استانادا ۋچاسكەلىك پوليتسيا پۋنكتتەرىنىڭ سانى ارتادى

استانا. قازاقپارات - ەلوردادا الداعى ءۇش جىلدىڭ ىشىندە ۋچاسكەلىك پوليتسيا پۋنكتتەرىنىڭ سانى ەسەلەپ ارتادى.

بۇل تۋرالى استانا قالالىق پوليتسيا دەپارتامەنتىنىڭ باستىعى مارات تولەبايەۆ ايتتى، دەپ حابارلايدى قازاقپارات ءتىلشىسى.

«پوليتسيانىڭ قادامدىق جەردەگى قولجەتىمدىلىگى قاعيداتى ەنگىزىلىپ جاتىر. وتكەن جىلى قالادا مودۋلدىك ۇلگىدەگى 10 ستاتسيونارلىق بەكەت ورناتىلدى. ۋچاسكەلىك پوليتسيا پۋنكتتەرىنىڭ سانى 27 دەن 42 گە دەيىن ۇلعايتىلدى. الداعى ءۇش جىلدا ولاردى ەكى ەسەگە ارتتىرۋدى جوسپارلاپ وتىرمىز»، - دەدى ول ەلوردا ءماسليحاتىنىڭ وتىرىسىندا.

سونداي-اق، ونىڭ ايتۋىنشا، ادامدار كوپ جينالاتىن جەرلەردە پوليتسيانى شۇعىل شاقىرۋ دابىلىن بەرۋ ءۇشىن 13 SOS تۇيمەسى ورناتىلعان. بارلىعى 24 مىڭعا جۋىق سيگنال كەلىپ ءتۇستى، ولار بويىنشا ءتيىستى ءىس-شارا قابىلداندى.

«الماتى اۋدانىنىڭ اۋماعىندا «پوليتسيانىڭ قازاقستاندىق سەرۆيستىك مودەلى» پيلوتتىق جوباسى قولعا الىندى. ونىڭ ستراتەگياسى ازاماتتارعا ساپالى پوليتسيا قىزمەتتەرىن كورسەتۋ جانە قاۋىپسىزدىك ماسەلەلەرىن شەشۋ قاعيداتتارىنا نەگىزدەلگەن. جوبا ىسكە اسىرىلا باستاعاننان بەرى ۋچاسكەلىك پوليتسەيلەردىڭ تانىمالدىق دەڭگەيى ءۇش ەسەگە ارتتى. ولاردىڭ جۇمىسىنىڭ اقپاراتتىق قامتىلۋى ءوستى. ۋچاسكەلىك پوليتسەيلەردىڭ كۇندەلىكتى جۇمىس پروتسەستەرى ۇتىمدى بولا ءتۇستى. ەندى ولاردىڭ حالىقپەن جۇمىس ىستەۋگە كوبىرەك ۋاقىتى بار. بيىل سارىارقا اۋدانى بويىنشا تاعى ءبىر پيلوتتىق جوبانى ىسكە قوستىق. جۇمىس جۇرگىزىلىپ جاتىر»، - دەدى مارات تولەبايەۆ.