وسكەمەندە ورالحان بوكەي اتىنداعى رەسپۋبليكالىق بايقاۋ جەڭىمپازدارى ماراپاتتالدى
29 قىركۇيەك, 08:45

وسكەمەندە ورالحان بوكەي اتىنداعى رەسپۋبليكالىق بايقاۋ جەڭىمپازدارى ماراپاتتالدى

وسكەمەن. قازاقپارات - بۇگىن مۇزتاۋدىڭ مۇزبالاعى ورالحان بوكەيدىڭ تۋعان كۇنىنە وراي وسكەمەندە «اۋىل حيكايالارى» اتتى رەسپۋبليكالىق بايقاۋ جەڭىمپازدارى ماراپاتتالدى، دەپ حابارلايدى قازاقپارات ءتىلشىسى.

و. بوكەي اتىنداعى ورتالىقتاندىرىلعان كىتاپحانادا قازاقتىڭ كلاسسيك جازۋشىسىنىڭ تۋعان كۇنىنە وراي «اۋىل حيكايالارى» اتتى تۇڭعىش رەسپۋبليكالىق ادەبي بايقاۋ ءوتتى. ونىڭ ۇيىمداستىرىلۋىنا اتالعان كىتاپحانا، قالالىق مادەنيەت جانە تىلدەردى دامىتۋ ءبولىمى، قازاقستان جازۋشىلار وداعىنىڭ ش ق و فيليالى مۇرىندىق بولعان.


«بايقاۋعا استانا قالاسى، شىعىس قازاقستان، اباي، اقتوبە، پاۆلودار وبلىستارىنان جاس قالامگەرلەر قاتىستى. بارلىعى 30-دان استام شىعارما كەلىپ ءتۇستى. ءادىلقازىلار قۇرامىندا ورالحان بوكەيدىڭ جان دوسى، رۋحاني سىرلاسى الىبەك اسقاروۆ، جازۋشى، «قۇرمەت» وردەنىنىڭ يەگەرى اسقار التاي، اقىن الىبەك قاڭتارباي بولدى»، - دەيدى كىتاپحانا قىزمەتكەرلەرى.

بايقاۋدىڭ قورىتىندىسى بويىنشا 1- ورىن - «اران» اتتى اڭگىمەسىمەن قۋات قيىقباي (اباي وبلىسى)، 2- ورىن - «اققۇمداعى حيكايا»، اڭگىمەسىمەن باقىت جاليەۆا (اقتوبە وبلىسى)، 3- ورىن - «ۇكىلەگەن ءۇمىت» اڭگىمەسىمەن اقيقات سارسەمبايەۆ (وسكەمەن قالاسى).


ايتا كەتەيىك، ورالحان بوكەيدىڭ تۋعان كۇنىنە وراي وتكەن شارالار لەگى بۇگىن ج م ك ىقشام اۋدانىنداعى ورالحان ەسكەرتكىشىنەن باستالدى. جينالعاندار ەسكەرتكىشكە گۇل شوقتارىن قويىپ، التايدىڭ «كەربۇعىسىن» ەسكە الدى.

سودان كەيىن ولار وسكەمەندەگى و. بوكەي اتىنداعى №44 مەكتەپكە بارىپ، قالامگەردىڭ مۋزەيىمەن تانىستى.

«كەيبىر ازاماتتار ورالحاننىڭ ەسكەرتكىشىندە دۇنيەگە كەلگەن كۇنىمەن، قايتقان كۇنىن جازۋ كەرەكتىگىن ايتىپ جاتىر. مەنىڭ ويىمشا، جازىلماعانى دۇرىس. ويتكەنى ورالحان التايدا ءتىرى ادام! جازۋشىنىڭ شىعارمالارى ومىرشەڭ»، - دەيدى جازۋشى اسقار التاي.


كەلەر جىلى مۇزتاۋ مۇزبالاعىنىڭ 80 جىلدىق مەرەيتويى بولماق.

اۆتور

تالعاتجان مۇحامەتبەك ۇلى

جاڭالىقتار