زاڭدى تۇلعالارعا بەرىلگەن كرەديت كولەمى ءوستى
بۇل تۋرالى ق ر ۇلتتىق بانك ءتوراعاسى عالىمجان ءپىرماتوۆ ءمالىم ەتتى، دەپ حابارلايدى قازاقپارات ءتىلشىسى.
«اقشا-كرەديت تالاپتارىنىڭ قاتاڭداتىلۋىنا (بازالىق مولشەرلەمەنىڭ ارتۋىنا) قاراماستان، بانكتەر كرەديتتىك بەلسەندىلىگىن جالعاستىرۋدا. وتكەن جىلى ەكىنشى دەڭگەيلى بانكتەردىڭ كرەديتتىك پورتفەلى 18,5 تريلليون تەڭگەگە دەيىن 26,5 پايىزعا (3,9 تريلليون تەڭگە) ءوستى. وتكەن جىلعى كرەديتتەۋ ءۇردىسىنىڭ جالعاسىن ءبىز بيىلعى جىلى دا بايقاپ وتىرمىز. بيىلعى جىلدىڭ باسىنان باستاپ كرەديتتىك پورتفەل شىلدەدە 20,4 تريلليون تەڭگەگە دەيىن 10,1 پايىزعا (1 864,5 ميلليارد تەڭگە) ارتتى. زاڭدى تۇلعالاردىڭ كرەديتتىك پورتفەلى وتكەن جىلى 7,8 تريلليون تەڭگەگە دەيىن 9,3 پايىزعا (661,8 ميلليارد تەڭگە)، ال بيىل 8,0 تريلليون تەڭگەگە دەيىن تاعى 2,9 پايىزعا (222,3 ميلليارد تەڭگە) ءوستى. ەگەر ە د ب- عا جاڭا كرەديتتەر بەرۋدى قاراستىرساق، وندا ولاردىڭ اعىندارى، اسىرەسە زاڭدى تۇلعالارعا بەرىلگەن كرەديتتەر ەكونوميكاداعى ىسكەرلىك بەلسەندىلىكتى ىنتالاندىرادى»، - دەدى ول ءماجىلىس دەپۋاتتارىنىڭ ساۋالىنا بەرگەن جاۋابىندا.
ونىڭ دەرەگىنشە، وتكەن جىلى زاڭدى تۇلعالار 9,9 تريلليون تەڭگەگە بۇرىنعى كرەديتتەرىن وتەۋ كەزىندە زاڭدى تۇلعالارعا جاڭا كرەديتتەر بەرۋ 11,1 تريلليون تەڭگەگە دەيىن 20,3 پايىزعا ءوستى.
«وسى جىلعى قاڭتار-شىلدە ايلارىندا زاڭدى تۇلعالارعا بەرىلگەن كرەديتتەر وتكەن جىلعى ۇقساس كەزەڭمەن سالىستىرعاندا 7 پايىزعا ۇلعايىپ، 6,4 تريلليون تەڭگەنى قۇرادى. ميكروقارجى، كۆازيمەملەكەتتىك، يپوتەكالىق ۇيىمداردىڭ ەكىنشى دەڭگەيلى بانكتەرگە قارىزدارىن قوسا العاندا، كەڭەيتىلگەن انىقتاماداعى كرەديتتەر بيىلعى 1- شىلدەدەگى جاعداي بويىنشا 2022-جىلعى 1-جارتىجىلدىقتا 7,7 پايىزعا ۇلعايىپ، 25,2 تريلليون تەڭگەنى قۇرادى»، - دەدى عالىمجان ءپىرماتوۆ.