قازاقستاندا باسپانانى جالعا بەرەتىن كومپانيالار قۇرىلۋى مۇمكىن

استانا. قازاقپارات - قازاقستاندا باسپانانى جالعا بەرەتىن جىلجىمايتىن مۇلىك قورلارىن قۇرۋ ۇسىنىسى جاسالدى.

بۇل كومپانيالاردىڭ اكسيالارىن العاندارعا ديۆيدەنت تۇرىندە تولەم اۋدارىلادى.

بۇل تۋرالى ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ايتتى، دەپ حابارلايدى قازاقپارات ءتىلشىسى.

جەكە سەكتورداعى جالعا بەرىلەتىن باسپانا نارىعى ءتيىستى تۇردە رەتتەلمەي جاتقانىنا توقتالعان ول: «بۇل قىزمەتتى اكىمشىلىك تۇردە رەتتەۋ قادامدارىنا قارسىمىن. وسى ورايدا ءوزىمىزدىڭ ۇسىنىستارىمىزدى دايارلاپ جاتىرمىز. ياعني جالعا بەرىلەتىن باسپانانىڭ جەكە نارىعىن قۇرىپ، بۇل سالاعا ينۆەستيتسيا تارتىلىپ، جالعا بەرۋدەن تۇراقتى تابىس الۋ جوسپارلانعان. بۇل تۇرعىدا بيزنەسپەن اينالىسپايتىن مەملەكەتتىك قىزمەتشىلەر، زەينەتكەرلەر، دارىگەرلەر، پەداگوگتەر اتالعان كومپانيانىڭ اكسياسىن ساتىپ الۋ قۇقىعىنا يە بولۋىن ۇسىنىپ وتىرمىز. وسى كاسىپورىن جىلجىمايتىن مۇلىككە قاراجات سالىپ، باسپانانى جالعا بەرۋدەن تولەم الىپ، اي سايىن نەمەسە ءار توقساندا ادامداردىڭ تابىسىن قامتاماسىز ەتۋى ءتيىس»، - دەدى.

اتاپ ايتقاندا، ادامدار وسىنداي كومپانيالارعا اقشا سالسا، بۇل قاراجات جىلجىمايتىن مۇلىككە ينۆەستيتسيا رەتىندە باعىتتالادى. باسپانا جالعا بەرىلەتىن جەكە قورعا قاراجات سالعاندار ءتيىستى سومادا تابىس الىپ تۇرادى.

«وسىنداي ەكونوميكالىق جولمەن سالاداعى ماسەلەنى شەشكىمىز كەلەدى. بۇل تۇرعىدا ءتيىستى وزگەرىستەردى ازىرلەپ جاتىرمىز. جەكە جالعا بەرىلەتىن باسپانا قورلارىن قۇرۋ تۋرالى وسى قادامدار يدەيا تۇرىندە ۇسىنىلىپ وتىر. ءدال قازىر ءبىز ايتقانداي جۇزەگە اسادى دەپ ايتۋ ەرتەرەك، سەبەبى بۇل يدەيانى ارىپتەستەرىمىز قولداماۋى مۇمكىن. جوبا اياسىندا نورماتيۆتىك-قۇقىقتىق قۇجاتتار دايارلانىپ جاتىر. بۇل ۇسىنىستار ءماجىلىستىڭ قاراۋىنا ەنگىزىلۋى كەرەك»، - دەدى ۆەدومستۆو باسشىسى.