رەسەي قۇرامىنا جاڭا اۋماقتار قوسۋ تۋرالى كەلىسىمگە قول قويىلدى

استانا. قازاقپارات - ماسكەۋدە جاڭا وڭىرلەردى رەسەي قۇرامىنا قابىلداۋ ءراسىمى ءوتتى. بۇدان بۇرىن كورشى ەلدىڭ باسشىسى ۋكراينانىڭ زاپوروجە جانە حەرسون وبلىستارىنىڭ تاۋەلسىزدىگىن مويىنداعان.

2014 -جىلى ۆلاديمير پۋتين ۋكرايناداعى ءوزىن- ءوزى جاريالاعان دونەتسك پەن لۋگانسك حالىق رەسپۋبليكالارىنىڭ ەگەمەندىگىن دە مويىنداعان ەدى، دەپ حابارلايدى «حابار 24».

وتكەن اپتانىڭ باسىندا ۋكراينانىڭ 4 ءوڭىرى رەسەي قۇرامىنا كىرۋ تۋرالى رەفەرەندۋم وتكىزەتىنىن جاريا ەتتى. بۇل زاپوروجە جانە حەرسون وبلىستارى، ءوزىن- ءوزى جاريالانعان دونەتسك جانە لۋگانسك حالىق رەسپۋبليكالارى. زاپوروجەنىڭ ءبىر بولىگى جانە حەرسون وبلىسى تۇگەلدەي دەرلىك رەسەي اسكەرىنىڭ باقىلاۋىنا وتكەن. ءسويتىپ 23-27- قىركۇيەك ارالىعىندا بۇل 4 ايماقتا رەفەرەندۋم بولدى.

جەرگىلىكتى بيلىكتىڭ بەرگەن مالىمەتىنە سۇيەنسەك، تۇرعىنداردىڭ باسىم كوپشىلىگى رەسەي قۇرامىنا كىرۋ ءۇشىن داۋىس بەرگەن. كرەملدە رەسەي قۇرامىنا جاڭا اۋماقتار قوسۋ جونىندە كەلىسىمدەرگە قول قويىلدى.

تەك رەسەي عانا مويىنداعان رەفەرەندۋمدار ناتيجەسى جاريالانعاننان كەيىن، ەل قۇرامىنا جاڭا اۋماقتار قوسۋ تۋرالى كەلىسىمدەرگە قول قويىلدى. وسىدان كەيىن پرەزيدەنت ۆلاديمير پۋتين جاڭا وڭىرلەردىڭ باسشىلارىمەن كەزدەسىپ، ۇندەۋ جاسادى. رەسەي پرەزيدەنتىنىڭ باسپا ءسوز حاتشىسى دميتري پەسكوۆ جاڭا وڭىرلەر رەسەي قۇرامىنا كىرگەننەن كەيىن، ولار ەلدىڭ اجىراماس بولىگىنە اينالاتىنىن مالىمدەدى. ال بۇل اۋماققا جاسالعان سوققىلاردى رەسەيگە قارسى باسقىنشىلىق رەتىندە قاراستىرماق. بيلىك جاڭا جەرلەر قوسۋدى قولدايتىن اۋقىمدى شەرۋ ۇيىمداستىرىپ. ول قىزىل الاڭدا ميتينگپەن اياقتالۋى كەرەك.

ەسكە سالىپ كەتسەك، ەلدە ءىشىنارا موبيليزاتسيا جالعاسىپ جاتىر. قازىر اسكەر قۇرامىنا 300 مىڭ ادام شاقىرتۋ كوزدەلىپ وتىر.

الەمدىك قاۋىمداستىقتىڭ كوزقاراسى

الەم ەلدەرى بۇعان قاتىستى ءوز پىكىرلەرىن ءبىلدىرىپ جاتىر. ماسەلەن، ا ق ش باسشىسى رەفەرەندۋمنىڭ زاڭسىز وتكەنىن ايتىپ، ونىڭ ناتيجەسىن مويىندامايتىنىن جەتكىزدى. امەريكادان بولەك «ۇلكەن جەتىلىكككە» كىرەتىن ۇلى بريتانيا، گەرمانيا، يتاليا، كانادا، فرانسيا مەن جاپونيا بيلىگى دە وسىنداي پىكىر تانىتتى.

دجو بايدەن، ا ق ش پرەزيدەنتى:

- ا ق ش بۇل «رەفەرەندۋم» دەلىنگەن شارانىڭ ناتيجەسىن ەشقاشان، تاعى دا قايتالاپ وتەمىن ەشقاشان مويىندامايدى. ەشقانداي رەفەرەندۋم بولعان جوق. بۇل ۋكراينا حالقىنىڭ قالاۋى ەمەس. ماسكەۋ ناتيجەلەردى بۇرمالاپ الدى. رەسەيدىڭ بۇل قىلىعى ب ۇ ۇ- نىڭ جارعىسىن جانە ەگەمەندىك پەن اۋماقتىق تۇتاستىقتىڭ نەگىزگى قاعيداتتارىن بۇزادى.

ب ۇ ۇ دەمەكشى، حالىقارالىق بىرلەستىك باسشىسى دا سوڭعى جاعدايعا قاتىستى ءوز پىكىرىن ءبىلدىردى.

انتونيۋ گۋتەرريش، ب ۇ ۇ باس حاتشىسى:

- رەسەي بيلىگىنىڭ شەشىمى حالىقارالىق قۇقىققا قايشى كەلەدى جانە جاعدايدى ودان بەتەر ۋشىقتىرىپ جىبەرۋى مۇمكىن. رەفەرەندۋم وتكەن وڭىرلەردە قازىر قارۋلى قاقتىعىس ءجۇرىپ جاتىر. ول جەرلەردىڭ كوبىن رەسەي اسكەرى ءوز باقىلاۋىنا الدى. سوندىقتان وندا تۇراتىن حالىق ءوز ەركىن ءبىلدىردى دەگەن مالىمەتكە سەنۋگە بولمايدى.

ەۋرووداق وكىلدەرى دە رەسەيدىڭ شەشىمىن قۇپتامايتىنىن جەتكىزدى. ءسويتىپ كرەملدىڭ بۇل قادامىنا قاتىستى سانكسيالاردىڭ جاڭا پاكەتى ازىرلەنىپ جاتقانىن دا ايتتى. سوڭعى مالىمەت بويىنشا ەۋروكوميسسيا ەۋرووداق مەملەكەتتەرىنە رەسەي ازاماتتارىنىڭ ءۇشىنشى ەلدەردەن ۆيزاعا قاتىستى جىبەرگەن وتىنىشتەرىن قابىلداماۋعا كەڭەس بەردى. بۇعان دەيىن ەلىمىزدىڭ سىرتقى ىستەر مينيسترلىگى دە سوڭعى جاعدايعا قاتىستى ءوز ۇستانىمىن بىلدىرگەن.

ۆەدومستۆونىڭ رەسمي وكىلى ايبەك سمادياروۆ قازاقستان ءوزىن- ءوزى جاريالاعان دونەتسك پەن لۋگانسك رەسپۋبليكالارى جانە زاپوروجە مەن حەرسون وبلىستارىنداعى رەفەرەندۋمعا قاتىستى «مەملەكەتتەردىڭ اۋماقتىق تۇتاستىعى، ولاردىڭ ەگەمەندىك تەڭدىگى جانە بەيبىت قاتار ءومىر ءسۇرۋ قاعيداتتارىن» نەگىزگە الاتىنىن ايتتى.

ول سونداي- اق پرەزيدەنت قاسىم- جومارت توقايەۆ ب ۇ ۇ مىنبەرىنەن وسى ۇيىم جارعىسىنىڭ نەگىزىنە اينالعان حالىقارالىق قۇقىق پرينتسيپتەرىن ساقتاۋدىڭ ماڭىزدىلىعىن اتاپ وتكەنىن دە جەتكىزدى.

www.24.kz