سوڭعى ەكى كۇندە رەسەيدەن كەلگەن ميگرانتتار سانى ەداۋىر تومەندەي باستادى – ۇكىمەت

استانا. قازاقپارات - بۇگىن قازاقستان پرەمەر- ءمينيسترى ءاليحان سمايىلوۆ كوشى- قوننىڭ وزەكتى ماسەلەلەرى بويىنشا كەڭەس وتكىزدى، دەپ حابارلايدى قازاقپارات.

ىشكى ىستەر ءمينيسترى مارات احمەتجانوۆ 21-28- قىركۇيەك ارالىعىندا رەسەي فەدەراتسياسىنان ەل اۋماعىنا كەلگەن ميگرانتتار قاتارىنىڭ ادەتتەگىدەن 2-3 ەسە كوبەيگەنىن ايتقان.

ۇكىمەت باسپا ءسوز قىزمەتىنىڭ مالىمەتىنشە، تەك سوڭعى ەكى كۇندە بۇل ەلدەن كەلۋشىلەر سانى ەداۋىر تومەندەي باستاعان.

ەسەپتى كەزەڭدە رەسەي فەدەراتسياسىنىڭ 382 ازاماتى تۇراقتى تۇرۋ ءۇشىن جانە 64 ازاماتى ق ر ازاماتتىعىن الۋعا قۇجات تاپسىرعان.

ءمينيستردىڭ ايتۋىنشا، بۇگىنگى كۇنى ەلىمىزدەگى كريمينوگەندىك جاعداي تۇراقتى. ميگرانتتار تاراپىنان قازاقستان ازاماتتارىنا قاتىستى جاسالعان قىلمىستار تىركەلمەگەن.

سونىمەن قاتار ءى ءى م شەتەلدىك ازاماتتاردىڭ قوعامدىق قاۋىپسىزدىگىن جانە زاڭدىلىعىن قامتاماسىز ەتۋدى باقىلاۋدى كۇشەيتتى، اتاپ ايتقاندا، ادامدار كوپ شوعىرلاناتىن جەرلەردە پوليتسيا ناريادتارىنىڭ سانى ارتتى.

ق ر ۇلتتىق قاۋىپسىزدىك كوميتەتى ءتوراعاسىنىڭ ورىنباسارى - شەكارا قىزمەتىنىڭ ديرەكتورى ەرلان الداجۇمانوۆ ءتيىستى ينفراقۇرىلىمى بار وتكىزۋ پۋنكتتەرىندە قازاقستان ازاماتتارى، جۇك كولىگى جانە شەتەلدىكتەر ءۇشىن جەكە جول جولاقتارى بولىنگەنىن حابارلادى.

«قازىرگى كەزدە قازاقستان ازاماتتارىنا شەكارادان وتۋدە پروبلەمالار جوق»، - دەدى ول.

پرەمەر- مينيستر جەكەلەگەن وتكىزۋ پۋنكتتەرىندە ءالى دە بولسا ۇزىن- سونار كەزەك بارىن ايتتى.

«رەسەيدىڭ شەكارا قىزمەتىمەن ءوزارا ءىس- قيمىلدى كۇشەيتۋ كەرەك، ەكى جاقتان دا ادامدار جينالىپ قالماۋى ءۇشىن ءبىرىڭعاي الگوريتم ازىرلەۋ قاجەت. سەبەبى، بۇل بيزنەس پەن حالىقتىڭ ورىندى نارازىلىعىن تۋدىرادى»، - دەدى ءاليحان سمايىلوۆ.

سونداي- اق ءاليحان سمايىلوۆ تۇرعىن ءۇيدى جالعا الۋ كەزىندە ازاماتتاردىڭ قۇقىقتارىن ءتۇسىندىرۋ جۇمىستارىن كۇشەيتۋدى تاپسىردى.

«بۇل ميگرانتتاردىڭ اعىنىنا عانا قاتىستى ەمەس، جالپى ازاماتتارىمىز ءوز قۇقىقتارىن ءبىلۋى كەرەك. Egov نەمەسە كوپ قولدانىلاتىن قوسىمشالار ارقىلى تاراپتاردىڭ قۇقىقتارى مەن مىندەتتەرىن كورسەتەتىن تيپتىك جالعا الۋ شارتىنا سيفرلىق تۇردە قول قويۋعا بولاتىنداي ەتىپ جاساۋ قاجەت. بۇل ەكى جاقتىڭ دا قۇقىعىن قورعاۋعا مۇمكىندىك بەرەدى»، - دەدى ءاليحان سمايىلوۆ.

كەڭەستى قورىتىندىلاي كەلە، پرەمەر- مينيستر مەملەكەتتىك ورگاندار مەن اكىمدىكتەرگە كوشى- قون جاعدايىن رەتتەۋ بويىنشا كەشەندى جانە ءتيىمدى شارالار قابىلداۋ قاجەتتىگىن اتاپ ءوتتى.

«ءبىرىنشى كەزەكتە قازاقستاندىق ازاماتتار ءۇشىن تۇراقتى «جاسىل ءدالىزدى»، سونداي- اق تىركەلمەگەن ميگرانتتاردى انىقتاۋ ءۇشىن موبيلدى مونيتورينگتىك توپتاردىڭ جۇمىسىن قامتاماسىز ەتۋ قاجەت»، - دەدى ءاليحان سمايىلوۆ.

فوتو: primeminister.kz