مۇحتار شاحانوۆتىڭ جىر كەشى ءوتتى
ماحامبەت اتىنداعى وبلىستىق اكادەميالىق قازاق دراما تەاترىندا مۇحتار شاحانوۆتىڭ 80 جاسقا تولۋ مەرەيتويىنا وراي «عاسىردىڭ عالامات اقىنى» اتتى پوەزيا كەشى ءوتتى.
مۇحتار شاحانوۆتىڭ الداسپان اقىن ماحامبەت رۋحىنا، كوسىلە اققان جايىق وزەنىنە ىڭكارلىگى تۋىندىلارىنان انىق اڭعارىلادى. سول سەبەپتەن شىعارماشىلىق كەش اقىننىڭ شوقتىعى بيىك جىرلارىنان قۇرالعان «سالەم، ۇلى جايىعىم!» اتتى تەاترلاندىرىلعان پرولوگپەن اشىلدى. بۇدان سوڭ وبلىس اكىمى سەرىك شاپكەنوۆ مەرەيتوي يەسىن قۇتتىقتاپ، بەرەكەلى عۇمىر مەن شىعارماشىلىق شابىت تىلەدى.
«ءبىز بۇگىن جىرلارىن قازاق حالقى جاتقا بىلەتىن اقىن، جەلتوقسان جىلناماسىنان رومان- ەپوپەيا جازعان جازۋشى، اندەرىن بارشا جۇرت شىرقاعان كومپوزيتور، قازاق ءتىلىنىڭ قامى ءۇشىن شىبىن جانىن شۇبەرەككە ءتۇيىپ كۇرەسكەن قايراتكەر مۇحتار شاحانوۆپەن كەزدەسىپ وتىرمىز. مۇحيتقا قۇياتىن وزەن سەكىلدى تابيعات سىيعا بەرگەن بار تالانتىن، ازاماتتىق اسىل قاسيەتىن جوعارى باعالاپ، مەملەكەت باسشىسى قاسىم- جومارت توقايەۆ ۇلىتاۋدا وتكەن ۇلتتىق قۇرىلتايدىڭ العاشقى وتىرىسىندا «بۇل كىسى وتە ادال، شىنشىل، ۇلتجاندى ادام. مەن مۇحتار شاحانوۆقا قازاقستاننىڭ ەڭبەك ەرى اتاعىن بەرۋ تۋرالى جارلىققا قول قويدىم» دەپ جوعارى باعا بەردى. بۇدان ارتىق قانداي باعا بەرۋگە بولادى. جىر سۇيگەن، ءسوز قادىرلەگەن اتىراۋ جۇرتشىلىعىنىڭ اتىنان بيىگىڭىزبەن ءسۇيسىندىرىپ، تەرەڭدىگىڭىزبەن ويلاندىرىپ، ورتامىزدا ءاردايىم امان جۇرۋىڭىزگە تىلەكشىمىن»، - دەدى سەرىك شاپكەنوۆ.
ءوز كەزەگىندە قازاق پوەزياسىنىڭ تانىمال وكىلى، اقىن مۇحتار شاحانوۆ جىبەككە تىزگەن لاعىل مونشاقتاي اق باتاسىن بەرىپ، اتىراۋ جۇرتشىلىعىنا العىس ءبىلدىردى.
جىر كەشىندە اقىننىڭ سوزىنە جازىلعان اندەر شىرقالىپ، ولەڭدەرى وقىلدى.
