اتىراۋ وبلىسىندا ەرلى- زايىپتىلار ساۋمالدى تابىس كوزىنە اينالدىرىپ وتىر

اتىراۋ. قازاقپارات - اتىراۋ وبلىسىندا ەرلى- زايىپتىلار ساۋمالدى تابىس كوزىنە اينالدىرىپ وتىر. ولار بۇل ءىستى بەس جىل بۇرىن باستاعان، دەپ حابارلايدى قازاقپارات.

ماحامبەت اۋدانىنىڭ سارىتوعاي اۋىلىندا تۇراتىن تالاپ قاجيموۆ پەن زامزاگۇل جاڭابايەۆا 5 جىل بۇرىن جىلقى شارۋاشىلىعىن قولعا العان. قازىر ساۋمال ساتۋدى وتباسىلىق كاسىپكە اينالدىرىپ وتىر.

«مەن 1998-2008 -جىلدارى جىلىوي اۋدانىنداعى تەڭىز كەن ورنىندا مونتاجداۋشى بولىپ جۇمىس ىستەدىم. كەيىن ۆاحتالىق جۇمىستى قويىپ، جىلقى شارۋاشىلىعىن قولعا الدىم.

باستاپقىدا ءبىر ءۇيىر جىلقىم بار ەدى. قازىر ەكى ۇيىرگە جەتكىزدىم. ءۇش بيەنى ساۋامىز. جىلقىعا قانداي ازىق بەرۋدى بىلمەي، ات باپتاۋ، سانىن كوبەيتۋ مۇمكىن ەمەس. ءبىر قاراعاندا ءشوپ بەرۋمەن ءىس بىتكەندەي كورىنۋى مۇمكىن. تويا جەسىن دەپ الدىنا ءۇيىپ- توكپەي، قاجەتتى ازىقتى ولشەپ، ەسەپتەپ بەرۋ كەرەك. جىلقى ءۇشىن ەڭ تابيعي ازىق - دالا ءشوبى. جاڭا ورىلعان ءشوپ بولسا ءتىپتى نارلەنە تۇسەدى. جانۋار باپتاۋىڭا قاراي ءسۇت بەرەدى»، - دەيدى تالاپ قاجيموۆ.

ەردى- زايىپتىلار ساۋمال مەن باپتاعان قىمىز ساتۋدى 2017 -جىلى باستاعان. سارىتوعاي اۋىلىنداعى ق. قالىبەكوۆ اتىنداعى ورتا مەكتەپتە بيولوگيا پانىنەن ساباق بەرەتىن زامزاگۇل جاڭابايەۆانىڭ ايتۋىنشا، العاشىندا ساۋمال ساتۋ تۋرالى وي بولماعان.

«ەنەمنىڭ ىشكى قۇرىلىسى اۋىرىپ، سول كىسىنىڭ دەنساۋلىعى ءۇشىن بيە ساۋۋدى باستادىم. ساۋمالدى كۇندەلىكتى ۇزبەي ىشكەننەن كەيىن ەنەمنىڭ دەنساۋلىعى جاقساردى. سودان بەرى بيەنى ۇزبەي ساۋىپ كەلەمىن. جۇزگە جۋىق تۇراقتى تۇتىنۋشىمىز بار. بيە ساۋۋدى مامىر ايىنان قازانعا دەيىن جالعاستىرامىن. ءبىر بيە كۇنىنە 6-7 رەت ساۋىلادى. ءبىر ساۋعاندا 1 ليتر ءسۇت بەرەدى. ساۋمالدى ءار ادام دياگنوزى مەن تابەتىنە قاراي ءارتۇرلى مولشەردە ىشەدى. قازىر سۇرانىستىڭ كوبى اتىراۋ قالاسىنان بولىپ تۇر»، - دەيدى زامزاگۇل جاڭابايەۆا.

ەندى ەرلى- زايىپتى مەملەكەت تاراپىنان بەرىلەتىن قولداۋدى پايدالانىپ، وتباسىلىق كاسىپتى كەڭەيتۋدى كوزدەپ وتىر.