ەلوردادا قىلمىس سانىنىڭ ارتۋى بايقالادى

استانا. قازاقپارات - ەلوردادا ەسىرتكىگە قاتىستى جاعداي كۇردەلى بولىپ وتىر.

بۇل تۋرالى استانا قالالىق پوليتسيا دەپارتامەنتىنىڭ باستىعى مارات تولەبايەۆ ايتتى، دەپ حابارلايدى قازاقپارات ءتىلشىسى.

«جالپى، جەدەل جاعداي تۇراقتى. ستاتيستيكاعا سايكەس، قىلمىستاردى تىركەۋدىڭ شامالى ءوسۋى بايقالادى. سونىمەن قاتار، بۇل قىلمىستىق جاعدايدىڭ اسقىنۋىمەن بايلانىستى ەمەس. قىلمىس كورسەتكىشى وتكەن جىلدىڭ دەڭگەيىندە قالىپ وتىر. قابىلدانعان ءىس-شارالار كىسى ءولتىرۋ، زورلاۋ، توناۋ، قاراقشىلىق جانە بۇزاقىلىق سياقتى قىلمىستاردىڭ سانىن ازايتۋعا مۇمكىندىك بەردى. كىسى ءولتىرۋ، دەنساۋلىققا اۋىر زيان كەلتىرۋ، زورلاۋ، توناۋ، ۇرلىق، كولىك ۇرلىعى جانە ينتەرنەت-الاياقتىقتىڭ اشىلۋى جاقساردى»، - دەدى ول ەلوردا ءماسليحاتىنىڭ وتىرىسىندا.

مارات تولەبايەۆتىڭ دەرەگىنشە، 146 ەسىرتكى قىلمىسى انىقتالدى. ونىڭ ىشىندە 107 ساتۋ فاكتىسى اشكەرەلەندى. ەسىرتكىنىڭ 200 دەن استام ءتۇرى تاركىلەندى. بۇل 2021-جىلمەن سالىستىرعاندا جەتى ەسە كوپ. ءتورت ەسىرتكى زەرتحاناسىنىڭ قىزمەتى توقتاتىلدى، 66 ەسىرتكى سايتى بۇعاتتالدى. ۇزاق مەرزىمدى ارنايى وپەراتسيانى جۇرگىزۋ بارىسىندا تۇراقتى ارنا جويىلدى. ەلوردا اۋماعىندا ەسىرتكى جەتكىزۋدى جانە ساتۋدى جۇزەگە اسىراتىن ۇيىمداسقان قىلمىستىق توپتىڭ ارەكەتىنە جول بەرىلمەدى. ۇيىمداستىرۋشى، ەسىرتكىنى نەگىزگى جەتكىزۋشى جانە جامبىل قىلمىستىق توبىنىڭ بەس مۇشەسى ۇستالدى. زاڭسىز اينالىمنان 37 كەلى گاشيش تاركىلەندى.

«قابىلدانعان ءىس-شارالار جەتكىلىكسىز ەكەنىن تۇسىنەمىز. قالاداعى ەسىرتكى جاعدايى كۇردەلى بولىپ وتىر. وسى باعىتتاعى جۇمىستىڭ تيىمدىلىگىن ارتتىرۋعا بار كۇشىمىزدى سالامىز. قازىرگى ۋاقىتتا ىشكى ىستەر مينيسترلىگى مەملەكەت باسشىسىنىڭ تاپسىرماسىمەن ناشاقورلىققا جانە ەسىرتكى بيزنەسىنە قارسى كۇرەس جونىندەگى جاڭا كەشەندى جوسپار ازىرلەنۋدە. وندا جوسپارلانعان ءىس-شارالاردى ىسكە اسىرۋعا قاتىساتىن بارلىق سۋبەكتىلەردىڭ جاۋاپكەرشىلىگىن ارتتىرۋ كوزدەلگەن»، - دەدى ەلوردانىڭ باس پوليتسەيى.