باسپانا كەزەگىنە تۇرۋ ءۇشىن اجىراسۋعا باراتىندار كوبەيدى - بانك باسشىسى
«ءبىز قارىز بەرۋدىڭ ءۇش جىلدىق قورىتىندىسىنا تالداۋ جاسادىق جانە كەيىنگى ءتورت جىلدا «تولىق ەمەس وتباسى» ساناتىنىڭ اسا جوعارى قارقىنمەن ءوسىپ كەلە جاتقانىن كوردىك. وكىنىشكە قاراي، قازاقستاندا وتباسى قۇندىلىقتارىنىڭ دامىپ جاتقانىنا قاراماستان، 2017 -جىلى 54626 اجىراسۋ تىركەلگەن. 2018 -جىلى ولاردىڭ سانى 54797-گە دەيىن ءوسىپ، 2019 -جىلى 59796-عا جەتتى. اجىراسۋعا ءوتىنىش بەرۋ «COVID-19» پاندەمياسى كەزىندە قيىنىراق بولىپ، اجىراسۋ سانى 48 مىڭعا دەيىن قىسقاردى. 2021 -جىلى بۇل سان قايتادان ءوسىپ، 48239-عا جەتتى»، - دەدى ول ورتالىق كوممۋنيكاتسيالار قىزمەتىندە وتكەن بريفينگىدە.
ونىڭ پايىمىنشا، باسپانا كەزەگىنە تۇرۋ ءۇشىن ءىشىنارا جالعان اجىراسۋعا باراتىندار كوبەيىپ وتىر. وسىنى ەسكەرگە ۇكىمەت ارنايى قاۋلى قابىلداپ وتىر.
«تولىق ەمەس وتباسى» باعىتى بويىنشا اجىراسۋ تۋرالى كۋالىك وتكىزگەندەر كوپ. 23-قىركۇيەكتە ۇكىمەت قاۋلىسى اياسىندا «تولىق ەمەس وتباسىلار» ساناتىن «شاڭىراق - 5-10-10» جوباسىنا اۋىستىرۋ ۇسىنىسى قولداۋ تاپتى. مۇنداعى ايىرماشىلىق سىياقى مولشەرلەمەسىنە قاتىستى. ءار وتباسى دەڭگەيىندە ايىرماشىلىق شامامەن 30 مىڭ تەڭگەدەي بولاتىن شىعار. مىسالى، بەرەشەك 15 ميلليون تەڭگە بولسا، «باقىتتى وتباسى» بويىنشا نەسيە العاندار العاشقى 8 جىلدا اي سايىن 80623 تەڭگەدەن، %50 سوما جينالعاننان كەيىن 63344 تەڭگەدەن تولەيدى. «شاڭىراق» باعدارلاماسى بويىنشا «تولىق ەمەس وتباسى» ءدال سونداي پاتەردى ءسال جوعارى تولەممەن ساتىپ الادى. ياعني، ول العاشقى 8 جىلدا اي سايىن 116500 تەڭگەدەن، كەيىن 73983 تەڭگەدەن تولەيدى»، - دەدى ءلاززات يبراگيموۆا.
«وتباسى بانك» باسشىسى تولىق ەمەس وتباسىلار بۇل وزگەرىستى ەكىۇشتى قابىلداپ جاتقانىن ايتادى. «قازىر الەۋمەتتىك جەلىلەردە «تولىق ەمەس وتباسىلاردان» وتىنىشتەر ءتۇسىپ جاتىر. بۇگىن مەن ماجىلىستە ءبىر توپ اداممەن كەزدەستىم. ءبىز مەملەكەتتىڭ ءبىرىنشى كەزەكتە مۇمكىندىگى شەكتەۋلى ادامداردى باسپانامەن قامتاماسىز ەتۋگە باسىمدىق بەرەتىنىن تۇسىندىرەمىز»، - دەدى بانك باسشىسى.