اتىراۋ وبلىسىندا رەسەيمەن شەكاراداعى اۋىلدار اتاۋى وزگەردى
بوكەي حان اتاۋى اتىراۋ وبلىسىنىڭ قۇرمانعازى اۋدانىندا بايدا اۋىلدىق وكرۋگى مەن كوتيايەۆ اۋىلىنا بەرىلىپ وتىر.
ەندى وبلىستىق ءماسليحاتتىڭ شەشىمىمەن بايدا اۋىلدىق وكۋرگى بوكەيحان اۋىلدىق وكرۋگىنە، بايدا اۋىلدىق وكرۋگىنىڭ كوتيايەۆكا اۋىلى بوكەيحان اۋىلى بولىپ وزگەردى.
رەسەيمەن شەكارالاس قۇرمانعازى اۋدانىنداعى اۋىلدىق وكرۋگتىڭ اكىمى ءجۇسىپ تورەعاليەۆتىڭ ايتۋىنشا، بۇل ماسەلە تۇرعىندار جيىنىندا قوزعالعان.
«ەكى ەلدىڭ شەكاراسىنداعى اۋىلىمىز كوتيايەۆ اتالاتىن ەدى. اۋىل اتاۋىن وزگەرتۋ ماسەلەسى تۇرعىندار اراسىندا كوپتەن بەرى كوتەرىلىپ كەلەدى. ءبىراق، بۇل - بۇگىنگە دەيىن شەشىمىن تاپپاعان ماسەلەنىڭ ءبىرى. اۋىل مەن وكرۋگتىڭ اتاۋىن وزگەرتۋ ماسەلەسى قوزعالعان جيىندا ارداگەرلەر، قوعامدىق كەڭەس مۇشەلەرى مەن تۇرعىنداردان ەكى ۇسىنىس ءتۇستى»، - دەيدى ءجۇسىپ تورەعاليەۆ.
ونىڭ ءبىرىنشىسى - كوتيايەۆ اتاۋىن بوكەي حان دەپ وزگەرتىپ، وكرۋگتىڭ اتاۋىن بۇرىنعىشا قالدىرۋ. ال، ەكىنشى ۇسىنىستا وكرۋگكە دە، اۋىلعا دا قازاقتىڭ بىرتۋار تۇلعاسى بوكەي حاننىڭ اتىن بەرۋ ايتىلعان.
اتىراۋ وبلىستىق ءماسليحاتىنىڭ دەپۋتاتتارى اۋىل تۇرعىندارىنىڭ ءبىرىنشى ۇسىنىسىنا قولداۋ ءبىلدىردى. ءسويتىپ، وكرۋگكە دە، اۋىلعا دا بوكەي حان اتاۋىن بەرۋگە شەشىم قابىلدادى.
سونداي- اق، اتالعان اۋدانداعى تەڭىز اۋىلدىق وكرۋگىنىڭ پريمورە اۋىلى تەڭىز اۋىلى بولىپ قايتا اتالاتىن بولدى. ال، اتىراۋ قالاسىنا تاياۋ ورنالاسقان اقساي سەلولىق وكرۋگى تاراتىلىپ، قايىرشاقتى سەلولىق وكرۋگىنە قوسىلاتىن بولدى.
اۆتور
بەك مۇستافا