قىمبات، ءبىراق ماڭىزدى جوبا - الماتى اكىمى ل ر ت سالۋ تۋرالى
29 قىركۇيەك, 14:31

قىمبات، ءبىراق ماڭىزدى جوبا - الماتى اكىمى ل ر ت سالۋ تۋرالى

الماتى. قازاقپارات - جەڭىل رەلستى ترامۆاي (LRT) جەلىسى جوباسىن جۇزەگە اسىرۋ شەشىمى 2023 -جىلى قابىلدانادى.

بۇل تۋرالى الماتى اكىمى ەربولات دوسايەۆ ءمالىم ەتتى، دەپ حابارلايدى قازاقپارات ءتىلشىسى.

كەزدەسۋ بارىسىندا مەدەۋ اۋدانىنىڭ تۇرعىنى مەگاپوليس باسشىسىنان LRT قۇرىلىس جوباسى قاشان جۇزەگە اسادى دەپ سۇرادى.

«تولە بي كوشەسى بويىنداعى LRT ماسەلەسىن دامۋ جوسپارىنا ەنگىزدىك. جۇمىستى باستاپ جاتىرمىز. قالادا جۇزەگە اسا باستاعان بىرنەشە جوبا بار. مىسالى، ەۋروپا قايتا قۇرۋ جانە دامۋ بانكى قاتىساتىن جوبا. جەكە ۇسىنىستار دا بولدى. ەندى ءبىز ونى قالاي جۇزەگە اسىرۋعا بولاتىنىن ەسكەرە وتىرىپ، وڭتايلى سحەمانى تابامىز. الدىمەن شىعىندار قارالادى. بىرىنشىدەن، قالادان ءوز مۇمكىندىكتەرىمىزدى ەسەپتەپ الۋىمىز كەرەك، بۇل جوبانى قاي ۋاقىتتا جۇزەگە اسىرا الامىز؟ بۇل نەگىزگى جوبالاردىڭ ءبىرى بولماق. 2023 -جىلى نە ىستەي الدىق جانە بۇل جوبانىڭ قانداي فورمادا جۇزەگە اساتىنىن، جۇمىس قاي جىلداردى قامتيتىنىن كورسەتەمىز. 2025 -جىلدىڭ سوڭىنا قاراي العاشقى ناتيجەنى كورەمىز. بۇل جۇمىس 2023 -جىلى باستالۋى كەرەك»، - دەدى اكىم.

ونىڭ ايتۋىنشا، قازىر LRT جوباسىن قارجىلاندىرۋدىڭ وڭتايلى سحەماسىن تابۋ قاجەت.

«LRT - قالا ءۇشىن ارزان ەمەس، ءبىراق وتە ماڭىزدى جوبا. مۇنداي كولىك قۇرالى قالاعا كەرەك. مەن ۇسىنىلعان جوبالاردى قاراستىرىپ جاتىرمىن. جوباعا قانشا قاراجات قاجەت بولاتىنىن جانە ونىڭ قانداي كەزەڭدە جۇزەگە اساتىنىن شەشۋ كەرەك. LRT باعىتى بويىنشا جەردى ساتىپ الۋدى جالعاستىرامىز. كەلەسى جىلدىڭ كوكتەمىندە جوبانىڭ قالاي جۇزەگە اساتىنىن ايتامىن»، - دەدى ەربولات دوسايەۆ.

بۇعان دەيىن الماتىدا جەڭىل رەلستى كولىكتىڭ ءبىرىنشى جەلىسى 2027 -جىلى ىسكە قوسىلاتىنىن جازعان ەدىك.

ايتا كەتەيىك، LRT جەلىسىنىڭ قۇرىلىسى 2020 -جىلعا جوسپارلانعان بولاتىن. جوبانىڭ ينۆەستيتسيالىق قۇنى - 94203 ميلليون تەڭگە.

جاڭالىقتار