تۇركىستاندا پوليسيادان قاشقان كولىك جۇرگىزۋشىسى مەرت بولدى

تۇركىستان. قازاقپارات - تۇركىستان وبلىسىندا بىرنەشە كولىك سوقتىعىسقان جول اپاتى بويىنشا تەرگەۋ ءجۇرىپ جاتىر، - دەپ حابارلايدى قازاقپارات ءتىلشىسى.

وقيعا 28-قىركۇيەك كۇنى تولەبي اۋدانى كوكسايەك اۋىلىندا بولعان. ۆاز-2103، Audi 100, Mazda 626 كولىكتەرى سوقتىعىسىپ، ءبىر ادام كوز جۇمدى.

تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى تاراتقان مالىمەتكە سۇيەنسەك، تولەبي اۋداندىق پوليتسيا ءبولىمىنىڭ ءتارتىپ ساقشىلارى ءجۇرىسى كۇدىك تۋدىرعان كولىكتى توقتاتپاقشى بولعان. ال، كولىك يەسى ودان سايىن جىلدامدىقتى اسىرىپ، قاشا جونەلگەن. سودان قاشقان اۆتوكولىك باسقا دا كولىكتەرگە سوقتىعىسقان. جول اپاتى سالدارىنان ۆاز 2103 كولىگىنىڭ جۇرگىزۋشىسى وقيعا ورنىندا مەرت بولىپ، ونىڭ جولاۋشىسى مەن Audi 100 اۆتوكولىگىنىڭ جۇرگىزۋشىسى ءتۇرلى دەنە جاراقاتتارىمەن اۋرۋحاناعا ءتۇستى.

«وقيعا ورنىنا تولەبي اپب- نىڭ باسشىلىعى مەن پروكۋرورلار، جەدەل- تەرگەۋ توبى شىقتى. اتالعان جايت تولەبي اپب- عا ق ر ق ك- ءنىڭ 345-بابىنىڭ 3-بولىگىمەن تىركەلدى. سول كۇنى قاجەتتى ءبىرقاتار ساراپتامالار تاعايىندالدى. ال قايتىس بولعان جۇرگىزۋشىنىڭ تۋىستارى جول اپاتى بويىنشا پوليتسيا قىزمەتكەرلەرىنىڭ ۇستىنەن ارىزداندى. ولاردىڭ شاعىمى بىردەن تىركەۋگە الىنىپ، تۇركىستان وبلىسى پوليتسيا دەپارتامەنتىنىڭ وزىندىك قاۋىپسىزدىك باسقارماسى قىزمەتتىك تەرگەۋ جۇرگىزىپ جاتىر» - دەلىنگەن تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى تاراتقان حابارلامادا.

قازىرگى تاڭدا جول اپاتىنىڭ سەبەپ- سالدارى مەن ءمان- جايىن انىقتاۋعا قاتىستى جان- جاقتى تەرگەۋ امالدارى جۇرگىزىلۋدە. ساراپتاما ناتيجەسى دە كۇتىلىپ وتىر. زاڭعا سايكەس ساراپتاما قورىتىندىسىمەن ناقتى پروتسەسسۋالدىق شەشىم قابىلداناتىن بولادى. اتالعان ءىستى تۇركىستان وبلىسى پوليتسيا دەپارتامەنتىنىڭ باستىعى جەكە باقىلاۋىنا العان.