قارتتار كۇنى ەلوردادا قالاي اتاپ وتىلەدى
استانا اكىمدىگىنىڭ رەسمي سايتىندا ءمالىم ەتىلگەندەي، 20-29- قىركۇيەك ارالىعىندا الەۋمەتتىك جەلىلەردە بالالار اتا-اجەلەرىن قۇتتىقتاعان روليكتەر چەللەندجى ۇيىمداستىرىلىپ جاتىر. وسى اپتادا اۋدان اكىمدىكتەرى جالعىز تۇراتىن زەينەتكەرلەر مەن مۇمكىندىگى شەكتەۋلى جاندارعا ازىق-تۇلىك سەبەتىن جەتكىزەدى. 29- قىركۇيەكتە «ءوندىرىس» دەنە شىنىقتىرۋ-ساۋىقتىرۋ كەشەنىندە قارتتار كۇنىنە وراي بەلسەندى زەينەتكەرلەر اراسىندا توعىزقۇمالاق، شاحمات، دويبى، ۇستەل تەننيسىنەن جارىستار وتەدى.
قالانىڭ ورتالىقتاندىرىلعان كىتاپحانا جۇيەسى 29- قىركۇيەكتە ساعات 12:00 دە 5№ بالالار كىتاپحاناسىندا «قارتتىقتى قۇرمەتتەۋ كەرەك» اتتى بالالار شوۋىن ۇيىمداستىرادى. ال 30- قىركۇيەكتە ساعات 15:00 دە 2№ بالالار كىتاپحاناسىندا «كۇزدىڭ جاسى ادەمى» اتتى كەزدەسۋ كەشى وتەدى.
30- قىركۇيەكتە «ەرىكتىلەر مەكتەبى» جوباسى اياسىندا «قامقورلىق مەكەنجايلارى» اكسياسىن «استانا جاستارى» ك م م وتكىزەدى. بۇل كۇنى ۆولونتەرلەر جالعىز تۇراتىن قارت استانالىقتارعا بارىپ، ولارعا ازىق-تۇلىك سەبەتتەرىن تابىستايدى.
مەرەكەگە وراي بارلىق مەكتەپتەر مەن بالاباقشالاردا اعا بۋىنعا قامقورلىقپەن قاراۋعا قاتىستى سىنىپ ساعاتتارى مەن اشىق ساباقتار وتكىزىلەدى.
قىركۇيەكتىڭ سوڭعى كۇنى قارتتار «دجينس جۇماعى» اتتى تىگىن كۋرسىنان كونكۋرسقا قاتىسا الادى.
سول كۇنى «قامقور» الەۋمەتتىك قىزمەت كورسەتۋ ورتالىعىنىڭ اكت زالىندا «زولوتىە روسسىپي» كونسەرتى ۇسىنىلادى.
1- قازان كۇنى ساعات 12:00 دە «ناز» مەملەكەتتىك ءبي تەاترى «قاريالار-حالىق قازىناسى» قايىرىمدىلىق كونسەرتىنە شاقىرادى.
3- قازان كۇنى ساعات 18:00 دە ە. راحماديەۆ اتىنداعى مەملەكەتتىك اكادەميالىق فيلارمونياسىندا ارداگەرلەر ۇيىمىنىڭ قۇرىلعانىنا 35 جىل تولۋىنا وراي «ارداگەرلەر ۇيىمىنىڭ شەجىرەسى/لەتوپيس ۆەتەرانسكوگو دۆيجەنيا» اتتى كونسەرت وتەدى.
قارتتار كۇنىنە ورايلاستىرىلعان قازان ايىنىڭ مەرەكەلىك باعدارلاماسىندا شاحماتتان ءداستۇرلى سپورتتىق فەستيۆال، توعىزقۇمالاقتان قالالىق اشىق تۋرنير جانە باسقا دا كوپتەگەن ءىس-شارا بار.