پاكىستاندا سۋ تاسقىنىنان كەيىن ءتۇرلى جۇقپالى اۋرۋ ءورشىدى

استانا. قازاقپارات - پاكىستاندا سۋ تاسقىنىنان ءتۇرلى ىندەت ورشەپ، اۋرۋحانالاردا ناۋقاستار كوبەيدى. كەي جەرلەردە دەرتكە شالىققانداردى قابىلدايتىن ورىن جەتىسپەي جاتىر.

دارىگەرلەردىڭ ايتۋىنشا سۇزەك، بەزگەك، ءىش ءوتۋ جانە تەرى اۋرۋلارى كوپتەپ تارالىپ جاتىر. سەبەبى تاسقىننان اۋىز سۋ كوزدەرى لايلانىپ، حالىقتى تازا سۋمەن قامتاماسىز ەتۋ قيىنعا سوعۋدا. پاكىستاندا بيىل جاڭبىرلى ماۋسىم كەزىندە سۋ تاسقىنى ءجيى بولىپ، حالىق كوپ زارداپ شەگىپ وتىر. دەرەككە سۇيەنسەك، تابيعات اپاتىنان 1 مىڭ 700 دەي ادام وپات بولعان. ەلگە 30 ميلليارد دوللاردان اسا شىعىن كەلدى.

ناۆيد احمەد، دارىگەر:

- قازىر كۇن سايىن 400 گە جۋىق ادامدى قابىلداپ جاتىرمىز. كەي كەزدەرى اۋرۋدىڭ نىشانى انىق بايقالسا ناۋقاستاردى ەش تەكسەرىسسىز بىردەن ەمدەۋگە كىرىسەمىز. قىسقا تامان جاعداي ءتىپتى ۋشىعۋى مۇمكىن. سەبەبى ۋاقىتشا لاگەرلەردە تىنىس الۋ جولدارىمەن بايلانىستى اۋرۋلار ءورشۋى مۇمكىن.

ماداد ءالي بوزدار، تۇرعىن:

- بىزگە ۇيگە ورالۋ ءۇشىن 2-3 اي كەرەك. تاسىعان سۋ ءالى قايتپاي جاتىر. بالالارىمىز اۋىرىپ، قاتتى قينالدىق. اۋىلىمىزداعى سۋ تەز قايتسا ۇيىمىزگە ورالىپ، جاعدايمىز ءبىرشاما جاقسارار ەدى.

www.24.kz