مارات احمەتجانوۆ «قورعاۋ» قۇرالىنىڭ «سەرگەكتەن» ايىرماشىلىعىن اتادى

استانا. قازاقپارات – ق ر ىشكى ىستەر ءمينيسترى مارات احمەتجانوۆ «قورعاۋ» قۇرالىنىڭ «سەرگەك» جۇيەسىنەن ايىرماشىلىعىن اتادى، دەپ حابارلايدى قازاقپارات ءتىلشىسى.

«قورعاۋ» قۇرالىنىڭ «سەرگەكتەن» ايىرماشىلىعى قانداي؟ ەلدىڭ قاي ايماقتارىندا ەنگىزىلەدى؟»، - دەپ سۇرادى جۋرناليست مينيستردەن ۇكىمەت كۋلۋارىندا.

مارات احمەتجانوۆتىڭ ايتۋىنشا، «قورعاۋ» - «سەرگەك» جۇيەسىنىڭ قۇرامداس قۇرالى.

«قورعاۋ» دەگەن «سەرگەكتىڭ» ءبىر قۇرالى. ول قۇرال جەكە ەنگىزىلمەيدى. بۇل الدىن الا توسقاۋىل قويۋ قۇرالى دەسە بولادى. مىسالى، جالعان نومىرمەن كەلە جاتساڭىز، نە بولماسا «قاۋىپتى جۇرگىزۋشى» دەگەن ۇعىم بار. ياعني، ساعاتىنا 120 شاقىرىم جىلدامدىقپەن كەلە جاتقان جۇرگىزۋشىنى «سەرگەك» اۆتوماتتى تۇردە «قاۋىپتى جۇرگىزۋشى» دەپ بەلگى بەرەدى. سول بەلگى بويىنشا الگى راديۋستا تۇرعان پاترۋلدەردىڭ پلانشەتتەرىنە «ءسىزدىڭ باعىتىڭىزدا وسىنداي اتۆوكولىك كەلە جاتىر» دەگەن سيگنال تۇسەدى. پاترۋل سونداي كولىكتەردى توقتاتادى. پاترۋل توقتاتىپ، ونىڭ نەگە جوعارى جىلدامدىقپەن كەلە جاتقانىن انىقتايدى. ءار ءتۇرلى جاعداي بولۋى مۇمكىن. جاي ءبىر جەردەن اسىعىس كەلە جاتۋى مۇمكىن. نە بولماسا ماس كۇيىندە، ناشاعا ماس بولىپ ايداپ كەلە جاتقان بولۋى مۇمكىن. ءتىپتى ۇرلاپ اكەتكەن كولىك بولۋى مۇمكىن. سوندىقتان «قورعاۋ» قۇرالدارىن التى قالادا ورناتۋعا تەحنيكالىق مۇمكىنىگىمىز بار»، - دەدى مينيستر.

ونىڭ سوزىنە قاراعاندا، اتالعان قۇرال جۇرگىزۋشىلەردىڭ پاترۋلدىك پوليتسيا وكىلدەرىنە پارا ۇسىنۋىن ازايتۋعا ءتيىس.

«قۇرال جالعان نومىرمەن جۇرگەن، ايىپپۇلدارىن تولەمەي جۇرگەن كولىكتەردى قالىڭ كولىكتىڭ اراسىنان ءوزى تاڭداپ، كورسەتىپ، رادۋيستا تۇرعان پاترۋلدىڭ پلانشەتىنە، ءبىزدىڭ ورتالىققا جىبەرىپ وتىرادى. ونىڭ ءبىر تيىمدىلىگى، جەمقورلىققا جول بەرمەيدى. ويتكەنى «قورعاۋ» ارقىلى پاترۋلگە بەرىلگەن مالىمەت بار، ۇستاعان پاترۋلدىڭ قانداي شارا قولدانعانى ەلەكتروندى تۇردە تىركەلگەن بولۋى كەرەك»، - دەدى ىشكى ىستەر ءمينيسترى.