قازاقستان، ازەربايجان، تۇركيا، وزبەكستان العاش رەت بىرلەسكەن اسكەري جاتتىعۋ وتكىزدى
بۇل تۋرالى قازاقپارات قورعانىس مينيسترلىگىنە سىلتەمە جاساپ حابارلايدى.
قازاقستاندىق اسكەري قىزمەتشىلەر وپەراتسيانى جوسپارلاۋ، ارنايى بارلاۋدى ۇيىمداستىرۋ، جاقىن ۇرىستار مەن قالالىق جاعدايداعى ۇرىس قيمىلدارىن جۇرگىزۋ، عيماراتقا شابۋىل جاساۋ مەن وبەكت كۇزەتىن جويۋ بويىنشا تاكتيكالىق ەپيزودتاردى ورىنداۋعا تارتىلدى.
سونىمەن بىرگە وقۋ-جاتتىعۋ شەڭبەرىندە اكۋستيكالىق جۇيەسى بار كەشەندى سيمۋلياتورلاردا اسكەري-مەديتسينالىق دايىندىق ساباقتارى وتكىزىلدى. ۇرىس الاڭىندا العاشقى مەديتسينالىق جاردەم كورسەتۋ مەن جارالىلاردى ەۆاكۋاتسيالاۋ كەزىندەگى ءىس-قيمىلدار پىسىقتالدى.
وقۋ-جاتتىعۋ شەڭبەرىندە «اەروديناميكالىق قۇبىر» ترەناجەرى مەن ۆيرتۋالدى باعدارلامالىق كەشەندەردە پاراشيۋتشىلەردى دايارلاۋ ۇيىمداستىرىلدى.
وتكىزىلگەن مانيەۆرلەردىڭ نەگىزگى ماقساتى - گيبريدتىك ءقاۋىپ- قاتەرلەر جاعدايىندا سەرىكتەس ەلدەردىڭ ارنايى ماقساتتاعى بولىمشەلەرىنىڭ ارنايى وپەراتسيالاردى جۇرگىزۋ كەزىندەگى تاجىريبەسىن ءبولىسۋ.
