جاڭا يدەيالار مەن سەرپىندى جوبالار ەركىن قوعامدا عانا جۇزەگە اسادى - پرەزيدەنت
28 قىركۇيەك, 15:34

جاڭا يدەيالار مەن سەرپىندى جوبالار ەركىن قوعامدا عانا جۇزەگە اسادى - پرەزيدەنت

استانا. قازاقپارات - جاڭا يدەيالار مەن سەرپىندى جوبالار ەركىن جانە ۇيلەسىمدى قوعامدا عانا جۇزەگە اسادى.

مۇنداي پىكىردى ق ر پرەزيدەنتى قاسىم-جومارت توقايەۆ ءبىلدىردى، دەپ حابارلايدى قازاقپارات ءتىلشىسى.

«جاڭا يدەيالار مەن سەرپىندى جوبالار تەك ەركىن جانە ۇيلەسىمدى قوعامدا عانا جۇزەگە اساتىنىنا سەنىمدىمىن. سوندىقتان دا ەلىمىزدى اۋقىمدى جاڭعىرتۋ اياسىندا ءبىز ادىلەتتى قازاقستان - بارلىعى ءۇشىن تەڭدەي مۇمكىندىكتەر مەملەكەتىن قۇرۋعا نيەتتىمىز»، - دەدى مەملەكەت باسشىسى «Digital Bridge 2022» حالىقارالىق تەحنولوگيالىق فورۋمى بارىسىندا.

ونىڭ ايتۋىنشا، اقپاراتتىق وركەنيەتتىڭ دامۋى ناتيجەسىندە سيفرلىق كوشپەندىلەر سياقتى قۇبىلىس پايدا بولعان.

«قازىرگى ديدجيتال-نومادتار جاھاندىق كيبەر جانە فيزيكالىق كەڭىستىكتى بەلسەندى يگەرىپ، جاڭا ونىمدەر مەن نارىقتاردى قۇرىپ جاتىر. بۇگىنگى فورۋمداعى ناتيجەلى پىكىر الماسۋ ايماقتىڭ سيفرلى بولاشاعىنىڭ باعدارىن ايقىنداۋعا، ەۋرازيا كەڭىستىگىندە جاڭا سەرپىندى باستامالاردى جۇزەگە اسىرۋدىڭ نەگىزىن قالاۋعا مۇمكىندىك بەرەتىنىنە سەنىمدىمىن»، - دەدى قاسىم-جومارت توقايەۆ.

جاڭالىقتار