اتىراۋلىق كەلىنشەك گيدروپونيكا ادىسىمەن مال ازىعىن دايىنداۋدى قولعا الدى

None
اتىراۋ. قازاقپارات - اتىراۋلىق كەلىنشەك گيدروپونيكا ادىسىمەن مال ازىعىن دايىنداۋدى قولعا الدى، دەپ حابارلايدى قازاقپارات ءتىلشىسى.

جىلىوي اۋداندىق اۋىل شارۋاشىلىعى ءبولىمىنىڭ باسشىسى نۇرتاس قۋاتبايەۆتىڭ دەرەگىنە سۇيەنسەك، بىلتىر ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 -جىلدارعا ارنالعان «ەڭبەك» باعدارلاماسىمەن 100 كاسىپكەر قايتارىمسىز گرانت العان.

سونىڭ ءبىرى - نۇرگۇل داۋلەتوۆا. قايتارىمسىز گرانتتىڭ 580 مىڭ تەڭگەدەن استام قارجىسىمەن جەكە ءىسىن باستاعان.

«گيدروپونيكا ادىسىمەن مال ازىعىن دايىنداۋدىڭ قىر- سىرىن كۇيەۋىم بيماعانبەت جۇماقاشيەۆپەن بىرگە ونلاين كۋرستا وقۋ ارقىلى ۇيرەندىم. قازىر كوكونىستەردى، مالعا ارنالعان ءشوپتى توپىراقسىز، قورەكتىك زاتتاردىڭ سۋداعى ەرىتىندىسى ارقىلى وسىرەمىن. باستاپقىدا گيدروپونيكا ادىسىمەن ازداعان جىلقىمىز ءۇشىن مال ازىعىن دايىندادىق. كەيىن ءىسىمىز العا باسىپ، وسىرگەن مال ازىعىنىڭ ارتىعىن ساتىلىمعا شىعاردىق»، - دەيدى كاسىپكەر.

ونىڭ ايتۋىنشا، قازىر اتالمىش ادىسپەن وسىرىلگەن كوك بالاۋساعا سۇرانىس ارتىپ كەلەدى. اسىل تۇقىمدى ەشكى مەن سيىر ۇستايتىن تۇرعىنداردان سۇرانىس ءجيى تۇسەدى.

«كوپشىلىك بۇل ءادىستى بىلە بەرمەيتىن سەكىلدى. ونىمەن مال ازىعىن دايىنداۋ وڭاي ءارى قىزىق. بازاردان ساتىپ الىنعان بيداي نەمەسە ارپانىڭ ءدانىن الدىمەن جۋىپ، تازالايمىز. سودان سوڭ ارنايى ىدىستارعا سالىپ، ءۇش مەزگىل سۋ قۇيامىز. ىدىسقا سالىنعان ءداندى داقىل ءبىر اپتادا كوك بالاۋسا شوپكە اينالادى. وسىلاي وسىرىلگەن كوك بالاۋسانىڭ بيىكتى 20 س م- گە دەيىن جەتەدى»، - دەيدى ن. داۋلەتوۆا.

ەسكە سالا كەتەلىك، بۇعان دەيىن اتىراۋ دالاسىندا قۇلپىناي وسىرىلە باستاعانىن جازعان بولاتىنبىز.

سوڭعى جاڭالىقتار