ق ر پرەزيدەنتى ءتورت تۇلىك تۋرالى ۆەتەرينارلىق دەرەكتەر جوباسىن ىسكە اسىرا باستاۋدى تاپسىردى
ق ر اۋىل شارۋاشىلىعى مينيسترلىگىنىڭ باستاماسىمەن جاسالعان قوسىمشا ءتورت تۇلىك تۋرالى ۆەتەرينارلىق دەرەكتەردىڭ قالىپتاسۋ جانە دەرەكتەردى الماسۋ پروتسەسىن تولىق سيفرلىق فورماتقا كوشىرىپ، مال دارىگەرلەرىنىڭ جۇمىسىن جەڭىلدەتپەك.
تەحنولوگيالىق فورۋم اياسىندا ۇيىمداستىرىلعان ستارتاپ جوبالار اللەياسىن ارالاۋ كەزىندە قاسىم- جومارت توقايەۆ VetMobile جوباسىمەن ەگجەي- تەگجەيلى تانىستى.
ءمالىم ەتىلگەندەي، قازىر ۆەتەرينارلار ءتورت تۇلىك تۋرالى مالىمەتتەردى قاعاز تۇرىندەگى جۋرنالدارعا جازىپ كەلەدى. ال وندا قاتەلىكتەر دە كەتىپ جاتىر. كەيىن ولار قاتە تۇرىندە بازاعا ەنگىزىلەدى.
سول سەبەپتى مال دارىگەرلەرى ءۇشىن VetMobile موبيلدىك قوسىمشاسى جاسالىپ وتىر. ونىڭ كومەگىمەن مالدىڭ قۇلاعىندا تۇرعان بيركانى سكانەرلەۋ ارقىلى سول جانۋار تۋرالى بارلىق مالىمەتتى بىلۋگە بولادى. اتاپ ايتقاندا، قاي ەلدى مەكەندە ءوسىرىلىپ وتىرعانى، قانداي اۋرۋمەن اۋىرعانى، ولارعا قارسى قابىلدانعان ەمدەرى، پروفيلاكتيكالىق ۆاكسينالاردىڭ بار- جوعى تۋرالى دەرەكتەر كورىنەدى.
قازىر ۆەتەرينارلاردى وقىتۋ جۇرگىزىلىپ جاتىر. جوبانى قازان ايىنىڭ باسىنان وڭىرلەردىڭ بىرىندە پيلوتتىق نەگىزدە ىسكە قوسۋ جوسپارلانعان. وعان 50 پلانشەت قولدانىلادى.
قازاقستان پرەزيدەنتى مال دارىگەرلەرىنىڭ قانشا پايىزى بۇل جوبامەن قامتىلاتىنىن سۇرادى.
مەملەكەت باسشىسىنا بەرىلگەن مالىمەتكە سايكەس، جىل سوڭىنا دەيىن ۆەتەرينارلاردىڭ 60-70 پايىزى پلانشەتتەرمەن قامتىلاتىنى كۇتىلەدى. ول ءۇشىن جەرگىلىكتى ورگاندارمەن ساتىپ الۋ ماسەلەسى پىسىقتالادى. ال ىلكى جوبادا قولدانىلاتىن پلانشەتتەردى Samsung كومپانياسى قول قويىلعان مەموراندۋم اياسىندا تەگىن بەرىپ وتىر.
ق. توقايەۆ VetMobile جوباسىنىڭ دۇرىس باستاما ەكەندىگىن ايتىپ، ونى ىسكە اسىرۋدى باستاپ، جالعاستىرۋدى جانە قاداعالاۋدا ۇستاۋدى تاپسىردى.
فوتو: t.me/bort_01
اۆتور
ميرا تولەندى قىزى