اسكەري اۆاريالىق-قۇتقارۋ قىزمەتىن مەملەكەتكە قايتارۋ كەرەك - سەنات

استانا. قازاقپارات - سەنات ءتوراعاسىنىڭ ورىنباسارى اسقار شاكىروۆ باستاعان دەپۋتاتتار توبى اسكەريلەندىرىلگەن اۆاريالىق-قۇتقارۋ قىزمەتىن مەملەكەتتىك مەنشىككە قايتارۋدى ۇسىندى، دەپ حابارلايدى قازاقپارات ءتىلشىسى.

ولار مۇنداي قادام قابىلداۋ قاجەتتىلىگىنىڭ سەبەپتەرىن ەلىمىزدىڭ پرەمەر-ءمينيسترى ءاليحان سمايىلوۆتىڭ اتىنا جولداعان دەپۋتاتتىق ساۋالدا جازعان.

سەناتورلار قوستاناي، قاراعاندى، شىعىس قازاقستان جانە باسقا دا وبلىستارداعى اۋقىمدى ورتتەر قىزمەتتەردىڭ تومەن تەحنيكالىق جابدىقتالۋىنىڭ وتكىر پروبلەمالارىن اشقانىن اتاپ ءوتتى. ءورت سوندىرۋشىلەر ءتىلسىز جاۋعا وتكەن عاسىردىڭ 60-70-جىلدارى شىعارىلعان ارنايى تەحنيكالارمەن قارسى تۇردى.

سونىمەن قاتار، دەپۋتاتتار ەلدەگى قاۋىپتى وندىرىستىك نىساندارداعى اپاتتاردىڭ الدىن الۋ جانە ولاردى جويۋ جونىندەگى جالعىز مەملەكەتتىك قىزمەت 2018-جىلى جەكەمەنشىككە وتكەنىن، ونىڭ بالانستىق قۇنىنان ەكى ەسە تومەن سوماعا جەكەشەلەندىرىلگەنىن ەسكە سالدى.

ولار اتالعان كاسىپورىنعا قاتىستى وسىعان دەيىن بەس دەپۋتاتتىق ساۋال جولدانعانىن ايتا كەلە، وسى كاسىپورىندى جەكەشەلەندىرگەن مەملەكەت مامانداندىرىلعان قىزمەتتەن ايرىلعانىن اتاپ ءوتتى.

سەناتورلاردىڭ اقپاراتىنا قاراعاندا، پرەزيدەنتتىڭ تاپسىرماسى اياسىندا ۇكىمەتتە ەكونوميكانى مونوپولياسىزداندىرۋ، اتاپ ايتقاندا بۇرىن نەگىزسىز جەكەشەلەندىرىلگەن وبەكتىلەردى مەملەكەتتىك مەنشىككە بەرۋ جونىندەگى ارنايى كوميسسيا قۇرىلدى.

«وسىعان بايلانىستى اتالعان كوميسسيانىڭ تاياۋداعى وتىرىسىندا 1932-جىلى قۇرىلعان العاشقى وتاندىق اۆاريالىق-قۇتقارۋ قىزمەتتەرىنىڭ قۇقىقتىق ميراسقورى بولىپ سانالاتىن، ياعني جەكەشەلەندىرىلگەن «كاسىبي اسكەريلەندىرىلگەن اۆاريالىق- قۇتقارۋ قىزمەتى» مەملەكەتتىك كاسىپورنىن مەملەكەت مەنشىگىنە قايتارۋ تۋرالى ماسەلەنى قاراۋدى سۇرايمىز»، - دەپ اتاپ ءوتتى سەناتور سەرگەي ەرشوۆ.