بوكستان وليمپيادانىڭ ەكى دۇركىن جۇلدەگەرى بولات جۇمادىلوۆكە پاتەرى قايتارىلدى
28 قىركۇيەك, 19:19

بوكستان وليمپيادانىڭ ەكى دۇركىن جۇلدەگەرى بولات جۇمادىلوۆكە پاتەرى قايتارىلدى

الماتى. قازاقپارات - قازاقستاننىڭ بەلگىلى سپورتشىسى، اۋەسقوي بوكستان الەم چەمپيونى، وليمپيادا ويىندارىنىڭ ەكى دۇركىن كۇمىس جۇلدەگەرى بولات جۇمادىلوۆكە ەكى بولمەلى پاتەرى قايتارىلدى. بۇل تۋرالى قازاقپارات تىلشىسىنە «قازاقستان سپورتشىلار وداعى» رەسپۋبليكالىق قوعامدىق بىرلەستىگىنىڭ ءتوراعاسى ازامات قارلىعاشەۆ ايتىپ بەردى.

سپيكەردىڭ ايتۋىنشا، بىرنەشە اي بۇرىن وعان بانك وكىلدەرى حابارلاسىپ، سپورتشىنى ىزدەپ تابا الماي جاتقانىن حابارلاعان.

«بوكستان قازاقتىڭ جارىق جۇلدىزى بولات ءجۇمادىلوۆ - ءبىزدىڭ قوعامنىڭ قۇرمەتتى مۇشەسى. سوندىقتان بانكتەن ءمان-جايدى سۇراعاندا، ول بانكتەگى قارىزىن قايتارا الماي جۇرگەنى بەلگىلى بولدى. ونىڭ ۇستىنە، سول كەزدە سوت شەشىمى شىعىپ، سوت ورىنداۋشىلارى مەن باعالاۋشىلار كەلىپ، پاتەرىن الىپ قويماقشى بولعان. وسى سىن ساعاتتا ءبىزدىڭ سپورتشىلار وداعى، سپورتشىلار مەن وليمپيادا چەمپيوندارى بولاتقا كومەك كورسەتۋگە بەل شەشتىك. ءبىز «ForteBank» پەن ۇلتتىق بانك باسشىلىعىنا حات جازىپ، اتالعان ماسەلەنى شەشۋگە كومەك كورسەتۋدى سۇرادىق. سونداي-اق ولارمەن كەزدەستىك. وسىدان سوڭ كوميسسيا قۇرىلىپ، قايتا قارجىلاندىرۋ، ارەستى الىپ تاستاۋ، باسقا دا شەشىمدەر شىقتى. اللاعا شۇكىر، ماسەلەمىز شەشىلدى. وسى ورايدا بولاتتاي قازاق بوكسىنىڭ جارىق جۇلدىزىن ەسكەرىپ، ماسەلەسىن ءتۇسىنىپ، كومەك كورسەتكەنى ءۇشىن بانكتەردىڭ باسشىلىعىنا العىس ايتامىز. قازىر بولات وتباسىمەن استانادا، ءوزىنىڭ ەكى بولمەلى پاتەرىندە تۇرىپ جاتىر»، - دەدى ازامات قارلىعاشەۆ.

ول سونداي-اق سپورتشىلار وداعى تاراپىنان سپورتشىلاردىڭ باسقا دا ماسەلەلەرى بويىنشا كومەك كورسەتىلىپ جاتقانىن اتاپ ءوتتى.

«شىنى كەرەك، ءبىز باسقا دا سپورتشىلارعا كومەكتەسىپ ءجۇرمىز. مىسالى، اۋىر اتلەتيكادان ازيا چەمپيونى ايدار قازوۆتىڭ جوعارىدا اتالعان ماسەلەگە ۇقساس پروبلەماسىن شەشۋگە قول ۇشىن بەردىك. ال قازىر اۋىر اتلەت، وليمپيادا ويىندارىنىڭ قولا جۇلدەگەرى ءزۇلفيا چينشانلوعا كومەكتەسىپ جاتىرمىز. جالپى، سپورتشىلارىمىز وسىنداي ماسەلەلەرگە تاپ بولعان كەزدە جانە ولاردىڭ زاڭ اياسىنداعى جۇمىستاردى جاقسى بىلە بەرمەۋى سەبەبىنەن ولارعا ءارقاشان كومەككە كەلۋگە دايىنبىز»، - دەدى سپيكەر.

جاڭالىقتار