حاركوۆتا ەكى ءىرى جارىلىس بولدى. ۋكرايناداعى احۋال قانداي؟

استانا. قازاقپارات - كەيىنگى تاۋلىكتە حاركوۆتا جارىلىس بولدى. سونداي-اق، زاپوروجە اتوم ەلەكتر ستانتسياسىنىڭ ديرەكتورى رەسەي تۇتقىنىنان بوساتىلدى.

Massaget.kz ءتىلشىسى ۋكراينادا بولعان كەيىنگى ماڭىزدى وقيعالارعا شولۋ جاسادى.

حاركوۆ ورتالىعىندا جارىلىس بولدى

حاركوۆتىڭ ورتالىق اۋداندارىندا 4- قازانعا قاراعان ءتۇنى ەكى ۇلكەن جارىلىس بولدى. وقيعا ورنىندا ءورت باستالعان. بۇل اقپاراتتى وبلىستىق كەڭەس باسشىسىنىڭ كەڭەسشىسى ناتاليا پوپوۆا راستادى.

رەسەي اسكەري كۇشتەرى حاركوۆتىڭ حولودنوگورسك جانە نوۆوبۋراس اۋداندارىنا وق جاۋدىرعان. بۇل تۋرالى قالا مەرى يگور تەرەحوۆ تە ايتقان. ونەركاسىپ جانە ينفراقۇرىلىم نىساندارعا سوققى تيگەن. بيلىك وكىلدەرى زارداپ شەككەندەر مەن قانداي نىساندار بۇلىنگەنى تۋرالى اقپاراتتى ناقتىلاپ جاتىر.

ۋكراينا اسكەرى بىرنەشە ەلدى مەكەندى بوساتتى - زەلەنسكي

ۋكراينا اسكەرى وتكەن تاۋلىكتە تاعى بىرنەشە ەلدى مەكەندى بوساتقان. بۇل تۋرالى ۆلاديمير زەلەنسكي بەينەۇندەۋىندە ايتتى. ۋكراينا پرەزيدەنتىنىڭ ايتۋىنشا، ۋ ق ك- ءنىڭ قارسى شابۋىلى ناتيجەسىندە حاركوۆ وبلىسىندا 450 دەن اسا قالا، كەنت پەن اۋىل بوساتىلعان. ءبىراق ول ناقتى ەلدى مەكەندەردى اتاماعان ءارى قانداي وبلىستار تۋرالى ايتىپ وتىرعانىن تۇسىندىرمەگەن.

ا ق ش ۋكرايناعا جاڭا HIMARS پارتياسىن جىبەرەدى – ب ا ق

ۆاشينگتون كيەۆكە 625 ميلليون دوللار تۇراتىن جاڭا اسكەري كومەك پاكەتىن دايىنداعان، وعان ءتورت HIMARS زىمىران كەشەنى كىرەدى. بۇل تۋرالى Reuters حابارلادى.

«بايدەن اكىمشىلىگىنىڭ ۋكراينانىڭ قاۋىپسىزدىگىنە كومەكتەسەتىن كەلەسى پاكەتىنە HIMARS جوعارى موبيلدى ارتيللەريالىق زىمىران جۇيەسىنىڭ ءتورت ۇشىرۋ قوندىرعىسى، وق-دارىلەر، مينالار جانە ميناعا قارسى ماشينالار كىرەدى»، - دەلىنگەن باسىلىم دەرەككوزدەرىندە.

زاپوروجە اتوم ەلەكتر ستانتسياسىنىڭ ديرەكتورى بوساتىلدى – ا ە ج ح ا

زاپوروجە اتوم ەلەكتر ستانتسياسىنىڭ ديرەكتورى يگور مۋراشوۆ رەسەيلىك باسقىنشىلار ۇرلاپ اكەتكەننەن كەيىن بوساتىلدى. بۇل تۋرالى حالىقارالىق اتوم ەنەرگياسى اگەنتتىگىنىڭ باسشىسى رافاەل گروسسي Twitter- دە حابارلادى.

«ۋكراينانىڭ زاپوروجە اتوم ەلەكتر ستانتسياسىنىڭ باس ديرەكتورى يگور مۋراشوۆتىڭ بوساتىلۋىن قۇپتايمىن. مۋراشوۆ وتباسىنا امان-ەسەن ورالعانىن ءبىلدىم»، - دەپ جازدى گروسسي.

ايتا كەتەيىك، 1- قازاندا زاپوروجە اتوم ەلەكتر ستانتسياسىنىڭ باس ديرەكتورى يگور مۋراشوۆتى رەسەي پاترۋلى ۇستاعانى بەلگىلى بولعان ەدى.

ۋكراينا بەلارۋس شەكاراسىندا اسكەري جاتتىعۋلار وتكىزدى

ۋكراينانىڭ ىشكى ىستەر مينيسترلىگى بەلارۋس تاراپىنان ءتونۋى مۇمكىن قاۋىپتەرگە دايىندىق اياسىندا ۋكراينانىڭ سولتۇستىك ايماقتارىندا ۋكراينا قارۋلى كۇشتەرىنىڭ، ۇلتتىق گۆارديا مەن ۋكراينانىڭ مەملەكەتتىك شەكارا قىزمەتىنىڭ بىرلەسكەن جاتتىعۋلارى جالعاسىپ جاتقانىن حابارلادى.

ە و ۋكرايناعا 5 ميلليارد ەۋرو بولەدى

ەۋرووداق ۋكرايناعا ماكروقارجىلىق كومەك رەتىندە 5 ميلليارد ەۋرو بەرەدى. بۇل تۋرالى ەۋروكوميسسيا باسشىسىنىڭ ءبىرىنشى ورىنباسارى ۆالديس دومبروۆسكيس مالىمدەدى. ول ءوزارا تۇسىنىستىك تۋرالى مەموراندۋمعا قول قويدى.

ونىڭ ايتۋىنشا، كيەۆكە قاراجاتتىڭ ءبىر بولىگى قازاننىڭ ورتاسىندا جۇمسالادى، قالعان اقشانى كيەۆ جىل سوڭىنا دەيىن الادى. ەۋروكوميسسيا ۇسىناتىن كومەك جالاقى مەن زەينەتاقى تولەۋگە ارنالعان.