باتىس قازاقستان وبلىسىندا شەكاراداعى جاعداي تۇراقتالدى
3 قازان, 21:31

باتىس قازاقستان وبلىسىندا شەكاراداعى جاعداي تۇراقتالدى

ورال. قازاقپارات - باتىس قازاقستان وبلىسىندا رەسەيمەن شەكاراداعى جاعداي تۇراقتالدى.

بۇل تۋرالى وبلىس اكىمى عالي ەسقاليەۆتىڭ توراعالىعىمەن وتكەن شەكارا ماسەلەلەرى جونىندەگى ۇيلەستىرۋ كەڭەسىنىڭ وتىرىسىندا ايتىلدى، دەپ حابارلايدى قازاقپارات ءتىلشىسى.

ق ر ۇ ق ك شەكارا قىزمەتى دەپارتامەنتىنىڭ باستىعى باۋىرجان رىسبەكوۆ قازىرگى تاڭدا شەكارا بەكەتتەرىندە احۋالدىڭ دۇرىستالعانىن، تۇيتكىلدى ماسەلە جوقتىعىن جەتكىزدى.

ب ق و پوليتسيا دەپارتامەنتى باستىعىنىڭ ءبىرىنشى ورىنباسارى جانبولات ءجانشيننىڭ ايتۋىنشا، 21-قىركۇيەكتەن بەرى ءوڭىر اۋماعىنا وتكىزۋ بەكەتتەرى ارقىلى 54 مىڭنان استام رەسەيلىك ازامات كىرسە، سونىڭ 42 مىڭى - 18-55 جاس ارالىعىنداعى ەر ادامدار. كەلگەندەردىڭ ىشىنەن 17 مىڭى رەسمي تىركەلسە، 7296 سى حالىققا قىزمەت كورسەتۋ ورتالىعىنا جسن الۋ جونىندە ءوتىنىش بەرگەن.

ج. ءجانشيننىڭ سوزىنە قاراعاندا، شەتەلدىك ازاماتتاردى قابىلداۋعا بايلانىستى زاڭنامانى بۇزعان 70 قازاقستاندىققا قاتىستى ق ر اكىمشىلىك قۇقىق بۇزۋشىلىق تۋرالى كودەكسىنىڭ 518-بابىنا سايكەس اكىمشىلىك حاتتاما تولتىرىلدى.

سونداي- اق، ورال قالاسىندا رەسەيلىكتەردىڭ قاتىسۋىمەن ءۇش قىلمىس جانە ءبىر ۇساق بۇزاقىلىق تىركەلدى. سونىڭ ىشىندە تۇنگى كلۋب جانىنداعى توبەلەسكە قاتىسقان ءتورت رەسەيلىك ۇستالدى. ولار بەس تاۋلىككە قامالعان بولاتىن. ورال قالاسىنىڭ مامانداندىرىلعان اكىمشىلىك سوتى «شەتەلدىكتەردىڭ قۇقىقتىق جاعدايى تۋرالى» ق ر زاڭىنىڭ 28-بابىنىڭ نەگىزىندە ق ر زاڭناماسىن بۇزعانى ءۇشىن وقيعانىڭ بارلىق قاتىسۋشىلارىن رەسپۋبليكا اۋماعىنان شىعارۋ تۋرالى شەشىم قابىلدادى.

وبلىس اكىمى ع. ەسقاليەۆ ءمالىم ەتكەنىندەي، وڭىرگە كەيىنگى ەكى اپتادا رەسەيدەن كەلگەندەردىڭ 13 مىڭى بىردەن كەتىپ قالعان. ولار باسقا ايماقتارعا، سونىمەن قاتار شەت ەلدەرگە اتتانعان.

«ءبىز قالعان ادامداردىڭ كىم ەكەندىگىن تولىق انىقتاۋىمىز كەرەك. ولاردىڭ اراسىندا قىلمىسقا قاتىسى بارلارى بولۋى مۇمكىن. ەگەر جوعارى بىلىكتى ماماندار بولسا، بوس ورىندارعا جۇمىسقا قابىلداۋ ماسەلەسى قاراستىرىلادى. الايدا، ءبىز ولارعا ەرەكشە جاعداي جاسامايمىز. الەۋمەتتىك جەلىدە ءبىز رەسەيلىكتەرگە ارنايى جۇمىس ورىندارىن اشىپ جاتقانداي اڭگىمە ايتىلىپ جاتىر. بۇل ولاي ەمەس. بوس ورىن بولسا، وعان ۇلتىنا قاراماستان، كەز كەلگەن ادام ورنالاسا الادى. وسى كۇندەرى مەملەكەتتىك جانە قۇقىق قورعاۋ ورگاندارىمەن قاتار ەرىكتىلەر، كاسىپكەرلەر، باسقا دا ازاماتتار تىنىشتىقتىڭ ساقتالۋىنا ۇلەس قوستى. وكىنىشكە قاراي، اردى ويلاماي، پايدا كوزدەپ، باتىس قازاقستاندىقتاردى پاتەردەن شىعارىپ، ونى رەسەيلىكتەرگە بەرگەندەر دە بولدى. سول سەكىلدى كەيبىر تاكسي جۇرگىزۋشىلەرى باعانى الدەنەشە ەسە ءوسىرىپ، كوپ اقشا قارماپ قالۋعا تىرىستى. ءتىپتى، ولار بيلىك وكىلدەرىنىڭ زاڭدى تالاپتارىنا باعىنعىسى كەلمەدى. الداعى ۋاقىتتا پاتەرىن زاڭسىز جالعا بەرۋشىلەرگە 140 مىڭ تەڭگەگە دەيىن ايىپپۇل سالىناتىن بولادى. تاكسي جۇرگىزۋشىلەرىنىڭ قىزمەتىن باقىلاۋ دا كۇشەيتىلەدى»، - دەپ تۇيىندەدى كەڭەستى عالي ەسقاليەۆ.

ەسكە سالا كەتەيىك، بۇدان بۇرىن ب ق و اكىمىنىڭ شەكارادا قالىپتاسقان احۋالعا بايلانىستى جيىن وتكىزگەنىن جازعان بولاتىنبىز.

جاڭالىقتار