قاسىم-جومارت توقايەۆ حالىقارالىق شاحمات فەدەراتسياسىنىڭ پرەزيدەنتىن قابىلدادى

استانا. قازاقپارات - مەملەكەت باسشىسى حالىقارالىق شاحمات فەدەراتسياسىنىڭ پرەزيدەنتى اركاديي دۆوركوۆيچتى قابىلدادى، دەپ حابارلايدى قازاقپارات.

باسپا ءسوز قىزمەتىنىڭ مالىمەتىنشە، قاسىم-جومارت توقايەۆ اركادي دۆوركوۆيچتى حالىقارالىق شاحمات فەدەراتسياسىنىڭ (FIDE) پرەزيدەنتى لاۋازىمىنا جۋىردا قايتا سايلانۋىمەن قۇتتىقتاعان.

كەزدەسۋ بارىسىندا مەملەكەت باسشىسىنا استانادا الەمنىڭ 12 مىقتى شاحماتشىسىنىڭ باسىن قوسقان FIDE گران-پري ايەلدەر سەرياسىنىڭ ءبىرىنشى كەزەڭىنىڭ وتكىزىلۋى تۋرالى مالىمەت بەرىلدى.

قاسىم-جومارت توقايەۆ وسىنداي دەڭگەيدەگى ءىس-شارالاردى وتكىزۋ ەلىمىزدەگى شاحمات سپورتىنىڭ دامۋىنا ەلەۋلى ۇلەس قوساتىنىن اتاپ ءوتتى.

- قازاقستاندا شاحمات كەڭىنەن تانىمال، اسىرەسە، بالالار مەن جاستار اراسىندا. بىزدە 7 مىڭنان استام سەكتسيا جۇمىس ىستەيدى، دەگەنمەن بۇل كورسەتكىشتى كەمىندە ەكى ەسە ارتتىرۋعا ءتيىسپىز. قازىر شاحماتپەن 200 مىڭنان استام ادام اينالىسادى. قازاقستاندىق شاحماتشىلار حالىقارالىق جارىستاردا ءساتتى ونەر كورسەتىپ ءجۇر. ءبىز بۇل سپورتتى قولداۋعا باسا ءمان بەرەمىز. شاحماتتى دامىتۋدىڭ جول كارتاسى ازىرلەندى. «مەكتەپتەگى شاحمات» اۋقىمدى جوباسىن جۇزەگە اسىرۋدى جوسپارلاپ وتىرمىز، - دەدى مەملەكەت باسشىسى.

ءوز كەزەگىندە اركادي دۆوركوۆيچ قازاقستاندا شاحماتتى جەكە قولداعانى جانە تانىمال سپورتقا اينالدىرعانى ءۇشىن قاسىم- جومارت توقايەۆقا ريزاشىلىعىن ءبىلدىرىپ، FIDE شاحماتتى مەكتەپ باعدارلاماسىنا ەنگىزۋ جونىندەگى حالىقارالىق تاجىريبەسىن بولىسۋگە دايىن ەكەنىن جەتكىزدى.

سونىمەن قاتار ولار قازاقستان مەن FIDE اراسىنداعى ۇزاق مەرزىمدى ىنتىماقتاستىق ماسەلەلەرى جونىندە پىكىر الماسىپ، ەلىمىزدە ءىرى حالىقارالىق تۋرنيرلەر وتكىزۋ پەرسپەكتيۆالارىن تالقىلادى.