ءۇش الىپتىڭ شىعارمالارى دارىپتەلسىن - ماۋلەن اشىمبايەۆ
28 قىركۇيەك, 20:21

ءۇش الىپتىڭ شىعارمالارى دارىپتەلسىن - ماۋلەن اشىمبايەۆ

استانا. قازاقپارات - بۇگىن قازاق ادەبيەتىندەگى ءۇش الىپ تۇلعا - مۇحتار اۋەزوۆ، شەرحان مۇرتازا مەن ورالحان بوكەيدىڭ تۋعان كۇنى.

وسى ورايدا، پارلامەنت سەناتىنىڭ ءتوراعاسى ماۋلەن اشىمبايەۆ الەۋمەتتىك جەلىدەگى پاراقشاسىندا جازبا قالدىردى، دەپ حابارلايدى قازاقپارات.

«بۇگىن حالقىمىزدىڭ ۇلى پەرزەنتى، زاڭعار جازۋشى، داڭقتى قالامگەر مۇحتار اۋەزوۆتىڭ تۋعانىنا 125 جىل تولىپ وتىر. ادەبيەتىمىزدىڭ تاعى ءبىر الىبى، قايراتكەر تۇلعا شەرحان مۇرتازا دا كوزى ءتىرى بولسا، ءدال وسى كۇنى 90 جاسقا تولار ەدى. سونداي- اق، بۇگىن شەراعاڭدى ۇستاز تۇتىپ، سوڭىنان ەرگەن سۋرەتكەر، كوپ وقىرماننىڭ سۇيىكتى جازۋشىسى ورالحان بوكەيدىڭ تۋعان كۇنى. سوندىقتان، 28 -قىركۇيەك - قازاق ادەبيەتىنىڭ كۇنى دەسەك، ارتىق بولا قويماس.

جالپى، اۋەزوۆتى وقۋ ارقىلى ءبىز اباي ايتقان ويدىڭ تەرەڭىنە بويلايمىز. شەراعاڭنىڭ شىعارمالارى مەن وي- تولعامدارىنان ۇلتتىق رۋحتىڭ ايبارلى ءۇنى ەستىلەدى. ال، ورالحاننىڭ تۋىندىلارىنان قاز- قالپىنداعى قازاقى بولمىستى كورەمىز. سول سەبەپتى، ءۇش الىپتىڭ شىعارمالارىن دارىپتەۋگە، اسىرەسە وسكەلەڭ ۇرپاق اراسىندا كەڭىنەن اسيحاتتاۋعا باسا ءمان بەرگەن ءجون. بۇل - ۇلتتىق مۇددە تۇرعىسىنان دا اسا ماڭىزدى قادام.

بۇگىنگىدەي اتاۋلى كۇندە تىلەگەن دۇعالارىمىز قابىل بولسىن. جازۋشىلارىمىزدىڭ رۋحتارى شات بولىپ، مۇرالارى ماڭگى جاساي بەرسىن»، - دەپ جازادى ماۋلەن اشىمبايەۆ.


جاڭالىقتار