تيك توك قازاقستاندا ءوز وكىلدىگىن اشۋعا نيەتتى
30 قىركۇيەك, 08:10

تيك توك قازاقستاندا ءوز وكىلدىگىن اشۋعا نيەتتى

استانا. قازاقپارات - الەمگە ايگىلى TikTok ۆيدەو سەرۆيسى قازاقستاندا ءوز بيزنەسىن دامىتۋعا نيەتتى.

بۇل تۋرالى «اقوردا. Livە» - كە TikTok ۆيتسە- پرەزيدەنتى تەو بەرترام ايتتى، دەپ حابارلايدى قازاقپارات ءتىلشىسى.

TikTok ۆيتسە- پرەزيدەنتى تەو بەرترام Digital Bridge فورۋمىنا قاتىسۋ ءۇشىن قازاقستان استاناسىنا ارنايى كەلدى.

«مەنىڭ ويىمشا، قازاقستاننىڭ بولاشاعى ماڭىزدى تاقىرىپ بولىپ وتىر. ەلدەگى سيفرلىق ەكونوميكانىڭ ءوسۋ مۇمكىندىگى تۋرالى شىنىمەن شابىتتاندىراتىن جانە اسەرلى پىكىرتالاستار بولدى»، - دەدى تەو بەرترام باعدارلاما جۇرگىزۋشىسى ءانۋار كاربوزوۆقا.

ول كومپانيانىڭ قازاقستانداعى وكىلدىگىن اشۋ جوسپارلانىپ وتىر ما، دەگەن سۇراققا جاۋاپ بەردى.

«ءيا، بۇگىن تاڭەرتەڭ ءبىز ءوز بيزنەسىمىزدى وسىندا دامىتاتىنىمىزدى جاريالادىق. ياعني كەڭسەمىزدى اشامىز. قازاقستان - قازاقستاندىقتاردىڭ شىعارماشىلىعى مەن كاسىپكەرلىگى تۇرعىسىنان ءوسۋ ايماعى عانا ەمەس. ءبىز بۇل ەلدى ايماقتىق حاب رەتىندە دە كورەمىز»، - دەدى كومپانيانىڭ ۆيتسە-پرەزيدەنتى.

ونىڭ ايتۋىنشا، قازاقستان پرەزيدەنتىنىڭ سيفرلىق تەحنولوگيالاردىڭ دامۋىنا قولداۋ كورسەتۋى قۋانتادى.

«مەنىڭ ويىمشا، قازاقستان دۇرىس باعىتتا كەلە جاتىر. مەن مۇندا كوپتەگەن كرەاتيۆتى بلوگەرلەر مەن كونتەنت جاساۋشىلاردى كەزدەستىردىم. ولاردىڭ بارلىعى قازاقستاننىڭ عانا ەمەس، بۇكىل الەمنىڭ اۋديتورياسىن قامتىعىسى كەلەدى. سوندىقتان TikTok ولارعا كومەكتەسە الادى»، - دەيدى ول.

سونداي-اق، تەو بەرترام استاناعا العاش رەت كەلىپ تۇرعانىن ايتتى.

«پرەزيدەنتپەن ءوسۋ مۇمكىندىكتەرى تۋرالى جانە TikTok-تىڭ كونتەنت جاساۋشىلارعا پلاتفورمانى قالاي ۇسىنا الاتىنى تۋرالى سويلەستىك. مەنىڭشە، ءبىز سياقتى كومپانيالارعا ۇكىمەتتىڭ ءتيىمدى سيفرلىق بولاشاقتى قالاي قالىپتاستىرامىز دەگەن ماسەلەنى نازارعا الۋى ماڭىزدى. وسى شاراعا كەلگەنىمە وتە قۋانىشتىمىن»، - دەپ اتاپ ءوتتى تەو بەرترام.

بۇعان دەيىن مەملەكەت باسشىسى جىل سايىنعى «Digital Bridge 2022» حالىقارالىق تەحنولوگيالىق فورۋمىنا قاتىسقانى حابارلانعان بولاتىن.

جاڭالىقتار