ۇلى دالا جورىعى: ۇزدىكتەر انىقتالدى - فوتو
30 قىركۇيەك, 07:25

ۇلى دالا جورىعى: ۇزدىكتەر انىقتالدى - فوتو

تۇركىستان. قازاقپارات- استانادان باستاۋ العان «ۇلى دالا جورىعى» رەسپۋبليكالىق مارافونى تۇركىستان قالاسىندا قورىتىندىلاندى، دەپ حابارلايدى قازاقپارات ءتىلشىسى.

ەلىمىزدە العاش رەت ۇيىمداستىرىلعان «ۇلى دالا جورىعى» مارافون- بايگەسى مارەگە جەتتى. 12 كۇن بۇرىن استانا قالاسىندا باستاۋ العان الامان بارىسىندا شاباندوزدار 1200 شاقىرىمدى باعىندىردى. سايىستىڭ سوڭعى كۇنىندە 4 كوماندا عانا جارىس جولىن جالعاستىرىپ تۇركىستانعا جەتتى. ولار - تۇركىستان، ماڭعىستاۋ، جەتىسۋ جانە جامبىل وبلىستارىنىڭ شاباندوزدارى.


ۇلتتىق سپورتتى ۇلىقتاعان مارافونعا قاتىسۋشىلاردى جانكۇيەرلەر قاۋىمى ىستىق ىقىلاسپەن قارسى الدى.

شاباندوزدارعا تۇركىستان وڭىرىندەگى ات سپورتىنىڭ جانكۇيەرلەرى قولداۋ كورسەتىپ، اربىرىنە العىستارىن ءبىلدىردى.

«ۇلى دالا جورىعى» مارافون بايگەسىن ۇيىمداستىرۋشىلارىنىڭ ءبىرى ارمان ابدوللايەۆتىڭ ايتۋىنشا، بۇل بايگەدە قازاق جىلقىلارىنىڭ مارتەبەسى اسقاقتاي تۇسكەن.

«بيىل تۇڭعىش رەت ءوتىپ وتىرعان بۇل بايگەنىڭ بالاماسى الەمدە جوق دەۋگە بولادى. جارىستى ۇيىمداستىرار بارىسىندا ءبىز جان- جاقتى زەرتتەپ كوردىك. 1200 شاقىرىمدى ءارى بىرنەشە ءوڭىردى قامتيتىن كوشپەلى بايگە الەمدە جوق. تاعى ءبىر ايتا كەتەرلىگى، وسى بايگەنى قاداعالاپ، زەرتتەپ جۇرگەن ماماندار قازاق تۇلپارلارىنىڭ شىدامدىلىعىنا تاڭعالىپ وتىر. ءبىزدىڭ ماقسات تا - ۇلتتىق سپورتتى ۇلىقتاۋ، قازاقتى ات سپورتىنا قىزىقتىرۋ ءارى ۇلى دالامىزدىڭ تۇلپارلارىن دارىپتەۋ. بىرنەشە وبلىستى باسىپ ءوتىپ، ۇلكەن قيىندىقتاردى جەڭە بىلگەن ءاربىر شاباندوز قۇرمەتكە لايىق. تۇركىستان وبلىسى تۇرعىندارىنا العىسىمىز مول. سوزاق دالاسىندا قوشەمەتپەن قارسى الىپ، شاباندوزدارعا جىگەر بەردى. وسى مارافوندا ەڭ كوپ جانكۇيەر تۇركىستان وبلىسىندا جينالدى. بۇل - وڭىردە ۇلتتىق سپورت جاناشىرلارىنىڭ كوپتىگىنىڭ بەلگىسى»، - دەدى ول.


مارافونعا قاتىسۋشىلارعا تۇركىلەردىڭ كيەلى جەرلەرى - جوشى حان، الاشا حان كەسەنەلەرى، سونداي- اق قازاق حاندىعىنىڭ العاشقى استاناسى سوزاق قالاسى پەن تۇركى رۋحانياتىنىڭ بەسىگى تۇركىستان قالاسى سياقتى تاريحي ورىندارعا، ازىرەت- سۇلتان كەسەنەسىنە زيارات جاسادى.

جەڭىمپازداردى ماراپاتتاۋ تۇركىستان تورىندە جالعاستى.

سالتاناتتى شارادا ءسوز العان ق ر مادەنيەت جانە سپورت ءمينيسترى داۋرەن ابايەۆ ۇزدىكتەر مەن جانكۇيەرلەردى قۇتتىقتاپ، ءىس شارانىڭ ماڭىزدىلىعىنا توقتالىپ ءوتتى.

«AMANAT» پارتياسىنىڭ اتقارۋشى حاتشىسى اسحات ورالوۆ دالا ءداستۇرى مەن ۇلى كوشپەندىلەر مادەنيەتى قايتا جاڭعىرعانىنا توقتالسا، تۇركىستان وبلىسىنىڭ اكىمى دارحان ساتىبالدى تەڭدىسسىز جوبا قازاق رۋحانياتى مەن سپورتىن جوعارى دەڭگەيگە كوتەرگەنىن جەتكىزدى. «The Great Steppe tour» قوعامدىق قورىنىڭ ءتوراعاسى الىبەك الدەنەي مارافوندى حالىقارالىق دەڭگەيدە وتكىزۋ كەرەكتىگىن ايتتى.


12 كۇنگە سوزىلعان «ۇلى دالا جورىعى» رەسپۋبليكالىق مارافونىنىڭ ناتيجەسىندە ءبىرىنشى ورىن يەگەرى اتانعان ماڭعىستاۋ ءوڭىرىنىڭ «كوكمايناق» كومانداسىنا داۋرەن ابايەۆ پەن اسحات ورالوۆ سەرتيفيكات پەن مەدالدى تارتۋ ەتتى. بايگەنىڭ جەڭىمپازدارىنا 24 ميلليون تەڭگە كولەمىندە جۇلدە تابىستالدى.

ال، ەكىنشى ورىندى جەتىسۋ وبلىسىنىڭ «جەتىسۋ» كومانداسى جەڭىپ الىپ، 12 ميلليون تەڭگەنى يەلەندى.

ات بايگەسىنىڭ قورىتىندىسىنا سايكەس، ءۇشىنشى ورىندى تۇركىستان وبلىسىنىڭ «تەرىسكەي» كومانداسى قول جەتكىزدى. ولار 9 ميلليون تەڭگە سىياقىنى قانجىعالارىنا بايلادى.

ءتورتىنشى ورىننان كورىنگەن جامبىلدىقتار دا قارجىلاي سىيلىققا يە بولدى.

ءىس- شارا بارىسىندا ءبىرشاما شاباندوزدارعا ارنايى ماراپات تابىستالدى.

الامان- بايگەنىڭ جابىلۋ سالتاناتى كونسەرتتىك باعدارلامامەن ۇلاستى.

ايتا كەتەيىك، ق ر مادەنيەت جانە سپورت مينيسترلىگى جانە «The Great Steppe tour» قوعامدىق قورىنىڭ باستاماسىمەن، «AMANAT» پارتياسىنىڭ قولداۋىمەن 18-قىركۇيەك كۇنى استانا قالاسىندا «ۇلى دالا جورىعى» مارافون- بايگەسى باستالعان بولاتىن.

ءىس شارانىڭ اشىلۋ سالتاناتىندا ءماجىلىس ءتوراعاسى ەرلان قوشانوۆ مەملەكەت باسشىسى قاسىم- جومارت توقايەۆتىڭ الامانشىلاردى قۇتتىقتاۋ حاتىن وقىپ بەرگەن ەدى.

مەملەكەت باسشىسى قاسىم-جومارت توقايەۆ تۇركىستان وبلىسىنا جاساعان جۇمىس ساپارىندا جانە مارافون- بايگەنىڭ اشىلۋ راسىمىندە جولداعان قۇتتىقتاۋ حاتىندا بۇل شارانىڭ ماڭىزدىلىعىنا اتاپ ءوتىپ، ۇلتتىق سپورتتى جاڭعىرتۋ ارقىلى رۋحاني سەرپىلىس اكەلۋ باستى ماقسات ەكەنىن جەتكىزگەن بولاتىن.

جاڭالىقتار