مەكتەپ وقۋشىسىنا مانتۋدىڭ ورنىنا ب س ج سالۋ وقيعاسى: اقتوبەگە ارنايى كوميسسيا كەلدى
30 قىركۇيەك, 08:25

مەكتەپ وقۋشىسىنا مانتۋدىڭ ورنىنا ب س ج سالۋ وقيعاسى: اقتوبەگە ارنايى كوميسسيا كەلدى

اقتوبە. قازاقپارات - ەلىمىزدىڭ جەتەكشى ماماندارى مانتۋ سىناماسىنىڭ ورنىنا ۆاكتسينا العان اقتوبەلىك وقۋشىلاردى تەكسەرىپ جاتىر.

اقتوبەگە ق ر دەنساۋلىق ساقتاۋ مينيسترلىگىنىڭ ارنايى كوميسسياسى كەلدى، دەپ حابارلايدى قازاقپارات ءتىلشىسى.

اقتوبەگە ق ر دەنساۋلىق ساقتاۋ مينيسترلىگىنىڭ ارنايى كوميسسياسى كەلىپ، №74-مەكتەپتىڭ 1-سىنىپ وقۋشىلارىنىڭ اتا- انالارىمەن كەزدەستى. دەلەگاتسيانى دەنساۋلىق ساقتاۋ ۆيتسە-ءمينيسترى - باس مەملەكەتتىك سانيتارلىق دارىگەر ايجان ەسماعامبەتوۆا باسقارادى.


«جاعداي ءمينيستردىڭ جەكە باقىلاۋىندا. قىزمەتتىك تەرگەۋ باستالدى، كوميسسيا قۇرىلدى، جوسپاردان تىس تەكسەرۋلەر دە جۇرگىزىلىپ جاتىر. ەپيدەميولوگيالىق تەكسەرۋدىڭ قورىتىندىسى بويىنشا جانە ساراپتاما ناتيجەسىنىڭ نەگىزىندە وقيعاعا باعا بەرىلىپ، مەديتسينا قىزمەتكەرلەرىن جاۋاپقا تارتۋ تۋرالى شەشىم قابىلدانادى. بارلىق بالا ءجىتى باقىلاۋدا بولادى»، - دەدى ايجان ەسماعامبەتوۆا.


كەزدەسۋ بارىسىندا اتا-انالار ماماندارعا سۇراقتارىن قويىپ، جاۋاپ الدى. ال مانتۋ سىناماسىنىڭ ورنىنا ب س ج ۆاكسيناسىن العان بالالار مەكتەپتە ساباققا قاتىسىپ، سونىمەن قاتار مەديتسينالىق تەكسەرۋدەن وتەدى. بۇگىن ولاردى اقتوبەگە كەلگەن رەسپۋبليكالىق ۇلتتىق فتيزيوپۋلمونولوگيالىق ورتالىقتىڭ، پەدياتريا جانە بالالار حيرۋرگياسى عىلىمي ورتالىعىنىڭ جەتەكشى ماماندارى تەكسەردى.


اقتوبە وبلىسى اكىمى باسپا ءسوز قىزمەتىنىڭ حابارلاۋىنشا، جاعداي اقتوبە وبلىسىنىڭ اكىمى ەرالى توعجانوۆتىڭ ەرەكشە باقىلاۋىندا. ايماق باسشىسىنىڭ تاپسىرماسىمەن بۇگىن مەكتەپ مەملەكەتتىك ەمحانانىڭ قىزمەتىنە بەرىلدى. بالالاردىڭ دەنساۋلىعىن تۇراقتى باقىلاۋ ماقساتىندا قالاداعى ۇزدىك دارىگەرلەردىڭ اراسىنان شىققان پەدياترلار ەكى اي بويى ءبىلىم وشاعىندا كەزەكشىلىكتە بولادى.

ەسكە سالساق، وسى دەرەككە قاتىستى قىلمىستىق ءىس قوزعالدى. تەرگەۋ ءجۇرىپ جاتىر.

جاڭالىقتار