بايقوڭىردى جالعا بەرۋ قۇنى قىمباتتاي ما - مينيستر جاۋابى

استانا. قازاقپارات - سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين بايقوڭىردى جالعا الۋ شارتىن قايتا قاراۋ جانە ينفلياتسياعا بايلانىستى تاريفتەردى كوتەرۋ مۇمكىندىگى تۋرالى سۇراقتارعا جاۋاپ بەردى، دەپ حابارلايدى قازاقپارات ءتىلشىسى.

«قازىرگى ۋاقىتتا مۇنداي ماسەلە كۇن تارتىبىندە تۇرعان جوق. ءبىز بايقوڭىردى جالعا بەرگەنىمىز ءۇشىن شامامەن 100 ميلليون دوللار الامىز. بۇل كەلىسىم ماعان دەيىن ونداعان جىلدار بۇرىن جاسالعان، سوندىقتان مەن وسى كەلىسىمدى ۇستانامىن»، - دەدى ب. مۋسين ۇكىمەت كۋلۋارىندا تىلشىلەرگە بەرگەن سۇحباتىندا.

مينيستر نەلىكتەن وسىنداي قۇن بەكىتىلگەنىن ءتۇسىندىردى.

«بىرىنشىدەن، باعا دوللارعا بايلانعان. ەكىنشىدەن، بايقوڭىردان ۇشىرىلىمدار سانى ازايىپ كەلەدى. سوندىقتان، ولار كوبىرەك زىمىران ۇشىرسا، جالداۋ قۇنىن قاراۋ ماسەلەسى تۋىنداۋى مۇمكىن. ءبىراق ۇشىرۋ سانى ازايعاندىقتان، جالداۋ قۇنىن ارتتىرۋ قيسىنسىز»، - دەدى مينيستر.