ەكى اپتا ىشىندە بارلىق نىسانعا جىلۋ بەرىلەدى

None
استانا. قازاقپارات - ەلوردادا «استانا - تەپلوترانزيت» مەكەمەسىنىڭ جانە جىلۋ قازاندىقتارىنىڭ قىس مەزگىلىنە دايىندىعى پىسىقتالدى، دەپ حابارلايدى قازاقپارات ءتىلشىسى.

استانادا جىلۋ بەرۋ ماۋسىمىنا دايىندىق بارىسى تەكسەرىلدى

بۇگىن ەلوردادا قوعامدىق كەڭەس مۇشەلەرى قالاداعى جىلۋ بەرۋگە جاۋاپتى مەكەمەلەردىڭ قىسقا دايىندىعى بارىسىن باقىلادى.

رەيد بارىسىندا جەلەزنودوروجنىي تۇرعىن ءۇي الابىنداعى اۆتونومدى جىلۋ قازاندىعى، «استانا- تەپلوترانزيت» ا ق جانە بايقوڭىر اۋدانىندا ورنالاسقان 2- جىلۋ ەلەكتر ورتالىعىنىڭ (ج ە و-2) جۇمىسى بارىسى تەكسەرىلدى.

«ءبىزدىڭ ۇيىمعا قاراستى 55 ماگيسترالدى جىلۋ جەلىسى بار. ولاردىڭ ءبارى سىناقتان ءوتتى، قىس مەزگىلىنە دايىن. بيىل جىلۋ بەرۋ ماۋسىمىنا دايىندىق بارىسىندا قالا بويىنشا 15 شاقىرىم جىلۋ بەرۋ جۇيەسى جوندەۋدەن ءوتتى. وسىلايشا ءبىزدىڭ مەكەمە قىسقا 99 پايىز دايىن. جىلۋ بەرۋ نىساندارى بىرنەشە ساناتقا بولىنەدى. ياعني الەۋمەتتىك نىساندار، تۇرعىن ۇيلەر جانە مەكەمەلەر. قالا اكىمدىگىنىڭ شەشىمىنە سايكەس بۇگىن ەلوردا بويىنشا 200 دەن استام نىسانعا جىلۋ بەرىلدى»، - دەدى «استانا- تەپلوترانزيت» ا ق باسقارما ءتوراعاسىنىڭ ورىنباسارى، باس ينجەنەر ابزال ساۋعابايەۆ.

ونىڭ ايتۋىنشا، جىلۋ بەرۋ پروتسەسى كەزەڭ بويىنشا جۇرگىزىلەدى. جىلۋ الدىمەن الەۋمەتتىك نىساندارعا بەرىلەدى. ونىڭ قاتارىندا بالاباقشا، مەكتەپ، اۋرۋحانا بار.

«ءۇشىنشى كەزەكتە ءوندىرىس نىساندارىنا جىلۋ بەرىلەدى. ەلوردادا اۋا رايىنىڭ اياق استىنان سۋىپ كەتۋىنە بايلانىستى الەۋمەتتىك نىساندارعا جىلۋ 26-قىركۇيەكتە بەرىلە باستادى. بۇگىن ءىشىنارا تۇرعىن ۇيلەر قوسىلدى. جالپى 1,5-2 اپتانىڭ ىشىندە قالا بويىنشا بارلىق نىسانعا جىلۋ بەرىلەدى. بەكىتىلگەن ەرەجەگە سايكەس ەگەر اۋا رايى 10 گرادۋستان تومەن بولسا وندا جىلىتۋ ۋاقىتىنان بۇرىن باستالادى. قازىر استانادا اۋا رايى -10 گرادۋس، سوندىقتان جىلۋ بەرىلىپ جاتىر»، - دەيدى ول.

«استانا- تەپلوترانزيت» ا ق وكىلى كەلتىرگەن مالىمەت بويىنشا ەلوردادا ورتالىقتاندىرىلعان جىلۋعا قوسىلاتىن 3 مىڭنان استام تۇرعىن ءۇي بار.

«بۇگىندە ەلوردانى گازبەن قامتۋ قارقىندى ءجۇرىپ جاتىر. قازىر قالا ماڭىنداعى 10 تۇرعىن ءۇي الابىنا كوگىلدىر وتىن بەرىلۋدە. سوڭعى مالىمەتكە سايكەس 6 مىڭعا جۋىق جەكە تۇرعىن ءۇي گازعا قوسىلدى. سونىمەن قاتار بيىل قالاداعى جەو-2 تولىقتاي گازعا كوشىرىلدى. ال ج ە و-1 بويىنشا 10 قازاندىق كوگىلدىر وتىنعا اۋىستىرىلدى. جىلۋ ماۋسىمىنا دايىندىق بيىل ساۋىردەن باستالدى. ياعني جىلۋ بەرۋ قالاي اياقتالدى، سول ساتتە كەلەسى ماۋسىمعا دايىندىقتى باستاپ كەتتىك»، - دەدى استانا قالاسىنىڭ اكىمدىگى وتىن- ەنەرگەتيكا رەسۋرستار ءبولىمىنىڭ باسشىسى ماقسات ەسماعۇلوۆ.

سوڭعى جاڭالىقتار