ب ق و اكىمى شەكارادا قالىپتاسقان جاعدايعا بايلانىستى جيىن وتكىزدى
29 قىركۇيەك, 21:46

ب ق و اكىمى شەكارادا قالىپتاسقان جاعدايعا بايلانىستى جيىن وتكىزدى

ورال. قازاقپارات - ەڭ ماڭىزدى ماسەلە - رەسەيمەن شەكارادا تۇرعان قازاقستان ازاماتتارىن ەلگە قايتارۋ.

بۇل تۋرالى وبلىس اكىمدىگىندە وتكەن شەكارا ماسەلەلەرى جونىندەگى ۇيلەستىرۋ كەڭەسىندە ب ق و اكىمى عالي ەسقاليەۆ ءمالىم ەتتى، دەپ حابارلايدى قازاقپارات ءتىلشىسى.

ءوڭىر باسشىسى عالي ەسقاليەۆ رەسەي شەكارا ۆەدومستۆوسىمەن بىرگە شەكارا قىزمەتى دەپارتامەنتىنە قازاقستاندىق ازاماتتارعا كومەك كورسەتۋ بويىنشا ماسەلەنى شەشۋدى تاپسىردى.

سونداي- اق وبلىس اكىمى وسى تۇيتكىلدى شەشۋ ءۇشىن قازاقستان ۇكىمەتىنە ۇسىنىستار جىبەردى، ولار جەدەل تۇردە قارالۋدا.

تاعى ءبىر ماڭىزدى مىندەت – ب ق و اۋماعىندا قالعان ر ف ازاماتتارىن ەسەپكە الۋدى قامتاماسىز ەتۋ. وبلىس اكىمى شەتەلدىكتەردى قابىلدايتىن ازاماتتار ءۇش تاۋلىك ىشىندە پوليسيا ورگاندارىنا ولاردىڭ كەلگەنى تۋرالى حابارلاۋى ءتيىس ەكەنىن اتاپ ءوتتى. وسىعان وراي وبلىس اكىمىنىڭ ورىنباسارى باقىتجان نارىمبەتوۆ كوشى- قون قىزمەتىمەن بىرلەسىپ، باتىس قازاقستاندىقتار مەن ميگرانتتاردىڭ قۇقىقتارى مەن جاۋاپكەرشىلىگىنە بايلانىستى ءتۇسىندىرۋ جۇمىستارىن كۇشەيتۋ، حابارلاندىرۋ سانىن ۇلعايتۋ جانە قاجەتتى اقپاراتى بار سمس تاراتۋدى ۇيىمداستىرۋى قاجەت.

زاڭسىز جالعا بەرىلەتىن تۇرعىن ۇيلەردىڭ كوپتىگىن ەسكەرە وتىرىپ، پوليسيا دەپارتامەنتى مەملەكەتتىك كىرىستەر دەپارتامەنتىمەن بىرلەسىپ، وسىنداي جالعا بەرۋشىلەردى انىقتاۋ جانە زاڭناماعا سايكەس شارالار قابىلداۋى ءتيىس. عالي ناجىمەدەن ۇلى مۇنداي ازاماتتارعا جالعا بەرۋ قۇقىعىن رەسىمدەۋ كۇردەلى ەمەس ەكەنىن جانە مەملەكەتتىك كىرىستەر دەپارتامەنتى ورگاندارى ايىپپۇل سانكسيالارىن قولدانۋدان باسقا، وسىنداي جالعا بەرۋشىلەردى تىركەۋگە كونسۋلتاتسيالىق كومەك كورسەتۋى ءتيىس ەكەنىن ەسكە سالدى. سيفرلىق تەحنولوگيالار باسقارماسىنا قىزمەت بازاسىندا كوشى- قون زاڭناماسى ماسەلەسى بويىنشا ميگرانتتار مەن جالعا بەرۋشىلەرگە 109 ءنومىرى بويىنشا كەڭەس بەرۋدى ۇيىمداستىرۋ جۇكتەلدى.

قازىرگىدەي كەزدە قازاقستان ازاماتتارىنىڭ دا، كوشىپ- قونۋشىلاردىڭ دا قاۋىپسىزدىگىن قامتاماسىز ەتۋ اسا ماڭىزدى. ءوڭىر باسشىسى پوليسيا دەپارتامەنتىنە جەكە قۇرامدى كۇشەيتىلگەن رەجيمگە كوشىرۋدى، ءوزىنىڭ ورىنباسارى باقىتجان نارىمبەتوۆكە باتىس قازاقستان وبلىسى اۋماعىندا قوعامدىق ءتارتىپتى قامتاماسىز ەتۋگە، قۇقىق بۇزۋشىلىقتاردىڭ الدىن الۋ جانە بولدىرماۋ ماقساتىندا قۇرىلعان حالىق جاساقتارىن پوليسيا دەپارتامەنتىنىڭ قاراماعىنا جىبەرۋدى تاپسىردى.

ەسكە سالا كەتەيىك، بۇدان بۇرىن ب ق و اكىمدىگىنىڭ رەسەيمەن شەكاراداعى احۋال تولىق باقىلاۋدا ەكەندىگى تۋرالى ءمالىم ەتكەنىن جازعان بولاتىنبىز.

جاڭالىقتار