جانىبەك ءالىمحان ۇلى كەلەسى جەكپە-جەگىنە قاتىستى مالىمدەمە جاسادى
4 قازان, 18:12

جانىبەك ءالىمحان ۇلى كەلەسى جەكپە-جەگىنە قاتىستى مالىمدەمە جاسادى

استانا. قازاقپارات - دۇنيەجۇزىلىك بوكس ۇيىمىنىڭ (WBO) ورتا سالماق ساناتىنداعى چەمپيونى جانىبەك ءالىمحان ۇلى (12-0، 8 ك و) كەزەكتى جەكپە-جەگىنە قاتىستى مالىمدەمە جاسادى، دەپ حابارلايدى قازاقپارات.

«كوپتەگەن بوكسشىلار جان-جاققا قاشقان كەزدە، شاقىرۋدى قابىل العانى ءۇشىن دەنزەل بەنتليگە العىس ايتامىن. لاس-ۆەگاستاعى The Palms-تا الەم چەمپيونى اتاعىن قورعاۋ مەن ءۇشىن ۇلكەن قۇرمەت جانە الەمگە «قازاق ستيلى» نە ەكەنىن تاعى ءبىر رەت كورسەتەتىن بولامىن»، - دەپ كەلتىرىلگەن ءالىمحان ۇلىنىڭ ءسوزى ۆكونتاكتە الەۋمەتتىك جەلىسىندەگى «قازاقستاننىڭ كاسىپقوي بوكسى» پاراقشاسىندا.

سونداي-اق قازاقستاندىق بوكسشى Instagram-داعى جەكە پاراقشاسىندا: «ۆەگاستا كورىسكەنشە! كوزىلدىرىك تاعىپ كەل، سەبەبى مەن رينگتە جارقىرايتىن بولامىن. Qazaq Style «، - دەگەن جازبا ورنالاستىردى.

ايتا كەتەيىك، كەشە Top Rank پروموۋتەرلىك كومپانياسى ج. ءالىمحان ۇلى - د. بەنتلي (17-1-1، 14 كو) جەكپە-جەگىن رەسمي تۇردە جاريالاعان بولاتىن. «سەنبى، 12- قاراشا كۇنى Palms-تەگى تۋرنيردە الەم چەمپيونى اتاعى ءۇشىن ەكى جەكپە-جەك وتەدى»، - دەپ جازدى Top Rank Instagram-دا.

ەسكە سالايىق، جانىبەك ءالىمحان ۇلى بيىلعى 22- مامىردا بريتانيالىق دەنني ديگنۋمدى (14-0-1، 8 ك و) ەكىنشى راۋندتا نوكاۋتقا ءتۇسىرىپ، WBO نۇسقاسى بويىنشا ورتا سالماقتا «ۋاقىتشا» چەمپيون اتانعان ەدى.

كەيىن امەريكا بوكسشىسى دەمەتريۋس اندرادە ج. الىمحان ۇلىمەن مىندەتتى جەكپە-جەكتەن باس تارتتى. وسىعان بايلانىستى، قازاقستاندىق بوكسشىعا «ۋاقىتشا» چەمپيوننان ورتا سالماقتاعى WBO نۇسقاسى بويىنشا تولىق قۇقىلى الەم چەمپيونى مارتەبەسى بەرىلدى.

قازاقستاندىق بوكسشىنى ق ر پرەزيدەنتى قاسىم-جومارت توقايەۆ قۇتتىقتادى.

جاڭالىقتار