بيتۋم جەتكىزۋدى تەزدەتپەسەك، ونىڭ قىستا قاجەتى بولماي قالادى - ءاليحان سمايىلوۆ
30 قىركۇيەك, 21:31

بيتۋم جەتكىزۋدى تەزدەتپەسەك، ونىڭ قىستا قاجەتى بولماي قالادى - ءاليحان سمايىلوۆ

استانا. قازاقپارات – ق ر پرەمەر- ءمينيسترى ءاليحان سمايىلوۆ اتىراۋ وبلىسىن دامىتۋدىڭ وزەكتى پروبلەمالارىن شەشۋ ماسەلەلەرى بويىنشا كەڭەس وتكىزدى. قازاقپارات بۇل تۋرالى ۇكىمەتتىڭ باسپا ءسوز قىزمەتىنە سىلتەمە جاساپ حابارلايدى.

كەڭەس بارىسىندا اۋىلدىق ەلدى مەكەندەردى سۋمەن جابدىقتاۋ، وبلىستىق جانە اۋداندىق ماڭىزى بار كوپىرلەر مەن اۆتوموبيل جولدارىن سالۋ، كوپفۋنكتسيونالدى مەديتسينالىق مەكەمەلەردى (ونىڭ ىشىدە پەريناتالدىق جانە ونكولوگيالىق بولىمشەلەر) ، كارىز- تازارتۋ قۇرىلىستارىن رەكونسترۋكتسيالاۋ، «بولاشاق» زاۋىتىندا جانە سۋلاندىرۋ- سۋارۋ كانالدارىندا جوندەۋ جۇمىستارىن اياقتاۋ، اۋىل شارۋاشىلىعى قۇرىلىمدارىن قولداۋ ءۇشىن قوسىمشا قاراجات ءبولۋ، ءۇش اۋىسىمدى وقىتۋدى ازايتۋ، ءبىلىم بەرۋ نىساندارىن سالۋ جانە وزگە دە ماسەلەلەر تالقىلاندى.

وبلىس اكىمى سەرىك شاپكەنوۆ، يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ، ەنەرگەتيكا ءمينيسترى بولات اقشولاقوۆ، اۋىل شارۋاشىلىعى ءمينيسترى ەربول قاراشوكەيەۆ، وقۋ- اعارتۋ ءمينيسترى اسحات ايماعامبەتوۆ، سونداي- اق ەكولوگيا، گەولوگيا جانە تابيعي رەسۋرستار ۆيتسە- ءمينيسترى ءزۇلفيا سۇلەيمەنوۆا، قارجى ۆيتسە- ءمينيسترى تاتيانا ساۆەليەۆا جانە دەنساۋلىق ساقتاۋ ۆيتسە- ءمينيسترى جاندوس بۇركىتبايەۆ بايانداما جاسادى.

يندۋستريا ءمينيسترى بيىل جەرگىلىكتى جولدار جەلىسىن سالۋعا جانە رەكونسترۋكتسيالاۋعا 13,6 ميلليارد تەڭگە بولىنگەنىن حابارلادى: قۇرىلىس- مونتاجداۋ جۇمىستارىنىڭ بارلىق تۇرلەرىمەن 45 ك م جول قامتىلدى. جىل قورىتىندىسى بويىنشا ولاردىڭ نورماتيۆتىك جاعدايداعى ۇلەسىن %74 دەيىن جەتكىزۋ جوسپارلانۋدا.

پرەمەر- مينيستر جولداردىڭ ساپاسىن جاقسارتۋ بويىنشا جۇمىستاردى جەدەلدەتۋ قاجەت ەكەنىن اتاپ ءوتتى، قازىرگى كەزدە بۇل - ەلىمىزدەگى ەڭ تومەن كورسەتكىشتەردىڭ ءبىرى.

«ەگەر بيتۋم جەتكىزۋدى تەزدەتپەسەك، ونىڭ قىستا قاجەتى بولماي قالادى. بارلىق شەشىمدەر ءتيىستى دەڭگەيدە قابىلداندى. بۇل ماسەلەنى كۇندەلىكتى باقىلاۋعا الىپ، بيتۋم جەتكىزۋدى جەدەلدەتۋ قاجەت»، — دەدى ءاليحان سمايىلوۆ.

كەڭەستى قورىتىندىلاي كەلە، پرەمەر- مينيستر مەملەكەتتىك ورگاندارعا اتىراۋ وبلىسىنىڭ اكىمدىگىمەن بىرلەسىپ، قارالعان بارلىق ماسەلەلەردى ۋاقىتىلى جانە تولىق پىسىقتاۋدى تاپسىردى.

جاڭالىقتار