اتىراۋ وبلىسىندا الىپ ادام تۇرادى

استانا. قازاقپارات - اتىراۋ وبلىسى يندەر اۋدانى قۇرىلىس اۋىلىندا الىپ ادام ءومىر سۇرەدى. ونىڭ ەسىمى - پاراسات نۇرعاليەۆ.

الىپ ادامنىڭ بويى 2 مەتر 15 سانتيمەتر بولسا، سالماعى 150 كەلى، ال اياق كيىمىنىڭ ولشەمى - 56. « اق جايىق» باسىلىمى الىپ اداممەن كەزدەسىپ، سۇحباتتاسىپ قايتقان، - دەپ حابارلايدى ءتىلشىسى.

الىپ ادام - پاراساتقا ساي كيىم تابۋ قيىن. پاراساتقا كيىمدى ارنايى تىگىنشى - تۋىسى تىگىپ بەرەدى ەكەن. ال اياق كيىم تابۋ راسىندا وتە قيىن. الىپ ادامنىڭ اياعىنا ساي جالعىز اياق كيىم - رەزينا اياق كيىمدەر. ءبىراق جاڭبىر جاۋعان كۇنى جانە ايازدا سىرتقا شىعا الماي قالادى. سوندىقتان بايعالي وتەمانوۆ باستاعان اۋىل تۇرعىندارى الىپ ادامعا اياق كيىم تىگىپ بەرۋگە شەشكەن.

«قاجىمۇقاننىڭ اياعىنىڭ ولشەرى 54 بولعان. ال پاراساتتىڭ اياعىنىڭ ولشەمى - 56. تاپسىرىسقا اياق كيىم تىگەتىن جەردى ۇزاق ىزدەدىم. كوپتەگەن شەبەرمەن سويلەستىم، ءبىراق اياق كيىمىنىڭ ولشەمىن ەستىگەندە باس تارتادى. استانالىق تىگىنشىلەر پاراساتتىڭ ءوزى كەلگەن جاعدايدا عانا تىگىپ بەرەتىنىن ايتتى. ءبىراق استاناعا جەتۋ ءۇشىن دە اياق كيىم كەرەك قوي. ەكسكليۋزيۆ تاپسىرىستى ورىنداۋعا الماتىلىق شەبەر ۆالەري ۆورونين عانا كەلىستى. (.. .) شەبەردە 56- ولشەمنىڭ ۇلگىسى بولمادى، سوندىقتان 52 -ولشەمدى ۇزارتىپ، تاپسىرىستى 20 كۇننىڭ ىشىندە جاساپ بەردى»، - دەيدى بايعالي وتەمانوۆ.

پاراسات اياق كيىمدى كورە سالا قۋانىپ كەتكەن.

«مۇنداي اياق كيىمدى سوڭعى رەت قاشان كيگەنىم دە ەسىمدە جوق»، - دەيدى الىپ ادام.

اۋىل تۇرعىنى بايعالي وتەمانوۆتىڭ سوزىنشە، ولار پاراساتقا قىستىق اياق كيىم دە تاپسىرىسقا بەرىپ قويعان.

«باسقا بالالاردان ايىرماشىلىعىم جوق ەدى. ءبىراق التىنشى سىنىپتان كەيىن وسە باستادىم. سۇيەكتەرىم ىرىلەنە باستاعانىن سەزگەندەي بولدىم. كيىمدەرىم دە تەز كىشىرەيە باستادى. مەكتەپتە بارىنەن بيىك بولىپ كەتتىم دە اياعىمنىڭ ولشەمى ۇلكەيىپ كەتتى. 9-10 سىنىپتىڭ وزىندە وزىمە ساي اياق كيىم تابۋ قيىن بولىپ كەتتى، ول كەزدە اياعىمنىڭ ولشەمى 50 ەدى. مەكتەپ بىتىرگەن كەزىمدە سالماعىم 120 كەلى بولسا، بويىم 2 مەتر بولىپ كەتتى. ءبىراق دەنساۋلىعىمدا ەشقانداي سىزات بولمادى»، - دەيدى پاراسات.

الىپ ادامنىڭ سوزىنشە، بويىنىڭ ۇزىن بولۋى ەش كەدەرگى كەلتىرمەيدى. ءتىپتى ۇيرەنىپ تە كەتكەن. سونىمەن قاتار، پاراسات قانداي جۇمىس ىستەيتىنىن ايتتى.

«تۇراقتى جۇمىسىم جوق، كوبىنە ءۇيدىڭ ىرگەتاسىن قالاۋمەن جانە سىلاق جۇمىستارىمەن اينالىسامىن. جۇمىستان شارشامايمىن، كەز كەلگەن جۇمىستى ىستەي بەرەمىن»، - دەيدى پاراسات.

Massaget.kz