قازاقستاندىق رەجيسسەر تايقازان تۋرالى مۋلتفيلم ءتۇسىرىپ جاتىر
4 قازان, 22:36

قازاقستاندىق رەجيسسەر تايقازان تۋرالى مۋلتفيلم ءتۇسىرىپ جاتىر

استانا. قازاقپارات - قازاقستاندىق رەجيسسەر - انيماتور قۋانىش ناعىز «تايقازان حيكاياسى» اتتى مۋلتفيلم ءتۇسىرىپ جاتىر.

وندا كيەلى تايقازاندى قايتارىپ الۋ ءۇشىن جولعا اتتانىپ، زۇلىم جاۋمەن شايقاستا قايسارلىق كورسەتكەن جاس باتىر تۋرالى باياندالادى، دەپ حابارلايدى قازاقپارات.

«2007-جىلى مەن «التىن جەبە» انيماتسيالىق فيلمدەر فەستيۆالىنە قاتىستىم، ول كەزدە ت. جۇرگەنوۆ اتىنداعى ق ا ز ۇ و ا ءۇشىنشى كۋرس ستۋدەنتى ەدىم. فەستيۆال شەڭبەرىندە بارلىق قوناقتارعا تۇركىستاندى ارالاتىپ، قوجا احمەت ياسساۋيدىڭ كەسەنەسىنە الىپ باردى. سول كەزدە كيەلى تايقازاندى العاش كورىپ، كەرەمەت اسەر الدىم. وسىدان شامامەن ەكى جىل بۇرىن تايقازان تۋرالى مۋلتفيلم ءتۇسىرۋدى ويلاپ، بارلىق دەرەكتەرمەن تانىسىپ شىقتىم. كەيىن سەناري جازىپ، وسى جازدا ۇلتتىق كينونى قولداۋ مەملەكەتتىك ورتالىعىنىڭ سەناريلەر بايقاۋىنا قاتىستىم»، - دەيدى رەجيسسەر قۋانىش ناعىز.

ايتا كەتسەك، بۇل جاس رەجيسسەردىڭ العاشقى جۇمىسى ەمەس. ول ءار جىلدارى «قازاق فيلم» كينوستۋدياسىندا « ء ۇش سىيلىق» جانە «مەنىڭ اتىم قوزى» سىندى باسقا دا انيماتسيالىق تۋىندىلاردى تۇسىرگەن.

رەجيسسەردىڭ ايتۋىنا قاراعاندا، «تايقازان حيكاياسى» - كومەديامەن ارالاس تۇسىرىلەتىن شىتىرمان وقيعالى مۋلتفيلم. سونىمەن قاتار، ول دايىندىق كەزەڭى بارىسىندا اۋقىمدى جۇمىستار اتقارىلعانىن، فيلمنىڭ نەگىزگى پەرسوناجدارى سالىنعانىن، سونداي-اق جوبانىڭ انيماتيگى (سىزبا نۇسقاسى) تۇسىرىلگەنىن حابارلادى.

بۇگىندە جاس مۋلتيپليكاتور نەگىزگى لوكاتسيالاردى سالىپ، كەيبىر ساحنالاردى قوزعالىسپەن كوركەمدەپ جاتىر. ءتۇسىرۋ جۇمىستارى قاراشا ايىندا اياقتالادى.


جاڭالىقتار