ازەربايجاندا رەسەيلىكتەر كوبەيدى

استانا. قازاقپارات - ازەربايجاندا دا رەسەيلىكتەر كوبەيدى. بۇل جاقتا پاندەميادان كەيىن قۇرلىق شەكاراسى ءالى اشىلماعان.

وتكەن- كەتكەن جولاۋشى تەك اۋە ارقىلى عانا قاتىناي الادى. سول سەبەپتى بيلەت قۇنى الدەقايدا ءوستى.

وزگە دە تاۋارلار قىمباتتاپ، جەرگىلىكتى جۇرتتىڭ قالتاسىن قاعا باستادى. پاندەميا باستالعالى ازەربايجاننىڭ قۇرىلىقتاعى شەكارالارى جابىق تۇر. سوندىقتان بۇل ەلگە كەلگىسى كەلگەندەر تەك ۇشاقپەن جەتە الادى. رەسەيدە ءىشىنارا موبيليزاتسيا جاريالانعاننان كەيىن ولاردىڭ سانى ەسەلەپ ءوستى. اراسىندا رەسەي ازاماتتارى مەن وتانىنا ورالىپ جاتقان جەرگىلىكتى تۇرعىندار بار. سۇرانىس جوعارى بولعاندىقتان بيلەت باعاسى ءۇش ەسە قىمباتتادى.

ازەر اللاحۆەرانوۆ، مەملەكەتتىك كوشى- قون ورتالىعى جانىنداعى قوعامدىق كەڭەستىڭ ءتوراعاسى:

- الدىن الا مالىمەت بويىنشا سوڭعى ءبىر اپتادا ەلگە ونداعان مىڭ ادام كەلدى. بيلەت تابا المايسىڭ. ءبىراق ماسكەۋدەن باكۋگە قىمبات باعامەن چارتەرلەر ۇيىمداستىراتىن كومپانيالار رەسەيدە بار ەكەنىن بىلەمىز. باعاسى بىرنەشە مىڭ ماناتقا دەيىن جەتۋى مۇمكىن.

بۇگىندە باكۋ كوشەلەرىنە شىقساڭىز، ورىس ءتىلدى كوپتەگەن تۋريست بىردەن كوزگە تۇسەدى. سالدارىنان جالدامالى پاتەرلەر دە قىمباتتادى. ءبىر اپتادا پاتەر جالداۋ اقىسى ەكى ەسە ءوستى.

ەلنۋر ازادوۆ، ريەلتورلار مەن قۇرىلىس كومپانيالار قاۋىمداستىعىنىڭ اتقارۋشى ديرەكتورى:

- تامىز ايىنىڭ سوڭىنان جانە وقۋ جىلى باستالعاننان كەيىن تۇتىنۋشىلار ادەتىنشە باعانىڭ وسۋىنە شاعىمدانا باستادى. ال ەڭ جوعارى سۇرانىس باكۋ قالاسىندا بولعاندىقتان، ۇسىنىس سانى ايتارلىقتاي ازايدى. رەسەيدە ءىشىنارا موبيليزاتسيا جاريالانعاننان كەيىن، سوڭعى 10 كۇندە سۇرانىس كۇرت ءوسىپ كەتتى. ولاردىڭ كوبى رەسەي ازاماتتارى.

سوڭعى ەكى اپتادا ازەربايجانعا رەسەيدەن 10 مىڭنان اسا ادام كەلدى. بۇل مەملەكەتتىك كوشى- قون قىزمەتىنىڭ مالىمەتى. ريەلتورلاردىڭ ايتۋىنشا، نەگىزىنەن داۋلەتتى ادامدار كەلىپ جاتىر. ولار ازەربايجاندا ۇزاق قالعىسى كەلمەيدى، كەيىن ەۋروپا ەلدەرىنە كوشۋدى كوزدەپ وتىر.

www.24.kz