ابايەۆ: كوشپەندىلەر ويىندارىن قازاقستاندا وتكىزۋ - اسا جاۋاپتى جۇمىس
3 قازان, 17:19

ابايەۆ: كوشپەندىلەر ويىندارىن قازاقستاندا وتكىزۋ - اسا جاۋاپتى جۇمىس

استانا. قازاقپارات - قوعامداستىعى V دۇنيەجۇزىلىك كوشپەندىلەر ويىندارىن ەستافەتاسى قازاقستانعا تابىس ەتىلدى. بۇل تۋرالى ق ر مادەنيەت جانە سپورت ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.

«ءسۇيىنشى، اعايىن! مەملەكەت باسشىسىنىڭ تىكەلەي تاپسىرماسىمەن مادەنيەت جانە سپورت مينيسترلىگى دەلەگاتسياسى IV دۇنيەجۇزىلىك كوشپەندىلەر ويىندارىنا قاتىسۋ ءۇشىن تۇركياعا ارنايى بارىپ، اقجولتاي جاڭالىقپەن ورالىپ وتىر. ساپار بارىسىنداعى وزەكتى ماسەلەلەردىڭ ءبىرى - قازاقستاندا V ويىنداردى وتكىزۋ جونىندەگى كەلىسسوزدەر بولاتىن. ناتيجەسىندە، تۇركيانىڭ جاستار جانە سپورت ءمينيسترى مەحمەت كاساپوگلۋ كەشە سالتاناتتى تۇردە اتالعان اۋقىمدى شارانىڭ ەستافەتاسىن ەلىمىزگە تابىس ەتتى. ياعني، رەسمي تۇردە قازاقستان - 2024 -جىلعى بەسىنشى دۇنيەجۇزى كوشپەندىلەر ويىندارىن وتكىزۋشى مەملەكەت رەتىندە بەلگىلەندى»، - دەپ جازدى ب. ابايەۆ الەۋمەتتىك جەلىدەگى پاراقشاسىندا.

وسى ورايدا كوشپەندىلەر ويىندارىن قازاقستاندا وتكىزۋ اسا جاۋاپتى جۇمىس ەكەنىن ايتتى.

«مىڭجىلدىقتاردىڭ مۇراسىنا يە، كوشپەلى دالا سالتىن ۇلىقتاعان ەل رەتىندە بۇل ءدۇبىرلى دودانى جوعارى دەڭگەيدە وتكىزەمىز دەپ سەنەمىن. كەشە تۇركيا تورىندە ەل نامىسىن قورعاپ، ەرەكشە ناتيجە كورسەتكەن بارلىق جەڭىمپازدى تاعى دا شىن جۇرەكتەن قۇتتىقتايمىن! ات ۇستىندەگى الاش رۋحىنىڭ ايبىنى ارتا بەرسىن!»، - دەدى مينيستر.

بۇدان بۇرىن حابارلانعانداي، تۇركى قوعامداستىعى V دۇنيەجۇزىلىك كوشپەندىلەر ويىندارىن 2024 -جىلى قازاقستاندا وتكىزۋ جونىندەگى ۇسىنىستى ءبىراۋىزدان قولدادى.

IV دۇنيەجۇزىلىك كوشپەندىلەر ويىندارىندا قازاق سپورتشىلارى 9 مەدال جەڭىپ الدى، ونىڭ ىشىندە 3 التىن، 4 كۇمىس جانە 2 قولا.


جاڭالىقتار