قازاقستاندا مىندەتتى اۆتوساقتاندىرۋ تاريفتەرى وزگەرەدى
بۇل وزگەرىستەر «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ساقتاندىرۋ نارىعىن جانە باعالى قاعازدار نارىعىن رەتتەۋ مەن دامىتۋ بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدا جازىلعان.
«زاڭدا يكەمدى تاريفتەۋ جۇيەسىنە كوشۋ كوزدەلگەن، ياعني تاريفتەر قازاقستان وڭىرلەرىنىڭ ناقتى شىعىندارىن ەسكەرە وتىرىپ، جىل سايىن جاڭارتىلاتىن بولادى. شىعىن تومەن وڭىرلەردە تاريفتەر تومەن بولادى، ال شىعىن كوپ بولعان جەرلەردە نە بۇرىنعى دەڭگەيدە قالادى، نە ۇلعايتۋ ءۇشىن قايتا قارالادى. يكەمدى تاريفتەۋ تەتىگى جۇرگىزۋشىلەردى جۇرگىزۋ دەرەكتەرىنە سۇيەنە وتىرىپ، جەڭىلدىكتەر مەن ۇستەمەاقىلار جۇيەسىن جىل سايىن وزگەرتىپ وتىرادى»، - دەدى ق ر قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ورىنباسارى ماريا حادجيەۆا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ونىڭ ايتۋىنشا، قولدانىستاعى ساقتاندىرۋ تاريفتەرى زاڭمەن 2007-جىلى بەلگىلەنگەن جانە سول ساتتەن باستاپ جاڭارتىلماعان. جۇرگىزۋشىلەردىڭ ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋ بويىنشا قازىرگى شىعىنداردى تالداۋ ءتۇرلى ايماقتارداعى اپاتتاردىڭ ءبىر-بىرىنەن ايتارلىقتاي ەرەكشەلەنەتىنىن كورسەتكەن.