مەملەكەت باسشىسى سەمەيدەگى بەينەلەۋ ونەرى مۋزەيىن ارالاپ كوردى

سەمەي. قازاقپارات - مەملەكەت باسشىسى اباي وبلىسىنا جۇمىس ساپارى اياسىندا سەمەي قالاسىنداعى نيەۆزوروۆتار اتىنداعى بەينەلەۋ ونەرى مۋزەيىن ارالاپ كوردى، دەپ حابارلايدى اقوردا.

پرەزيدەنتكە مۋزەيدىڭ تاريحى تانىستىرىلدى. نيەۆزوروۆتار مۋزەيى - قازاقستانداعى كوركەمسۋرەت قۇندىلىقتارىن جيناقتاعان ءىرى مادەني نىسانداردىڭ ءبىرى. مۋزەيدە ءتۇرلى باعىتتاعى 5 مىڭنان استام ەكسپونات بار. اتاپ ايتساق، قازاقستان بەينەلەۋ ونەرى، XVIII عاسىر اياعى جانە XX عاسىر باسىنداعى ورىس ونەرى، XVI عاسىر اياعى جانە XX عاسىر باسىنداعى باتىس ەۋروپا كەسكىندەمەسى مەن گرافيكاسى، XX عاسىرداعى رەسەي، ورتالىق ازيا، گرۋزيا، ارمەنيا، بەلارۋس ونەرى.

نيەۆزوروۆتار وتباسى اتىنداعى مۋزەي 1985 -جىلى تاريحي- ولكەتانۋ مۋزەيىنىڭ عىلىمي- كوركەم ءبولىمى بولىپ قۇرىلعان. مۋزەي مارتەبەسى 1988 -جىلى بەرىلدى.