يندۋستريا ءمينيسترى قازاقستاندا تويوتا زاۋىتىن اشۋ مۇمكىندىگىنە قاتىستى پىكىر ءبىلدىردى
4 قازان, 20:56

يندۋستريا ءمينيسترى قازاقستاندا تويوتا زاۋىتىن اشۋ مۇمكىندىگىنە قاتىستى پىكىر ءبىلدىردى

استانا. قازاقپارات – ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ وتاندىق اۆتوونەركاسىپ نارىعىنداعى تاپشىلىق جونىندەگى سۇراققا جاۋاپ بەردى، دەپ حابارلايدى قازاقپارات ءتىلشىسى.

«ەلىمىزدە Toyota ەڭ تانىمال برەندتىڭ ءبىرى ەكەنى بەلگىلى. ءبىزدىڭ وندىرۋشىلەر ءتيىستى كەلىسسوزدەردى جۇرگىزىپ جاتىر، سەبەبى بيزنەس اراسىندا وسىنداي پروتسەستەر جۇرەتىنى تۇسىنىكتى. مەملەكەتتىك ورگاندارمەن بيزنەس-كورپوراتسيالار بۇل ماسەلەلەردى تالقىلامايدى. بۇل تۇرعىدا قاراجات سالۋ، وكىلەتتىك، كولىكتى وتكىزۋ نارىعىن قامتۋ سياقتى تاقىرىپتار پىسىقتالادى. سوندىقتان كەلىسسوزدەر ءجۇرىپ جاتىر. دەگەنمەن، بۇل باستامانى ناقتى جۇزەگە اسىرۋ مۇمكىندىگى تۋرالى ەشتەڭە ايتا المايمىن. ەگەر Toyota ءوندىرىسى بىزدە اشىلىپ جاتسا، بۇل ەلىمىزدەگى ەڭ تابىستى جوبالاردىڭ ءبىرى بولار ەدى»، - دەدى دەدى ق. وسكەنبايەۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

جاقىندا بۇقارالىق اقپارات قۇرالدارىندا Toyota رەسەيدەگى زاۋىتىن جاباتىنى تۋرالى مالىمەت تارادى. بۇل شەشىمگە اتالعان ەلدەگى جاعداي اسەر ەتىپ وتىر. وسىنىڭ سالدارىنان كومپانيا رەسەيدەگى زاۋاتقا بولشەكتەردى جەتكىزۋدە قيىندىقتارعا تاپ بولعان.

جاڭالىقتار