ساپاسىز اۆتومەكتەپتەردىڭ جاۋاپكەرشىلىگى قارالۋى قاجەت - پرەمەر- مينيستر

استانا. قازاقپارات - ەلدەگى اۆتومەكتەپتەردىڭ جۇمىس ساپاسى كۇماندى، جەتىلدىرىلۋى كەرەك تۇستارى بار.

پرەمەر- مينيستر ءاليحان سمايىلوۆ جول اپاتتارىنا قاتىستى وسى جانە باسقا دا ماسەلەلەر توڭىرەگىندە اكىمدىكتەر مەن ءتيىستى سالا باسشىلارىنا تاپسىرمالار بەردى، دەپ حابارلايدى قازاقپارات ءتىلشىسى.

«جۇرگىزۋشىلەردى دايارلاۋ ساپاسى كۇمان تۋدىرادى. ءبىرىنشى كەزەكتە اۆتومەكتەپتەر جۇمىسىنداعى تاسىلدەردى وزگەرتۋ قاجەت. بۇگىندە ولاردى باقىلاپ جاتقان ەشكىم جوق، ليسەنزيا بەرىلمەيدى. كولىك جۇرگىزۋگە ارنالعان اۆتودرومدار جەتكىلىكسىز. اكىمدىكتەر بۇل ماسەلەنى بيزنەسپەن بىرگە قاراۋى ءتيىس»، - دەدى ءا. سمايىلوۆ ۇكىمەتتىڭ بۇگىنگى وتىرىسىندا.

سونداي- اق، پرەمەر- مينيستر مەكتەپتەردە بالالارعا جول ءجۇرۋ ەرەجەسى وقىتىلمايتىنىن، اۆتوكولىكتەردى تەحنيكالىق تەكسەرۋ ساپاسىنا قاتىستى دا سۇراقتار كوپ ەكەنىن اتاپ ءوتتى. سونىمەن بىرگە، كولىك اپاتتارىنىڭ نەگىزگى سەبەپتەرى - جولداردىڭ ناشارلىعى ەكەنىنە توقتالدى.

«حالىق تاراپىنان جولدىڭ ساپاسىنا قاتىستى شاعىم وتە كوپ. 26-قىركۇيەكتە اقتوبەدە تۇرعىندار اينالما جولدى جاۋىپ تاستادى. سەبەبى، ول جولدا نە جارىق جوق، نە جاياۋ جۇرگىنشى وتەتىن جەر، نە قاۋىپسىزدىك ەلەمەنتتەرى جوق. مۇنىڭ ءبارى جول اپاتىنا الىپ كەلەدى. جول قاۋىپسىزدىگى سالاسىندا بەينەكامەرالار مەن باسقا دا تەحنيكالىق باقىلاۋ قۇرالدارى جەتكىلىكسىز. رەسپۋبليكالىق ماڭىزى بار اۆتوجولداردا بەينەباقىلاۋ جۇيەسى تەك اقمولا وبلىسىندا عانا بار. ءبىزدىڭ باستى مىندەتىمىز - جول قاۋىپسىزدىگى، جول اپاتتارى مەن ودان قازا بولۋ جاعدايلارىن ازايتۋ بويىنشا كەشەندى شەشىمدەر قابىلداۋ»، - دەدى پرەمەر- مينيستر.

ۇكىمەت باسشىسى ىشكى ىستەر مينيسترلىگىنە مۇددەلى مەملەكەتتىك ورگاندارمەن جانە اكىمدىكتەرمەن بىرلەسىپ، جول اپاتتارىنىڭ كوبەيۋىنە قاتىستى جان- جاقتى تالداۋ جۇرگىزۋدى تاپسىردى.

«جول اپاتتارى ءجيى بولاتىن ۋچاسكەلەردەگى قوزعالىستى قاداعالاۋ جۇمىستارىن كۇشەيتۋ قاجەت. ءتيىستى ءىس- شارالاردى ازىرلەپ، ونى دايىندالىپ جاتقان قوعامدىق قاۋىپسىزدىكتى قامتاماسىز ەتۋ جونىندەگى تۇجىرىمداماعا ەنگىزۋ كەرەك.

اكىمدىكتەر قاۋىپسىز جول ينفراقۇرىلىمىن جاساۋ بويىنشا قوسىمشا شارالار قابىلداسىن. جولداعى كامەرالاردى كوبەيتۋ قاجەت.

يندۋستريا مينيسترلىگى كولىكتى تەحنيكالىق تەكسەرۋ ساپاسىن ءتيىمدى باقىلاۋ تەتىگىن جاساسىن. ەڭ باستىسى - جولداردىڭ جاي- كۇيىن باقىلاۋدى كۇشەيتۋ بويىنشا شارا قابىلداۋ.

ادىلەت جانە ىشكى ىستەر مينيسترلىكتەرى ساپاسىز جۇرگىزۋشىلەردى دايارلايتىن اۆتومەكتەپتەردىڭ جاۋاپكەرشىلىگى ماسەلەسىن قاراستىرسىن. جول ءجۇرۋ ەرەجەلەرىن ءجيى بۇزاتىن ادامدارعا جازانى كۇشەيتۋ قاجەت.

ىشكى ىستەر، وقۋ- اعارتۋ، اقپارات مينيسترلىكتەرى مەن اكىمدىكتەرگە جول قاۋىپسىزدىگىن ساقتاۋ بويىنشا اقپاراتتىق- ءتۇسىندىرۋ جۇمىسىن ۇيىمداستىرۋدى تاپسىرامىن»، - دەدى ءاليحان سمايىلوۆ.

بۇعان دەيىن حابارلاعانىمىزداي، قازاقستاندا جول اپاتتارىنىڭ سانى %14 كە، قازا تاپقاندار سانى %18 كە كوبەيدى.