تالدىقورعاندا قاڭتاردا بۇلىنگەن اكىمدىك پەن پوليتسيا عيماراتى ءالى جوندەلىپ بىتكەن جوق

None
تالدىقورعان. قازاقپارات - تالدىقورعاندا قاڭتار وقيعاسى كەزىندە بۇلىنگەن عيماراتتاردى قالپىنا كەلتىرۋ جۇمىسى ۋاقىتىندا اياقتالمادى.

ماسەلەن، وبلىستىق اكىمدىك عيماراتى 31- قىركۇيەكتە، ال قالالىق پوليتسيانىڭ مەكەمەسى 31- تامىزدا اياقتالۋى ءتيىس بولعان، - دەپ حابارلايدى قازاقپارات ءتىلشىسى.

قازىر وبلىستىق اكىمدىك عيماراتىن قالپىنا كەلتىرۋگە 5 ميلليارد 850 ميلليون تەڭگە قارجى بولىنگەن.

ال نىسانداعى جۇمىستاردى الماتىنىڭ «تەحنوسناب -2002» دەپ اتالاتىن مەردىگەر كومپانياسى جۇرگىزىپ جاتىر.

ال جەتىسۋ وبلىسىنداعى قۇرىلىس باسقارماسىنىڭ باستىعى وبلىس اكىمدىگى عيماراتىن قالپىنا كەلتىرۋ جۇمىسىنىڭ تەك 45 پايىزى عانا اياقتالعان دەيدى.

وبلىس ەكىگە بولىنگەندىكتەن قارجى دەر كەزىندە تۇسپەگەن، مەردىگەر نىساندى ۋاقتىلى تاپسىرىپ ۇلگەرمەدى، سوندىقتان ولارعا ەشقانداي شارا قولدانىلمايدى.

«ءبىز مەردىگەر كومپانياعا شارا قولدانا المايمىز، نەگە دەسەڭىزدەر، بۇلاردىڭ كىناسى جوق. مەملەكەتتىك ساراپتامانىڭ كەش شىققانىنا بايلانىستى جۇمىستار دەر كەزىندە باستالمادى. جەتىسۋ وبلىسىنىڭ اكىمى بەيبىت وكسىكباي ۇلى نىساندى 25 -قاراشاعا دەيىن قوسۋعا ۋاقىت بەردى. سوندىقتان مەردىگەر دە، ءبىز دە جۇمىس جاساپ جاتىرمىز. 25- قاراشاعا دەيىن اياقتايمىز دەپ ويلايمىن»، - دەدى جەتىسۋ وبلىستىق قۇرىلىس باسقارماسىنىڭ باسشىسى تەمىرلان بەكتاسوۆ.

اۆتور

سامال قابىشيەۆا

سوڭعى جاڭالىقتار