىمىزدىڭ كولىك الەۋەتىن دامىتۋ ءۇشىن قىتايعا باقتى ارقىلى تەمىرجول جەلىسىن سالۋدى جوسپارلاپ وتىرمىز. ءبىز بۇل تەمىرجولدى مىندەتتى تۇردە سالۋىمىز كەرەك». مەملەكەت باسشىسى اباي وبلىسىنا جاساعان ساپارىندا وسىلاي دەدى. قاسىم- جومارت توقايەۆ وڭىردە «قۇرعاق پورت» پەن «لوگيستيكالىق پارك» قۇرىپ، كولىك دالىزدەرىن دامىتۋ قاجەتتىگىن العا تارتتى. ۇكىمەت تە ماسەلەنى قاراستىرىپ جاتىر ەكەن. تاراپتار شەكاراداعى ءۇشىنشى وتكىزۋ بەكەتىن اشۋ بويىنشا كەلىسسوزدەر جۇرگىزىپ، تۇيىسەتىن اۋماقتى بەلگىلەپ العان.

يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنشە، جوبا 2024-2025 -جىلدارى جۇزەگە اسادى. تەمىرجول اۋماعى اياگوزدەن باقتىعا دەيىن 270 شاقىرىم، ار جاعىندا قىتايداعى شاۋەشەكپەن جالعاسىپ كەتە بەرەدى. قازاقستان تەمىرجولى ينۆەستيتسيانى «شيپ و پەي» ءپرينتسيپى بويىنشا تارتادى. جوبانى ىسكە اسىرۋ ارقىلى تاۋار تاسىمالىن 20 ميلليون تونناعا دەيىن ارتتىرۋعا بولادى دەيدى ماماندار.

قازاق- قىتاي ساۋدا بايلانىسى نىعايدى

بيىل ەكى ەل اراسىنداعى تاۋار اينالىمى 40 پروتسەنتكە ءوستى. مەملەكەتتىك كىرىستەر كوميتەتى قازاقستاننىڭ سىرتقى ساۋداسىندا قىتايدىڭ ۇلەسى 23 پروتسەنت بولعانىن ايتادى. 7 ايدا تاراپتار ءبىر- بىرىنە 13,5 ميلليارد دوللاردىڭ ءونىمىن ساتقان. ەلىمىز ەكسپورتتى % 52- كە ارتتىردى. اتاپ ايتقاندا، بىلتىر 5,3 ميلليارد دوللاردىڭ تاۋارىن سىرتقا جونەلتسەك، بيىلعى ۇلەسى 8 ميلليارد دوللارعا جەتكەن. ونىڭ ىشىندە مينەرالدى ونىمدەر ساتىلىمى 85 پروتسەنتكە ءوستى. وتىن- ەنەرگەتيكا تاۋارلارى دا 2 ەسە كوپ ساتىلعان. ال يمپورت 5,5 ميلليارد دوللارعا تەڭەستى. اسىرەسە، كولىك جانە جابدىقتارىن 20 پروتسەنتكە ارتىق الدىق. حيميا جانە مەتالل ونىمدەرى يمپورتى دا ەسەلەپ ارتىپ جاتىر.

www.24.kz