ەلگە كەلىپ جاتقان رەسەيلىكتەر تاراپىنان قۇقىق بۇزۋشىلىق تىركەلگەن جوق - مينيستر احمەتجانوۆ

وسكەمەن. قازاقپارات – ق ر ىشكى ىستەر ءمينيسترى مارات احمەتجانوۆ ەلگە كەلىپ جاتقان رەسەيلىكتەرگە قاتىستى بىردە-ءبىر قۇقىق بۇزۋشىلىق تىركەلمەگەنىن ءمالىم ەتتى، دەپ حابارلايدى قازاقپارات ءتىلشىسى.

بۇگىن مارات احمەتجانوۆ شىعىس قازاقستان وبلىسىنىڭ تۇرعىندارىمەن ەسەپتىك كەزدەسۋ وتكىزۋ ءۇشىن وسكەمەن قالاسىنا كەلدى. جيىن بارىسىندا ازاماتتاردىڭ ءبىرى رەسەيدەن ەلگە كەلىپ جاتقان ميگرانتتاردىڭ كوبەيۋىنە قاتىستى الاڭداۋشىلىق ءبىلدىردى.

«راسىمەن دە، سوڭعى جاعدايلارعا بايلانىستى كورشى ەلدەن قازاقستانعا كەلۋشىلەر ارتتى. ءبىز قۇقىق قورعاۋ ورگانى رەتىندە ولاردىڭ قاۋىپسىزدىگىن قامتاماسىز ەتۋگە مىندەتتەمىز. الايدا شەتەلدىكتەر تاراپىنان ازاماتتارىمىزدىڭ تىنىشتىعىن بۇزىپ، قوعامدىق ءتارتىپتى ساقتاماعاندار انىقتالسا وندا زاڭ شەڭبەرىندە ءتيىستى شارا قابىلدايمىز»، - دەدى ق ر ىشكى ىستەر ءمينيسترى.

ونىڭ ايتۋىنشا، وزگە مەملەكەتتەن كەلگەندەردىڭ بارلىعى قازاقستاننىڭ ىشكى زاڭىنا باعىنۋى ءتيىس.

«قازىرگى ۋاقىتتا رەسەيلىكتەر تاراپىنان بىردە-ءبىر قىلمىس جانە اكىمشىلىك قۇقىق بۇزۋشىلىق تىركەلمەدى. جالپى جىل سايىن ەلىمىزگە الەمنىڭ تۇكپىر-تۇكپىرىنەن 6 ميلليوننان استام ادام كەلەدى. ميگراتسيالىق پوليتسيا قىزمەتكەرلەرى ءوز جۇمىستارىن ۇزدىكسىز اتقارۋدا. سوندىقتان الاڭداۋعا ەش نەگىز جوق»، - دەدى مارات احمەتجانوۆ.