قازاقستاندا ءىسى سوتقا دەيىن جەتكەن اتاقتى شوۋ-بيزنەس وكىلدەرى
3 قازان, 18:34

قازاقستاندا ءىسى سوتقا دەيىن جەتكەن اتاقتى شوۋ-بيزنەس وكىلدەرى

استانا. قازاقپارات - جاقىندا بەلگىلى ءانشى تورەعالي تورەالىنىڭ باسى داۋعا قالعان ەدى. ءانشى كولساي ماڭىندا تۋريستىك گيد قىزمەتىن اتقاراتىن جىگىتتى سوققىعا جىققانى ايتىلعان بولاتىن.

كەيىنىرەك ءانشى قاماۋعا الىنعانى بەلگىلى بولدى.

Massaget.kz ءتىلشىسى داۋلى وقيعادان كەيىن ءىسى ۋشىعىپ كەتكەن شوۋ-بيزنەس وكىلدەرى كىم ەكەنىنە شولۋ جاسادى.

«كوزىن المادى». تورەعالي تورەالىگە قاتىستى داۋ قايدان شىقتى؟

ءانشى تورەعالي تورەالى تۋريستىك گيد قىزمەتىن اتقاراتىن بەكارىس قوجبانوۆ ەسىمدى جىگىتتى سوققىعا جىققان. بۇل وقيعا 28- قىركۇيەكتە الماتى وبلىسى، كەگەن اۋدانىندا ورنالاسقان «كولساي كولدەرى» ۇلتتىق پاركى اۋماعىندا بولعان. پوليتسەيلەر تورەعالي تورەالىگە قاتىستى وسى ءىستىڭ جاي-جاپسارىن ايتىپ، بۇل ءىس ق ر قىلمىستىق كودەكسىنىڭ 293-بابىندا «بۇزاقىلىق» بويىنشا تىركەلگەنىن مالىمدەگەن ەدى.

30- قىركۇيەكتە ءانشى ۋاقىتشا ۇستاۋ يزولياتورىنا قاماۋعا الىندى. بۇل تۋرالى الماتى وبلىسى پوليتسيا دەپارتامەنتى باستىعىنىڭ تەرگەۋ بويىنشا ورىنباسارى رۋستام ءابدىراحمانوۆ حابارلاعان ەدى. ال ءانشى كولسايدا بولعان جاعداي بويىنشا ءوز نۇسقاسىن ايتقان ەدى. ونىڭ سوزىنشە، جاڭا كليپتىڭ ءتۇسىرىلىمى بارىسىندا جانجال شىققان. جابىرلەنۋشى ولاردان كوزىن الماي، جۇمىسىنا كەدەرگى كەلتىرگەن. ناتيجەسىندە جانجال سوڭى ءانشى تاراپىنان توبەلەسكە ۇلاسقان. قازىر ب ا ق پەن الەۋمەتتىك جەلىلەردە، ءانشى سوتقا دەيىن بوساتىلعانى ايتىلىپ جاتىر.

گاۋحار الىمبەكوۆا نە ءۇشىن سوتتالدى؟

ءبىر كەزدەرى بەلگىلى ءانشى گاۋھار الىمبەكوۆاعا دا قاتىستى داۋلى وقيعا بولعان ەدى. ول 6 جىلعا باس بوستاندىعىنان ايىرىلعان ەدى. ءانشىنىڭ ادۆوكاتى جۇماعالي زينەلوۆ بۇل وقيعانىڭ انىق-قانىعىن تۇسىندىرگەن بولاتىن. ونىڭ سوزىنشە، بۇل - 2013-جىلى بولعان ءىس.

«الماتى قالاسىنداعى رايىمبەك داڭعىلىنىڭ بويىنداعى «اقكەنت» تۇرعىن ءۇي كەشەنىندە تۇرىك كومپانياسى ءۇي سالعان. ونى ءىستىڭ فيگۋرانتى فەرۋزا وردابايەۆا اكىمدىكتە ىستەيمىن ءارى مەملەكەتتىك باعدارلامامەن 3 بولمەلى پاتەرلەردى 40 مىڭ دوللارعا الىپ بەرەمىن دەپ، 35 ادامدى الداعان. سولاردىڭ ىشىندە ءانشى گاۋھار الىمبەكوۆا دا بار. وردابايەۆا الىمبەكوۆانىڭ تالاي كونسەرتىنە بارىپ، ءسۇيىپ تىڭدايتىن جانكۇيەرى بولعان، سوڭى تانىستىققا ۇلاسقان. ءسويتىپ، ەكەۋى قۇربى بولعان. الىمبەكوۆا سول الاياق قۇربىسىنىڭ ۇسىنىسىنان كەيىن ءۇش تۋىسىنىڭ اتىنان ءۇش بولمەلى 3 پاتەر العان»، - دەپ اڭگىمەلەدى ول.

العاننان كەيىن ءبىر جىلداي ۋاقىت تۇرعان. ادۆوكاتتىڭ سوزىنشە، ەسكى تانىسى، قۇربىسى باقىت نازاروۆا ءانشىنىڭ ۇيىنە قوناققا كەلگەن. وسى كەزدە نازاروۆا ونىڭ ۇيىنە قىزىعىپ، ءوزى دە ساتىپ العىسى كەلگەن. وسىلايشا، ول دا وردابايەۆامەن تانىسىپ، ۇيگە 40 مىڭ دوللار اقشا بەرەدى. ءسويتىپ، ءبىر ايدىڭ ىشىندە نازاروۆا باسپانالى بولادى. ءانشى الىمبەكوۆا مەن ارىزدانۋشى نازاروۆا ەكەۋى ءبىر پودەزدە تۇرعان. ال ۋاقىت وتە كەلە بۇل ءۇي نەگىزى كەلىسىمشارت بويىنشا ءبولىپ تولەۋگە ساتىپ الىناتىن، قۇنى الدەقايدا قىمبات ءۇي بولىپ شىعادى.

«سوندا الاياق ايەل بۇل ەكەۋىن باستاپقى جارنا رەتىندە 600 مىڭ تەڭگەسىن تولەپ، ءبىر جىلعا ۇيگە كىرگىزىپ قويعان دا، قالعان اقشاسىن قولدى قىلادى. ءۇي الىپ، ءماز بولىپ جۇرگەندە ەكى جىلدان كەيىن بۇلاردى باسپانا سالۋشى كومپانيا قۋىپ شىعادى. سويتسە، ءۇيدىڭ قۇنى 37 ميلليون تەڭگە بولىپ شىعادى. ءۇيدى العان كەزدە الدانعاندار مۇنىڭ ءبولىپ تولەۋ ارقىلى ساتىپ الىناتىن باسپانا ەكەنىن كەلىسىمشارتتا وقىماعان. الاياق تولەپ بەرگەن ەكى جىل بويى ولارعا ەشكىم تيىسپەگەن دە، وسى ۋاقىت وتكەننەن كەيىن ءۇي سالۋشى كومپانيا بۇلاردان اي سايىن 250 مىڭ تەڭگەدەي سوما تولەپ تۇرۋ كەرەك دەيدى. الدانعاندار وسى كەزدە عانا ەسىن جيىپ، الاياقتىڭ قۇربانى بولعانىن تۇسىنەدى. ءسويتىپ، الىمبەكوۆا دا، ونىڭ قۇربىسى نازاروۆا دا، ولارمەن بىرگە وسىلايشا ءۇيلى بولعان تاعى 35 ادام دالادا قالادى»، - دەيدى ادۆوكات.

وسىدان كەيىن، زينەلوۆتىڭ ايتۋىنشا، زارداپ شەككەندەر الاياقتى ىزدەپ، سوتقا ارىز جازا باستايدى. بۇل كەزدە ءانشى گاۋھار الىمبەكوۆا شىعارماشىلىق ادامى بولعاندىقتان شارۋاسى كوبەيىپ، ارىز جازباي قالعان.

ادۆوكاتتىڭ سوزىنشە، 2017-جىلدىڭ سوڭىنا دەيىن اقشاسىن انشىدەن كۇتكەن باقىت نازاروۆا شىدامى تاۋسىلىپ، گاۋھار الىمبەكوۆانىڭ ۇستىنەن ارىز تۇسىرگەن. مەملەكەتتىك ايىپتاۋشى الىمبەكوۆانى وردابايەۆامەن بىرگە الاياقتىق جاسادى دەپ، ياعني جابىرلەنۋشى نازاروۆانى وردابايەۆامەن تانىستىردى جانە جولىقتىردى دەپ، قىلمىستىق كودەكستىڭ 190-بابى، ياعني «الاياقتىق» بويىنشا ايىپتى دەپ تانۋدى، ءسويتىپ، سەگىز جىلعا باس بوستاندىعىنان ايىرۋدى سۇراعان. الايدا كەيىنىرەك الاياقتىق ءىسى بويىنشا 6 جىلعا باس بوستاندىعىنان ايىرىلعان ءانشى گاۋھار الىمبەكوۆا اقتالىپ شىققان بولاتىن.

«حايپ» بولدى عوي كادىمگىدەي». قايرات تۇنتەكوۆ نەگە 40 كۇنگە قامالدى؟

2012-جىلى 28- جەلتوقساندا قايرات تۇنتەكوۆ جول اپاتىنا ۇشىراعان بولاتىن. ءانشى تىزگىندەگەن Toyota Camry 40 كولىگى Toyota Land Cruiser 100 كولىگىمەن سوقتىعىسقان ەدى. الماتىنىڭ مامانداندىرىلعان اۋدانارالىق سوتىنىڭ شەشىمى بويىنشا، ول 40 تاۋلىككە قامالعان. ول سۇحباتتارىنىڭ بىرىندە وسى جايت تۋرالى ايتىپ بەرگەن.

«قازىر سونى كۇلىپ ەسىمە الامىن. 40 كۇن وتىردىم. ءبىراق كوتەرىپ، شۋلاتىپ جىبەردى عوي. (...) ول كەزدە ءبىر شۋ كوتەرگىلەرى كەلدى مە... نەگىزىنەن، جول اپاتىن جاساعان كەزدە جوعارى جاقتان قىسىم بولدى عوي. سەبەبى بالەقورلىق جامان بولىپ كەتتى. ايتا المايمىن ەندى... سول كەزدە تاپانشانى تاقاپ تۇرىپ «جاز دا جاز» دەپ جازدىرىپ جىبەردى (قولحات- ەسك.). «60 مىڭ دوللار بەرەسىڭ» دەپ. سول كەزدە قولحات جازىپ بەردىم. كەيىننەن ءبىر مينيستر وسى ءىستى قولعا العانىن ءبىلدىم. اپاتقا ۇشىراعان قىز سولاردىڭ تانىستارى ما... جاعدايى جاقسى نەگىزى. ەشتەڭە بولعان جوق. قانشاما كەشىرىم سۇراپ تا باردىم. سول كەزدە پوليتسيا قىزمەتكەرلەرى كەلمەي جاتىپ قولحات جازدىرىپ الدى. مەنى 18 ادامدى ءولتىرىپ قويعان سياقتى ىزدەدى عوي. تاڭعالدىم. «حايپ» بولدى عوي كادىمگىدەي. نەگىزى، ءوز تىرشىلىگىممەن ءجۇردىم. ءبىراق ءبىر كۇنى فۋتبولدان شىققانىمدا تانىس ءبىر كىسى حابارلاسىپ، «قايراتجان، قالايسىڭ؟ مىنا جاققا كەلشى» دەدى. سول مەنى «ۇستاپ» بەردى. شىققان ەدىم، قولىما كىسەن سالىپ الىپ كەتتى. ەرتەسىنە تەلەارنالاردى شاقىرىپ قويعان، سوتقا باردىم»، - دەيدى تۇنتەكوۆ.

ەسىرتكىگە ماسايعانى ءۇشىن...

الماتى پوليتسيا دەپارتامەنتى انىقتاۋ باسقارماسى كولىك جۇرگىزۋ كۋالىگىنەن ايىرىلسا دا، ماس كۇيىندە كولىك تىزگىندەگەن مۋزىكالىق توپ سوليسى الىبي مۇراتقا قاتىستى ق ر قىلمىستىق كودەكسىنىڭ 346-بابى 1-بولىگى بويىنشا قوزعالعان قىلمىستىق ءىستى تەرگەۋدى اياقتاعان ەدى. تەرگەۋ بارىسىندا بىلتىر قىركۇيەكتە الىبي مۇرات ماس كۇيىندە كولىك جۇرگىزگەن كەزىندە ۇستالعانى انىقتالعان. ول سول كەزدە سوت شەشىمىمەن 7 جىل مەرزىمگە كولىك قۇرالدارىن باسقارۋ قۇقىعىنان ايىرىلىپ، 15 تاۋلىككە اكىمشىلىك قاماۋعا الىنعان. الايدا بيىل 6- تامىزدا ءالىبي مۇرات تاعى دا ماس كۇيىندە كولىك تىزگىنىنە وتىرعان. مەديتسينالىق تەكسەرىس كەزىندە ونىڭ ەسىرتكىگە ماس ەكەنى انىقتالعان. ال 28- قىركۇيەكتە بوستاندىق سوتى ۇكىمىمەن الىبي مۇرات ق ر قىلمىستىق كودەكسىنىڭ 346-بابى 1-بولىگىندە كوزدەلگەن قىلمىستىق قۇقىقبۇزۋشىلىقتى جاساعانى ءۇشىن كىنالى دەپ تانىلىپ، وعان ءومىر بويى كولىك جۇرگىزۋ قۇقىعىنان ايىرۋ جانە 1 جىلعا باس بوستاندىعىنان ايىرۋ جازاسى تاعايىندالعان بولاتىن. سونداي-اق، مۋزىكالىق توپ سوليسى جازاسىن ەڭ تومەنگى قاۋىپسىزدىكتەگى باس بوستاندىعىنان ايىرۋ ورىندارىندا وتەيتىنى بەلگىلى بولعان ەدى.

كىناسىن ءىشىنارا مويىنداعان. تۇڭعىشباي جامانقۇلوۆ نە ءۇشىن سوتتالدى؟

«فەنيكس» اتتى قازاقستاندىق فيلمگە بولىنگەن قاراجاتتى جىمقىرۋ ءىسى 2017-جىلى بولدى. سول ۋاقىتتا ءتۇسىرىلىم توبىنا 69 ميلليون تەڭگە قاراجاتتى جىمقىردى دەگەن ايىپ تاعىلعان. بۇل ىستەگى فيگۋرانتتاردىڭ ءبىرى قازاقستاننىڭ حالىق ءارتىسى، اكتەر، سەناريست ءارى رەجيسسەر تۇڭعىشباي جامانقۇلوۆ بولعان ەدى. ول 1- ماۋسىمدا سوت ۇكىمىمەن 7 جىلعا شارتتى تۇردە سوتتالىپ، الداعى بەس جىلعا جەتەكشى قىزمەتتەرگە تۇرۋ قۇقىعىنان ايىرىلدى. راقىمشىلىق زاڭىنا بايلانىستى جامانقۇلوۆتىڭ جارتى مەرزىمى قىسقارىپ، تانىمال اكتەر 3,5 جىلعا شارتتى تۇردە سوتتالعان. بۇل ۇكىمدى سۋديا تاكەن شاكىروۆ شىعارعان ەدى. اكتەردىڭ ءوزى كىناسىن ءىشىنارا مويىنداعان ەدى. الايدا ونىڭ جوعالعان قاراجاتتىڭ 5,3 ميلليون تەڭگەسىن قايتارعانى حابارلانعان.

مەملەكەتتىك سىيلىقتان ايىرماۋدى وتىنگەن. ەرلان ءبىلالدىڭ ءىسى

2018-جىلعى اقپاندا اكتەر ەرلان ءبىلالدىڭ ءىسى قىزۋ تالقىلانا باستادى. مۇحتار اۋەزوۆ اتىنداعى دراما تەاترىنىڭ ديرەكتورى قىزمەتىن اتقارعان ول پارا الدى دەپ ايىپتالعان ەدى. سوتالدى تەرگەۋ ورگانىنىڭ مالىمەتى بويىنشا، ءبىلال «سەزام» قوعامدىق قايىرىمدىلىق شىعارماشىلىق قورىنىڭ پرەزيدەنتى قايرات بايانوۆتان اۋەزوۆ تەاترىنىڭ قابىرعاسىندا جاڭاجىلدىق قويىلىمدار قويۋ ءۇشىن 1,5 ميلليون تەڭگە پارا الماق بولعان.

«سوت ەرلان ءبىلالدى ق ر قىلمىستىق كودەكسىنىڭ 24-بابىنىڭ 3-بولىگى جانە 366-بابى بويىنشا ايىپتى دەپ تانىپ، 52500000 تەڭگە كولەمىندە ايىپپۇل سالۋ تۋرالى ۇكىم شىعارادى»، - دەگەن ەدى سۋديا قۋانىش ءارىپوۆ.

سونداي-اق، ول مەملەكەتتىك مەكەمەلەردە جەتەكشى قىزمەتتەرگە تۇرۋ قۇقىعىنان ايىرىلعان بولاتىن. قىلمىس ۇستىندە ۇستالعان اكتەردىڭ ءوزى كەيىن سوتتا كىناسىن مويىنداپ، مەملەكەتتىك سىيلىقتاردان ايىرماۋدى وتىنگەن.

كىسى ءولتىرۋ دەرەگى دە بار

2017-جىلعى اقپاندا اكتەر نۇرجان تويلىبايەۆ ادام ءولتىرۋ ءىسى بويىنشا 11 جىلعا باس بوستاندىعىنان ايىرىلعان ەدى. ول «ماڭگى ەل»، «زاۋرە» جوبالارىنا قاتىسقان، سونىمەن قاتار، «ايمان-شولپان» جانە «وگەي جۇرەك» سەريالدارىنا تۇسكەن.

اكتەرعا قاتىستى وقيعا 2016-جىلى 10- قىركۇيەكتە فابريچنىي اۋىلىندا بولعان. اكتەر دوسىمەن ءبىر جوبانىڭ اياقتالۋىن جۋماقشى بولىپ، كاۋاپحاناعا كىرگەن. كورشى ۇستەلدە ءبىر توپ ادام وتىرعان، ولاردىڭ بىرەۋى اكتەرگە قايتا-قايتا ءتيىسىپ، «جۇلدىز بولما، دي كاپريو ەمەسسىڭ» دەپ، ەكەۋدىڭ داستارقانىنا جاقىنداعان. وسى كەزدە اكتەر كاۋاپحانانىڭ كوسەۋىن الىپ، ونىڭ باسىنان ۇرعان. سوققىدان ەر ادام قايتىس بولىپ، ارتىنشا اكتەر ءتورت اي قۇقىق قورعاۋ ورگاندارىنان جاسىرىنىپ جۇرگەن. جەلتوقساندا پوليتسيا قىزمەتكەرلەرى ونى جالدامالى پاتەردەن ۇستاعان. باسىندا وعان «دەنساۋلىققا قاساقانا اۋىر زيان كەلتىرۋ» بابى بويىنشا ايىپ تاعىلعان، سودان كەيىن «ادام ءولتىرۋ» بابىنا اۋىستىرىلعان.

كەيىن تويلىبايەۆ ق ر قىلمىستىق كودەكسىنىڭ 99-بابىنىڭ 1-بولىگى («ادام ءولتىرۋ») بويىنشا 11 جىلعا باس بوستاندىعىنان ايىرىلدى. ول جازاسىن قاتاڭ رەجيمدەگى كولونيادا وتەپ جاتىر.

جاڭالىقتار