رەسەيلىكتەر قازاقستاننان كولىكتى جاپپاي ساتىپ الىپ جاتقانى راس پا
بۇگىن ورتالىق كوممۋنيكاتسيالار قىزمەتىندە تىلشىلەر مينيستردەن قازاقستانداعى اۆتوكولىكتەردى رەسەي مەن باسقا دا ەلدەرگە شىعارۋ نارىعىن قاداعالاۋ مۇمكىندىگىنە قاتىستى سۇراق قويىلدى.
«ەكونوميكا زاڭدىلىعى بويىنشا بارشا الەم ءونىمدى وتكىزۋ نارىعى ءۇشىن باسەكەگە تۇسەدى. ءونىمدى نەعۇرلىم كوبىرەك ساتساق، بۇل سالا جىلدامىراق دامي تۇسەدى. وسى ورايدا جاڭا جۇمىس ورىندارى قۇرىلادى. رەسەيلىكتەر ءبىزدىڭ كولىكتەردى جاپپاي ساتىپ الىپ جاتقانى جونىندە سونشالىقتى دۇربەلەڭدى كورىپ تۇرعانىمىز جوق. بۇل تۇرعىدا قازاقستان ازاماتتارى كولىكتەردى ساتىپ الىپ، كەيىننەن ونى قايتا وتكىزىپ جاتقانى تۋرالى اقپارات ءتۇسىپ جاتىر»، - دەدى ق. وسكەنبايەۆ.
ونىڭ ايتۋىنشا، جەڭىلدەتىلگەن پايىزى تومەن نەسيە بەرۋ باعدارلاماسى بويىنشا ساتىپ الىنعان اۆتوكولىكتەر شەتەلگە شىعارىلماۋى كەرەك. ول ءۇشىن مەملەكەت ناقتى ەل تۇرعىندارىنا باستاپقى جارناسىز ساتىپ الۋىنا مۇمكىندىك جاسادى.
سونىمەن قاتار مينيستر مەملەكەتتىك باعدارلامادان تىس وتكىزىلىپ جاتقان كولىكتەر بويىنشا ءوندىرىس كولەمىن ارتتىرۋ ماڭىزدى ەكەنىن ايتتى.
«ءبىزدىڭ ماشينالار الەمنىڭ بارلىق ەلىنە وتكىزىلۋىن ىنتالاندىرۋىمىز كەرەك. ءبىز ۇنەمى پروبلەمانى ءماجبۇرلى تۇردە شەشۋ جولدارىن ىزدەپ جاتامىز. ياعني بەلگىلى ءبىر شەكتەۋلەدى ەنگىزۋ ۇسىنىستارى جاسالىپ جاتادى. بۇل سالاداعى ماسەلەلەردى ەكونوميكالىق جولمەن شەشۋ كەرەك. ەلىمىزدەگى اۆتوونەركاسىپ ءوندىرىسىن كۇشەيتۋگە ءمان بەرگەن ءجون»، - دەدى ۆەدومستۆو باسشىسى.
ونىڭ سوزىنە قاراعاندا، تاياۋ كۇندەرى تاعى ءۇش-ءتورت زاۋىتتىڭ قۇرىلىسى باستالادى. بۇل رەتتە اۆتوكولىك بولشەكتەرىن ەلىمىزدە شىعارۋعا ەكپىن قويىلىپ وتىر.