ىشكى ىستەر ءمينيسترى پوليتسەيلەر حالىقپەن قالاي سويلەسۋى كەرەكتىگىن ايتتى
30 قىركۇيەك, 18:24

ىشكى ىستەر ءمينيسترى پوليتسەيلەر حالىقپەن قالاي سويلەسۋى كەرەكتىگىن ايتتى

وسكەمەن. قازاقپارات – ق ر ىشكى ىستەر ءمينيسترى مارات احمەتجانوۆ شىعىس قازاقستان وبلىسىنىڭ تۇرعىندارىمەن ەسەپتىك كەزدەسۋىندە پوليتسيا جۇمىسىنىڭ تيىمدىلىگىن ارتتىرۋ ماقساتىندا قانداي شارالار اتقارىلىپ جاتقانىن ايتىپ بەردى، دەپ حابارلايدى قازاقپارات ءتىلشىسى.

«پوليتسەيلەردى باتىس ەلدەرىندەگى سەكىلدى حالىقپەن سىپايى سويلەسۋگە ۇندەپ جاتىرمىز. وزىنە جۇگىنگەن ءار ازاماتتان «قالىڭىز قالاي؟»، «سىزگە قالاي كومەكتەسە الامىن؟» دەپ سۇراپ، ايتقان ماسەلەسىن مۇقيات تىڭداي ءبىلۋى شارت. ءبىراق ساقشىلار شىن ىقىلاسىمەن ءدال وسىلاي سويلەسۋى ءۇشىن ولارعا ءتيىستى جاعداي جاسالۋى قاجەت. ەگەر ءۇيى جوق، جالاقىسىن ۋاقتىلى الا الماي، اۋىر جۇكتەمەدەن شارشاپ جۇرگەن بولسا وندا بىردەڭە تالاپ ەتە المايسىڭ»، - دەدى مينيستر.

ونىڭ ايتۋىنشا، سوندىقتان پوليتسيا قىزمەتكەرلەرىنىڭ ماتەريالدىق جاعدايىن جاقسارتۋعا، جۇمىستارىن جەڭىلدەتۋ ماقساتىندا ءبىرقاتار شارا اتقارىلۋدا. ماسەلەن، ەسەپ تولتىرۋ سەكىلدى كەرەكسىز جۇمىستاردان بوساتىلىپ جاتىر.

«بۇرىن پوليتسەيدىڭ جۇمىس ۋاقىتىنىڭ %50 قاعاز تولتىرۋعا كەتەتىن. بۇل ۇستىنەن قارايتىن باسشىلىققا ەسەپ بەرۋ ءۇشىن جاسالاتىن. ال قازىر ونداي جوق. وسى ۋاقىتتى ول حالىقپەن جۇمىس ىستەۋگە جۇمساسا الدەقايدا ءتيىمدى. ءبىراق ءبىر كۇندە ءبارىن وزگەرتە سالۋ مۇمكىن ەمەس. بۇل باعىتتاعى جۇمىستاردى الداعى ۋاقىتتا دا جالعاستىرامىز»، - دەدى مارات احمەتجانوۆ.

جاڭالىقتار